ಬೆಂಗಳೂರು: ರಾಜ್ಯದಲ್ಲಿ ಅಸಿಮ್ಟಮ್ಯಾಟಿಕ್‌ ರೋಗಿಗಳ ಸಂಖ್ಯೆ ಹೆಚ್ಚಳದಿಂದ ಕೋವಿಡ್‌ ಆರೈಕೆ ಕೇಂದ್ರಗಳಲ್ಲಿನ ಹಾಸಿಗೆಗಳು ಶೀಘ್ರದಲ್ಲೇ ಭರ್ತಿಯಾಗುವ ಹಂತಕ್ಕೆ ತಲುಪಲಿದೆ. ಹಾಸಿಗೆ ಕೊರತೆ ಉಂಟಾದರೆ ಲಕ್ಷಣರಹಿತ ಮತ್ತು ಅತಿ ಕಡಿಮೆ ಲಕ್ಷಣವಿರುವ ರೋಗಿಗಳನ್ನು ಮನೆ ಆರೈಕೆಗೆ ಒಳಪಡಿಸುವ ಸಾಧ್ಯತೆ ಇದೆ.

ಈ ಸಾಧ್ಯತೆಯನ್ನು ಮೊದಲೇ ಅರಿತಿದ್ದ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್‌) ಕೆಲ ವಾರಗಳ ಹಿಂದೆಯೇ ಈ ಕ್ರಮಕ್ಕೆ ಅನುಮೋದನೆ ನೀಡಿತ್ತು. ಕಾರ್ಯಪಡೆ ಕೂಡ ರಾಜ್ಯ ಸರಕಾರಕ್ಕೆ ಇದೇ ಸಲಹೆ ನೀಡಿದೆ.

ದಿಲ್ಲಿಯಲ್ಲಿ ಲಕ್ಷಣರಹಿತ ರೋಗಿಗಳ ಸಂಖ್ಯೆ ಹೆಚ್ಚಿದ್ದರಿಂದ ಈ ಕ್ರಮ ಜಾರಿ ಮಾಡಲಾಗಿದೆ. ರಾಜ್ಯದಲ್ಲಿ ಲಕ್ಷಣ ರಹಿತ ಸೋಂಕಿತರಾದ ವೈದ್ಯರು, ನರ್ಸ್‌ಗಳಿಗೆ ಮಾತ್ರ ಈ ಕ್ರಮ ಅನ್ವಯಿಸಲಾಗಿದೆ. ಇನ್ನು ಮುಂದೆ ಸಾಮಾನ್ಯ ಜನರಿಗೂ ಈ ಕ್ರಮ ಜಾರಿ ಮಾಡುವ ಸಾಧ್ಯತೆ ಇದೆ.
ಸೋಂಕಿತೆ ಸತ್ತು ಎರಡು ದಿನದ ಬಳಿಕ ಬಂದ ಕೊರೊನಾ ರಿಪೋರ್ಟ್‌: ಹಾಸನದಲ್ಲಿ 3ನೇ ಬಲಿ

ಮನೆ ಐಸೋಲೇಷನ್‌

ರಾಜ್ಯದಲ್ಲಿ 5472 (ಜೂ.28) ಸಕ್ರಿಯ ಪ್ರಕರಣಗಳಿವೆ. ಈ ಪೈಕಿ ಶೇ.80 ಕ್ಕೂ ಅಧಿಕ ರೋಗಿಗಳು ಲಕ್ಷಣರಹಿತರೇ ಆಗಿದ್ದಾರೆ. ಇವರಲ್ಲಿ ಬಹುತೇಕರು ಕೋವಿಡ್‌ಗೆ ನಿಗದಿಪಡಿಸಿದ ಆಸ್ಪತ್ರೆಗಳಲ್ಲಿ ದಾಖಲಾಗಿದ್ದಾರೆ. ಇತ್ತೀಚೆಗೆ ಕೋವಿಡ್‌ ಆರೈಕೆ ಕೇಂದ್ರಗಳನ್ನು ಆರಂಭಿಸಿದ್ದು, ಅಲ್ಲಿಗೆ ಈ ವರ್ಗದ ರೋಗಿಗಳನ್ನು ಸ್ಥಳಾಂತರಿಸಲಾಗುತ್ತಿದೆ.


ಕ್ರಮ ಹೇಗೆ?

ಮನೆ ಆರೈಕೆಯಲ್ಲಿ ಲಕ್ಷಣರಹಿತ ರೋಗಿಯು ಪ್ರತ್ಯೇಕ ಕೋಣೆಯಲ್ಲಿ ವಾಸಿಸಬೇಕು. ಬಟ್ಟೆ, ಆಹಾರ, ಶೌಚಾಲಯ ಎಲ್ಲದರಲ್ಲೂ ಪ್ರತ್ಯೇಕತೆ ಕಾಯ್ದುಕೊಳ್ಳಬೇಕು. ಜ್ವರ ಜೋರಾದರೆ, ಉಸಿರಾಟದ ತೊಂದರೆ ಕಂಡು ಬಂದರೆ ಮಾತ್ರ ಆಸ್ಪತ್ರೆಗೆ ದಾಖಲಿಸಲಾಗುತ್ತದೆ. ಆರೋಗ್ಯ ಸಿಬ್ಬಂದಿ ಇವರೊಂದಿಗೆ ಸಂಪರ್ಕದಲ್ಲಿರುತ್ತಾರೆ. ಇವರಿಗೆ ಕೆಲ ದಿನಗಳವರೆಗೆ ಜ್ವರದ ಮಾತ್ರೆಗಳನ್ನು ನೀಡಲಾಗುತ್ತದೆ. ಹೊರಗೆ ಹೋಗದೆ ಮನೆಯಲ್ಲೇ ಇದ್ದು, ರೋಗ ನಿರೋಧಕ ಶಕ್ತಿ ಹೆಚ್ಚಾಗುವ ಆಹಾರ ಸೇವಿಸಬೇಕು.



ಲಕ್ಷಣರಹಿತ ಸೋಂಕಿತರನ್ನು ಸದ್ಯಕ್ಕೆ ಆರೈಕೆ ಕೇಂದ್ರಗಳಲ್ಲೇ ದಾಖಲಿಸಲಾಗುತ್ತಿದೆ. ಪರಿಸ್ಥಿತಿ ನೋಡಿಕೊಂಡು ಮನೆ ಆರೈಕೆ ಕ್ರಮ ತರಬಹುದು. ಸದ್ಯಕ್ಕಂತೂ ಆ ಬಗ್ಗೆ ನಿರ್ಧಾರ ಮಾಡಿಲ್ಲ ಎಂದು ಆರೋಗ್ಯ ಇಲಾಖೆ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.