ಕೆಎಚ್‌ಬಿಯ ವಿವೇಚನಾ ಕೋಟಾ ಅಸಿಂಧು

ಬೆಂಗಳೂರು: ಗೃಹ ಮಂಡಳಿ ರಚಿಸಿದ ನಿವೇಶನಗಳ ಪೈಕಿ ವಿವೇಚನಾ ಕೋಟಾದಡಿ ಶೇ.5ರಷ್ಟು ನಿವೇಶನಗಳನ್ನು ಸಾರ್ವಜನಿಕ ಜೀವನದಲ್ಲಿರುವ ವ್ಯಕ್ತಿಗಳಿಗೆ ಹಂಚಿಕೆ ಮಾಡಲು ಅವಕಾಶ ಕಲ್ಪಿಸಿದ್ದ ನಿಯಮಗಳನ್ನು ಹೈಕೋರ್ಟ್‌ ಶುಕ್ರವಾರ ಅಸಿಂಧುಗೊಳಿಸಿ ಆದೇಶ ನೀಡಿದೆ.
ವಕೀಲ ಕೆ.ಬೋಜಪ್ಪ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ಪೂರ್ಣಗೊಳಿಸಿ ತೀರ್ಪು ಕಾಯ್ದಿರಿಸಿ ಸಿಜೆ ಎ.ಎಸ್‌. ಓಕ್‌ ಮತ್ತು ನ್ಯಾ.ಪಿ.ಎಂ.ನವಾಜ್‌ ಅವರಿದ್ದ ವಿಭಾಗೀಯಪೀಠವು ಅರ್ಜಿ ಪುರಸ್ಕರಿಸಿ ಈ ಆದೇಶ ಪ್ರಕಟಿಸಿತು.
ಹೈಕೋರ್ಟ್‌ ಕರ್ನಾಟಕ ಗೃಹ ಮಂಡಳಿ(ಹಂಚಿಕೆ) ನಿಯಂತ್ರಣ ಅಧಿನಿಯಮ-1983ರ ಸೆಕ್ಷನ್‌ 4(ಎ) (ಸಿ) ಮತ್ತು 9ಎ (ಸಿ) ಅನ್ನು ರದ್ದುಗೊಳಿಸಿದೆ.
''ಕೆಎಚ್‌ಬಿ ರಚಿಸಿದ ನಿವೇಶನಗಳ ಪೈಕಿ ಶೇ.10ರಷ್ಟು ನಿವೇಶನಗಳನ್ನು ವಿವೇಚನಾ ಕೋಟಾದಡಿ ನಾನಾ ಕ್ಷೇತಗಳಲ್ಲಿ ಸಾಧನೆ ಮಾಡಿದ ಜನರಿಗೆ ಮಂಜೂರು ಮಾಡಲು ಅವಕಾಶವಿದೆ. ಅದರಲ್ಲಿಸರಕಾರ ಹಾಗೂ ಗೃಹ ಮಂಡಳಿಯ ವಿವೇಚನಾ ಕೋಟಾದಡಿ ಶೇ.5ರಷ್ಟು ನಿವೇಶನಗಳನ್ನು ಸಾರ್ವಜನಿಕ ಜೀವನದಲ್ಲಿರುವ ವ್ಯಕ್ತಿಗಳಿಗೆ ಹಂಚಿಕೆ ಮಾಡಲು ಅವಕಾಶ ಕಲ್ಪಿಸಲಾಗಿದೆ. ಆದರೆ, ಯಾರು ಸಾರ್ವಜನಿಕ ಜೀವನದಲ್ಲಿರುವ ವ್ಯಕ್ತಿ? ಎಂಬ ಬಗ್ಗೆ ನಿರ್ದಿಷ್ಟ ಹಾಗೂ ಸೂಕ್ತ ವ್ಯಾಖ್ಯಾನ ಮಾಡಿಲ್ಲ. ಆದ್ದರಿಂದ ಈ ನಿಯಮಗಳನ್ನು ಅಸಿಂಧುಗೊಳಿಸಲಾಗುವುದು,'' ಎಂದು ನ್ಯಾಯಾಲಯ ಆದೇಶದಲ್ಲಿಹೇಳಿದೆ.
ಅರ್ಜಿದಾರರು, ''ನಿರ್ದಿಷ್ಟವಾಗಿ ಯಾರು ಸಾರ್ವಜನಿಕ ಜೀವನದಲ್ಲಿವ್ಯಕ್ತಿಗಳು? ಮತ್ತು ಈ ಶೇ.5ರಷ್ಟು ನಿವೇಶನಗಳನ್ನು ಪಡೆಯಲು ಯಾರು ಅರ್ಹರು? ಎಂಬುದನ್ನು ಕರ್ನಾಟಕ ಗೃಹ ಮಂಡಳಿ (ಹಂಚಿಕೆ) ನಿಯಂತ್ರಣ ಅಧಿನಿಯಮಗಳಲ್ಲಿಸ್ಪಷ್ಟಪಡಿಸಿಲ್ಲ. ಆದ್ದರಿಂದ ಆ ನಿಯಮಗಳನ್ನು ಅಸಿಂಧುಗೊಳಿಸಬೇಕು,'' ಎಂದು ಮನವಿ ಮಾಡಿದ್ದರು.