ರಾಜ್ಯದ 6 ಮಂದಿಗೆ ಮಾತ್ರ ಕಿಸಾನ್‌ ಸಮ್ಮಾನ್‌: ಕುಮಾರಸ್ವಾಮಿ

ರಾಮನಗರ: ರಾಜ್ಯ ಸರಕಾರ 2.8ಲಕ್ಷ ರೈತರ ಮಾಹಿತಿಯನ್ನು ಕೇಂದ್ರಕ್ಕೆ ನೀಡಿದ್ದರೂ ಕಿಸಾನ್‌ ಸಮ್ಮಾನ್‌ ಯೋಜನೆಗೆ ಕೇವಲ 17 ರೈತರನ್ನು ಆಯ್ಕೆ ಮಾಡಿದ್ದು, ಆರು ಮಂದಿಗೆ ಮಾತ್ರ ಹಣ ಬಂದಿದೆ ಎಂದು ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಹೇಳಿದ್ದಾರೆ.

ಮಾಗಡಿಯ ಕೋಟೆ ಮೈದಾನದಲ್ಲಿ ಗುರುವಾರ ಆಯೋಜಿಸಿದ್ದ ಮಾಗಡಿ ವಿಧಾನಸಭಾ ಕ್ಷೇತ್ರದ ವಿವಿಧ ಅಭಿವೃದ್ಧಿ ಕಾಮಗಾರಿಗಳ ಚಾಲನೆ ಹಾಗೂ ಶಂಕುಸ್ಥಾಪನೆ ನೆರವೇರಿಸಿ ಅವರು ಮಾತನಾಡಿದರು.

ಕರ್ನಾಟಕ ಸರಕಾರ ಸಹಕಾರ ನೀಡುತ್ತಿಲ್ಲ ಎಂಬ ಪ್ರಧಾನಿ ಹೇಳಿಕೆ ಶುದ್ದ ಸುಳ್ಳು. ಕೇಂದ್ರದ ಪ್ರಧಾನ ಮಂತ್ರಿ ಕೃಷಿ ಸನ್ಮಾನ್‌ ಯೋಜನೆಗೆ ರೈತರ ಸಂಪೂರ್ಣ ಮಾಹಿತಿಯನ್ನು ರಾಜ್ಯ ಸರಕಾರ ನೀಡಿದೆ. 40 ಸಾವಿರ ರೈತರ ಖಾತೆಗಳು ಸರಿ ಇಲ್ಲ ಎಂದು ಕೇಂದ್ರವೇ ತಿರಸ್ಕರಿಸಿದೆ ಎಂದು ಹೇಳಿದ ಅವರು, ಒಬ್ಬ ರೈತನಿಗೆ 2 ಸಾವಿರ ರೂ. ಬರುವ ಬದಲು ಕೇವಲ 950 ರೂ. ಬಂದಿದೆ. ಹೈನುಗಾರರಿಗೆ 2 ಸಾವಿರ ಕೋಟಿ, ರೈತರಿಗೆ ವಿದ್ಯುತ್‌ ಪೂರೈಕೆ ಮಾಡಲು 11.5 ಸಾವಿರ ಕೋಟಿ ರೂ.ಗಳನ್ನು ರಾಜ್ಯ ಸರಕಾರ ನೀಡಿದ್ದರೆ, ಕೇಂದ್ರದಿಂದ ಬಂದಿರುವುದು ಕೇವಲ 12 ಸಾವಿರ ರೂ. ಮಾತ್ರ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.