ಲಾಕ್‌ಡೌನ್ ಹಿನ್ನೆಲೆಯಲ್ಲಿ: ಬೆಂಗಳೂರಲ್ಲಿ ಮದ್ಯ ಮಾರಾಟ ಜೋರು, 402 ಕೋಟಿ ರೂ. ವಹಿವಾಟು

ಬೆಂಗಳೂರು: ಬೆಂಗಳೂರು ನಗರ ಹಾಗೂ ಗ್ರಾಮಾಂತರ ಜಿಲ್ಲೆಯಲ್ಲಿ ಬುಧವಾರದಿಂದ ಒಂದು ವಾರ ಕಾಲ ಲಾಕ್‌ಡೌನ್‌ ಜಾರಿಗೊಳಿಸಿರುವ ಹಿನ್ನೆಲೆಯಲ್ಲಿ ರಾಜಧಾನಿಯಲ್ಲಿ ಕೇವಲ 2 ದಿನಗಳ ಅವಧಿಯಲ್ಲಿ ಸುಮಾರು 402 ಕೋಟಿ ರೂ. ದಾಖಲೆ ಪ್ರಮಾಣದಲ್ಲಿ ಮದ್ಯ ಮಾರಾಟವಾಗಿದೆ.

ಲಾಕ್‌ಡೌನ್‌ ಜಾರಿ ಸಂಬಂಧ ಕಳೆದ ಶನಿವಾರವೇ ರಾಜ್ಯ ಸರಕಾರ ತನ್ನ ನಿರ್ಧಾರ ಪ್ರಕಟಿಸಿತ್ತು. ಮಾರನೇ ದಿನ ಅಂದರೆ ಭಾನುವಾರ ಸಂಪೂರ್ಣ ಲಾಕ್‌ಡೌನ್‌ ಜಾರಿಯಲ್ಲಿದ್ದರಿಂದ ಆ ದಿನ ಯಾವುದೇ ರೀತಿಯ ಮದ್ಯ ವಹಿವಾಟಿಗೆ ಅವಕಾಶ ಇರಲಿಲ್ಲ. ಹೀಗಾಗಿ ಮದ್ಯ ಖರೀದಿಗೆ ಲಭ್ಯವಾದ ಎರಡು ದಿನ (ಸೋಮವಾರ, ಮಂಗಳವಾರ) ರಾಜಧಾನಿಯಲ್ಲಿ ಭರ್ಜರಿ ವಹಿವಾಟು ನಡೆದಿದೆ ಎಂದು ಅಬಕಾರಿ ಇಲಾಖೆ ಮೂಲಗಳು ತಿಳಿಸಿವೆ. ರಾಜ್ಯ ಸರಕಾರ 7 ದಿನಗಳ ಮಟ್ಟಿಗೆ ಲಾಕ್‌ಡೌನ್‌ ಜಾರಿಗೊಳಿಸಿದ್ದರೂ ಇದು ತಿಂಗಳಾಂತ್ಯದವರೆಗೂ ಮುಂದುವರಿಯಬಹುದೆಂಬ ಲೆಕ್ಕಾಚಾರದಲ್ಲಿ ಎರಡು ವಾರಗಳಿಗೆ ಸಾಕಾಗುವಷ್ಟು ಮದ್ಯವನ್ನು ಪಾನಪ್ರಿಯರು ದಾಸ್ತಾನು ಮಾಡಿಕೊಂಡಿದ್ದಾರೆ.

ಎಷ್ಟೆಷ್ಟು ವಹಿವಾಟು?

ಸೋಮವಾರ

4.89 ಲಕ್ಷ ಬಾಕ್ಸ್‌ ಐಎಂಎಲ್‌ 215 ಕೋಟಿ ರೂ.

83 ಸಾವಿರ ಬಿಯರ್‌ ಬಾಕ್ಸ್‌ 15 ಕೋಟಿ ರೂ.

ಮಂಗಳವಾರ

3.70 ಲಕ್ಷ ಬಾಕ್ಸ್‌ ಐಎಂಎಲ್‌ 160 ಕೋಟಿ ರೂ.

65 ಸಾವಿರ ಬಿಯರ್‌ ಬಾಕ್ಸ್‌ 12 ಕೋಟಿ ರೂ.

ಎರಡು ದಿನದ ಮಾರಾಟ 402 ಕೋಟಿ ರೂ.