ಮಲೆನಾಡಿನಲ್ಲಿ ಉಲ್ಭಣಗೊಂಡ ಮಂಗನ ಕಾಯಿಲೆ

ಬೆಂಗಳೂರು : ಶಿವಮೊಗ್ಗ ಜಿಲ್ಲೆ ಸಾಗರ ತಾಲೂಕಿನಲ್ಲಿ ಮಂಗನ ಕಾಯಿಲೆಗೆ ಈಗಾಗಲೇ ನಾಲ್ವರು ಬಲಿಯಾಗಿದ್ದು, ರೋಗ ಉಲ್ಭಣವಾಗುವುದನ್ನು ತಡೆಯಲು ರಾಜ್ಯ ಸರಕಾರ ಕೂಡಲೇ ಗಂಭೀರ ಪ್ರಯತ್ನ ನಡೆಸಬೇಕು ಎಂದು ಶಾಸಕ ಹರತಾಳು ಹಾಲಪ್ಪ ಆಗ್ರಹಿಸಿದ್ದಾರೆ.

''ಮಂಗನ ಕಾಯಿಲೆಯಿಂದ ಕಳೆದೊಂದು ವಾರದಲ್ಲಿ ನಾಲ್ವರು ಸತ್ತಿದ್ದು, 7 ಮಂದಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಚಳಿಗಾಲದಲ್ಲಿ ರೋಗ ಉಲ್ಭಣವಾಗಲಿದ್ದು, ಮಲೆನಾಡಿನ ಇತರ ಭಾಗಗಳಿಗೂ ವಿಸ್ತರಿಸುವ ಆತಂಕ ಸೃಷ್ಟಿಯಾಗಿದೆ. ಈ ಬಗ್ಗೆ ನಾವು ಮನವಿ ಮಾಡಿದರೂ ರಾಜ್ಯ ಸರಕಾರ ಗಂಭೀರವಾಗಿ ಪರಿಗಣಿಸಿಲ್ಲ. ಆರೋಗ್ಯ ಇಲಾಖೆ ಅಧಿಕಾರಿಗಳು ಸ್ಪಂದಿಸುತ್ತಿಲ್ಲ. ಇದೇ ಸ್ಥಿತಿ ಮುಂದುವರಿದರೆ ಸಿಎಂ ನಿವಾಸದ ಎದುರು ಧರಣಿ ನಡೆಸಲು ನಿರ್ಧರಿಸಿದ್ದೇನೆ'' ಎಂದು ಅವರು ಪತ್ರಿಕಾಗೋಷ್ಠಿಯಲ್ಲಿ ಗುರುವಾರ ತಿಳಿಸಿದರು.

''ಕಾಯಿಲೆ ದೃಢಪಡಿಸಿಕೊಳ್ಳಲು ಪುಣೆ ಪ್ರಯೋಗಾಲಯವನ್ನು ಅವಲಂಬಿಸಲಾಗಿದ್ದು ವರದಿ ಸಿಗಲು 15 ದಿನಗಳ ವರೆಗೆ ಕಾಯುವ ಸ್ಥಿತಿ ನಿರ್ಮಾಣವಾಗಿದೆ. ರೋಗಿಗಳಿಗೆ ಸಮರ್ಪಕ ಚಿಕಿತ್ಸೆಗೂ ವ್ಯವಸ್ಥೆ ಮಾಡಿಲ್ಲ. ಆರೋಗ್ಯ ಸಚಿವ ಶಿವಾನಂದ ಪಾಟೀಲ್‌ ಅವರು ಹಿರಿಯ ಅಧಿಕಾರಿಗಳನ್ನು ಕಳಿಸುವುದಾಗಿ ಭರವಸೆ ನೀಡಿದ್ದರು. ಆದರೆ, ಈವರೆಗೆ ಯಾವೊಬ್ಬ ಅಧಿಕಾರಿಯೂ ಶಿವಮೊಗ್ಗ ಜಿಲ್ಲೆಗೆ ಆಗಮಿಸಿ, ರೋಗ ನಿಯಂತ್ರಣಕ್ಕೆ ಪ್ರಯತ್ನ ನಡೆಸಿಲ್ಲ. ಸಾಗರದ ಹಲವೆಡೆ ಮಂಗಗಳು ಸಾವುಕಂಡಿವೆ. ಕೋತಿಗಳ ಓಡಾಟದಿಂದ ಶಿವಮೊಗ್ಗ, ಸಾಗರ ಮತ್ತಿತರ ಪಟ್ಟಣ ಪ್ರದೇಶಗಳಿಗೂ ಕಾಯಿಲೆ ವಿಸ್ತರಿಸುವ ಅಪಾಯವಿದೆ'' ಎಂದು ಆತಂಕ ವ್ಯಕ್ತಪಡಿಸಿದರು.

''ಮಂಗನ ಕಾಯಿಲೆ ದೃಢೀಕರಣಕ್ಕಾಗಿ ಸಾಗರ ಮತ್ತು ಶಿವಮೊಗ್ಗದಲ್ಲಿ ತಲಾ ಒಂದು ಪ್ರಯೋಗಾಲಯವನ್ನು ತಕ್ಷಣ ಆರಂಭಿಸಬೇಕು. ರೋಗಿಗಳಿಗೆ ಸಮರ್ಪಕ ಚಿಕಿತ್ಸೆ ಸಿಗುವಂತಾಗಲು ಶಿವಮೊಗ್ಗದ ಮೆಗ್ಗಾನ್‌ ಆಸ್ಪತ್ರೆಯಲ್ಲಿ ವಿಶೇಷ ವಾರ್ಡ್‌ ಸ್ಥಾಪಿಸಬೇಕು.ಮೃತ ನಾಲ್ವರ ಕುಟುಂಬಗಳಿಗೆ ಪರಿಹಾರ ವಿತರಿಸಬೇಕು'' ಎಂದು ಆಗ್ರಹಿಸಿದರು.