ರೌಡಿ ಲಕ್ಷ್ಮಣ ಹತ್ಯೆ ಪ್ರಕರಣ: ವಾಟ್ಸ್‌ ಆ್ಯಪ್‌ನಲ್ಲೇ ಕೊಲೆಗೆ ಖೆಡ್ಡಾ ತೋಡಿದ್ದ ವರ್ಷಿಣಿ

ಬೆಂಗಳೂರು: ಮದ್ದೂರು ಮೂಲದ ಯುವತಿ ವರ್ಷಿಣಿ, ಲಂಡನ್‌ನಲ್ಲಿ ಕುಳಿತು ವಾಟ್ಸ್‌ ಆ್ಯಪ್‌ ಕರೆ ಮೂಲಕ ಲಕ್ಷ್ಮಣನನ್ನು ಯಾಮಾರಿಸಿದ್ದಳು ಎಂದು ತನಿಖೆಯಿಂದ ಗೊತ್ತಾಗಿದೆ. ಕೊಲೆ ನಡೆದ ದಿನ ತನ್ನ ಸ್ನೇಹಿತ ಕಳಿಸಿದ್ದ ಶೋರೂಂ ಒಂದರ ಫೋಟೊ ಕಳಿಸಿ ಅಲ್ಲಿಗೆ ಬರುವಂತೆ ತಿಳಿಸಿದ್ದಳು. ಆತ ಅಲ್ಲಿಗೆ ಬರುತ್ತಿದ್ದಂತೆ ಹಂತಕರು ಲಕ್ಷ್ಮಣನ ಮೇಲೆ ಮುಗಿಬಿದ್ದಿದ್ದರು. ಆದರೆ ವರ್ಷಿಣಿ ಮಾತ್ರ ಕೊಲೆಯಾದ ಮರುದಿನ ಲಂಡನ್‌ನಿಂದ ಹಿಂದಿರುಗಿದ್ದಳು.

ಕಾಟ ತಪ್ಪಿಸಿಕೊಳ್ಳಲು ಲಂಡನ್‌ಗೆ

ಸೈಕಾಲಜಿ ಪದವೀಧರೆ ಆಗಿರುವ ವರ್ಷಿಣಿ ಲಂಡನ್‌ನಲ್ಲಿ ಉನ್ನತ ವ್ಯಾಸಂಗಕ್ಕಾಗಿ ಕೇಂಬ್ರಿಡ್ಜ್‌ ವಿವಿಗೆ ದಾಖಲಾಗಿದ್ದಳು. ಓದಿನ ಕಡೆ ಹೆಚ್ಚು ಗಮನ ಇಲ್ಲದಿದ್ದರೂ ಲಕ್ಷ್ಮಣನ ಕಾಟದಿಂದ ತಪ್ಪಿಸಿಕೊಳ್ಳುವುದಕ್ಕಾಗಿಯೇ ಅಲ್ಲಿಗೆ ಹೋಗಿದ್ದಳು ಎನ್ನಲಾಗಿದೆ.

ಸಮಾಧಿ ಮುಂದೆ ಹೊರಳಾಡಿದ್ದಳು

ಮಾ.9 ರಂದು ಲಕ್ಷ್ಮಣದ ಸಮಾಧಿ ಬಳಿ ಬಂದ ವರ್ಷಿಣಿ ಮತ್ತು ತಾಯಿ ಪದ್ಮ ಎದೆ ಬಡಿದುಕೊಂಡು ಗೋಳಾಡಿದ್ದರು. ವರ್ಷಿಣಿಯಂತೂ 'ಅಂಕಲ್‌ ಅಂಕಲ್‌ ನಾನು ಬಂದಿದ್ದೀನಿ ನೋಡಿ' ಎಂದು ಬಿದ್ದು ಒದ್ದಾಡಿ ಕಣ್ಣೀರು ಹಾಕಿದ್ದಳು. ಸಿಸಿಬಿ ಪೊಲೀಸರು ಈಕೆಯನ್ನು ಬಂಧಿಸಿದಾಗಲೇ ಎಲ್ಲವೂ ನಾಟಕ ಎನ್ನುವುದು ಗೊತ್ತಾಯಿತು.

ಅಂದು ಮಂಜುಳಾ ಇಂದು ವರ್ಷಿಣಿ

1998 ರಲ್ಲಿ ನಡೆದಿದ್ದ ರೌಡಿ ಲೇಔಟ್‌ ಮಂಜನ ಕೊಲೆ ಪ್ರಕರಣದಲ್ಲೂ ಸಾಥ್‌ ನೀಡಿದ್ದೂ ಮದ್ದೂರಿನ ಯುವತಿ. ಆಗ ರೌಡಿ ಮಂಜನನ್ನು ಪ್ರೀತಿಸುವ ನಾಟಕವಾಡಿದ್ದ ಮದ್ದೂರಿನ ಮಂಜುಳಾ ಉಪಾಯವಾಗಿ ಆತನನ್ನು ಒಂಟಿಯಾಗಿ ಕರೆಸಿಕೊಂಡಿದ್ದಳು. 'ನಿನ್ನ ಗನ್‌ ನೋಡಿದರೆ ನನಗೆ ಭಯ ಆಗತ್ತೆ. ನನ್ನ ಬಳಿ ಬರುವಾಗ ಒಬ್ಬನೇ, ಗನ್‌ ಮನೇಲಿ ಇಟ್ಟು ಬರಬೇಕು' ಎಂದು ಒತ್ತಾಯ ಮಾಡಿದ್ದಳು. ಬರಿಕೈಲಿ ಬಂದಿದ್ದ ಮಂಜನನ್ನು ಕಾರಿನಲ್ಲಿ ಕರೆದೊಯ್ದ ಮಂಜುಳಾ, ಮಾರ್ಗ ಮಧ್ಯೆ ಎಸ್‌ಟಿಡಿ ಬೂತ್‌ನಲ್ಲಿ ಒಂದು ಕರೆ ಮಾಡಿ ಬರುವುದಾಗಿ ಹೇಳಿ ಇಳಿದಿದ್ದಳು. ಬೂತ್‌ನಲ್ಲೇ ಕುಳಿತಿದ್ದ ಹಂತಕರ ಗ್ಯಾಂಗ್‌ ಬಂದು ಮಂಜನನ್ನು ಕೊಲೆ ಮಾಡಿ ಪರಾರಿ ಆಗಿತ್ತು.

ರೌಡಿ ಲಕ್ಷ್ಮಣ ಹತ್ಯೆ ಪ್ರಕರಣ: ವರ್ಷಿಣಿ, ಸ್ನೇಹಿತ ಸಹಿತ 6 ಮಂದಿ ಬಂಧನ