ಕೊರೊನಾ ಹಿನ್ನೆಲೆಯಲ್ಲಿ ಮ್ಯಾಕ್ಸಿಕ್ಯಾಬ್‌ಗಳ ತೆರಿಗೆ ಇಳಿಸಿದ ಸರಕಾರ

ಬೆಂಗಳೂರು: 13 ರಿಂದ 20 ಆಸನ ಸಾಮರ್ಥ್ಯ‌ದ ಒಪ್ಪಂದ ಪರವಾನಗಿ (ಕಾಂಟ್ರ್ಯಾಕ್ಟ್ ಕ್ಯಾರೇಜ್‌) ಹೊಂದಿರುವ ಮ್ಯಾಕ್ಸಿಕ್ಯಾಬ್‌ಗಳಿಗೆ ವಿಧಿಸುತ್ತಿದ್ದ ತೆರಿಗೆಯನ್ನು ಸರಕಾರ ಕಡಿಮೆ ಮಾಡಿದೆ.

ಒಪ್ಪಂದ ಪರವಾನಗಿಯ ಮ್ಯಾಕ್ಸಿಕ್ಯಾಬ್‌ಗಳಿಗೆ ಪ್ರತಿ ಆಸನಕ್ಕೆ ವಿಧಿಸುತ್ತಿದ್ದ 900 ರೂ. ತ್ರೈಮಾಸಿಕ ತೆರಿಗೆಯನ್ನು 700 ರೂ.ಗಳಿಗೆ ಇಳಿಸಲಾಗಿದೆ. ವಾಹನ ಮಾಲೀಕರ ಸಂಘಟನೆಗಳ ಬೇಡಿಕೆಗೆ ಸ್ಪಂದಿಸಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಸಾರಿಗೆ ಸಚಿವ ಲಕ್ಷ್ಮಣ ಸವದಿ ತಿಳಿಸಿದ್ದಾರೆ.

ರಾಜ್ಯದಲ್ಲಿ 13 ರಿಂದ 20 ಆಸನ ಸಾಮರ್ಥ್ಯ‌ದ ಒಪ್ಪಂದ ಪರವಾಗಿ ಹೊಂದಿರುವ 7-8 ಸಾವಿರ ಮ್ಯಾಕ್ಸಿಕ್ಯಾಬ್‌ಗಳಿವೆ. ಈ ವಾಹನಗಳಲ್ಲಿ ಮೊದಲು 13 ಆಸನಗಳನ್ನಷ್ಟೇ ಅಳವಡಿಸಲು ಅನುಮತಿ ನೀಡಿ, ತ್ರೈಮಾಸಿಕ 9400 ರೂ. ತೆರಿಗೆ ವಿಧಿಸಲಾಗುತ್ತಿತ್ತು.

ಹಳ್ಳಿಗಳ ಕಡೆ ಕೆಲ ವಾಹನ ಮಾಲೀಕರು 20 ಆಸನಗಳವರೆಗೆ ಅಳವಡಿಸಿಕೊಂಡು ಓಡಿಸುತ್ತಿದ್ದರು. 2020-21ನೇ ಸಾಲಿನ ಬಜೆಟ್‌ನಲ್ಲಿ 20ರವರೆಗೆ ಆಸನಗಳನ್ನು ಅಳವಡಿಸಿಕೊಂಡು ವಾಹನಗಳನ್ನು ಓಡಿಸಲು ಅನುಮತಿ ನೀಡಲಾಯಿತು. ಮೋಟಾರು ವಾಹನ ತೆರಿಗೆ ಇಳಿಕೆಯು ಮ್ಯಾಕ್ಸಿಕ್ಯಾಬ್‌ಗಳಿಗಷ್ಟೇ ಅನ್ವಯವಾಗಲಿದೆ.

ಆದರೆ, ತೆರಿಗೆ ವಿನಾಯಿತಿ ಕೋರಿ ಸಲ್ಲಿಸಿದ್ದ ಬೇಡಿಕೆಗಳು ಈವರೆಗೆ ಈಡೇರಿಲ್ಲ ಎಂದು ಕರ್ನಾಟಕ ರಾಜ್ಯ ಟ್ರಾವೆಲ್‌ ಆಪರೇಟರ್‌ ಸಂಘದ ಅಧ್ಯಕ್ಷ ಕೆ.ರಾಧಾಕೃಷ್ಣ ಹೊಳ್ಳ ತಿಳಿಸಿದ್ದಾರೆ.