ಬಸ್‌ ಪ್ರಯಾಣ ದರ ಏರಿಕೆ ಬೆನ್ನಲ್ಲೇ 'ಪಾಸ್‌' ಶುಲ್ಕವನ್ನೂ ಹೆಚ್ಚಿಸಿದ ಸಾರಿಗೆ ಸಂಸ್ಥೆ

ಬೆಂಗಳೂರು: ರಾಜ್ಯ ಸಾರಿಗೆ ಸಂಸ್ಥೆ ಬಸ್‌ ಪ್ರಯಾಣ ದರವನ್ನು ಶೇ.12ರಷ್ಟು ಹೆಚ್ಚಳ ಮಾಡಿದ ಬೆನ್ನಲ್ಲೇ ಎಲ್ಲ ವಿವಿಧ ರೀತಿಯ ದೈನಂದಿನ ಬಸ್‌ ಪಾಸ್‌ಗಳ ದರವನ್ನು ಹೆಚ್ಚಿಸಿ ಆದೇಶ ಹೊರಡಿಸಿದೆ. ಮಾರ್ಚ್‌ 1ರಿಂದಲೇ ನೂತನ ಪರಿಷ್ಕೃತ ದರ ಚಾಲ್ತಿಗೆ ಬಂದಿದೆ.

ಬೆಂಗಳೂರು, ಮೈಸೂರು, ಮಂಡ್ಯ, ದಾವಣೆಗೆರೆ ಸುತ್ತಮುತ್ತಲಿನ ಸ್ಥಳಗಳಲ್ಲಿ ವಿತರಣೆಯಾಗುವ ಬಸ್‌ ಪಾಸ್‌ಗಳ ದರದಲ್ಲಿ ಏರಿಕೆಯಾಗಿದೆ.

ದೈನಂದಿನ ಬಸ್‌ ಪಾಸ್‌ಗಳು ಪ್ರತಿ ಬಸ್‌ ಪಾಸ್‌ಗೆ 10-15 ರೂ. ಏರಿಕೆಯಾಗಿದ್ದು, ಪರಿಷ್ಕೃತ ದರ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಬೆಂಗಳೂರು ಸುತ್ತಮುತ್ತಲಿನ ಪ್ರದೇಶಗಳು, ಮೈಸೂರು ನಗರ ಮತ್ತು ಹೊರವಲಯದಲ್ಲಿ ದೈನಂದಿನ ಪಾಸುಗಳ ದರವನ್ನು ಏರಿಕೆ ಮಾಡಲಾಗಿದೆ. ಪಾಸ್‌ ದರ 10 ರೂ. ಹೆಚ್ಚಾಗಿದೆ. ಮೈಸೂರು ವೋಲ್ವೋ ಬಸ್‌ಗಳ ಪಾಸ್‌ ದರವೂ 10 ರೂಪಾಯಿ ಹೆಚ್ಚಾಗಿದೆ.

ಬಜೆಟ್‌ ಮುನ್ನವೇ ಬಸ್‌ ಪ್ರಯಾಣ ದರ ಏರಿಕೆ?; ಶಾಕ್‌ ಕೊಡಲು ಸಜ್ಜಾಗಿದೆಯೇ ಯಡಿಯೂರಪ್ಪ ಸರಕಾರ

ಫೆಬ್ರವರಿ 25ರಂದು ರಾಜ್ಯ ಸಾರಿಗೆ ಸಂಸ್ಥೆಗಳ ಬಸ್‌ ಪ್ರಯಾಣ ದರವನ್ನು ಸರಕಾರ ಪರಿಷ್ಕರಣೆ ಮಾಡಿತ್ತು. ಶೇಕಡಾ 12 ರಷ್ಟು ಬಸ್‌ ಪ್ರಯಾಣ ದರ ಏರಿಕೆಗೆ ಸರಕಾರ ಅನುಮೋದನೆ ನೀಡಿ, ಫೆ.25ರ ಮಧ್ಯರಾತ್ರಿಯಿಂದಲೇ ನೂತನ ಪ್ರಯಾಣ ದರಗಳು ಚಾಲ್ತಿಗೆ ಬಂದಿದ್ದವು. ಇದೀಗ ಬಸ್‌ ಪಾಸುಗಳ ದರ ಏರಿಕೆಯಾಗಿದೆ.