ಜನರ ಹಣ ಲೂಟಿ ಮಾಡಲು ಮಹಾ ಘಟಬಂಧನ್‌: ಸ್ಮೃತಿ ಇರಾನಿ

ಬೆಂಗಳೂರು: ಪ್ರತಿಪಕ್ಷಗಳು ರಚಿಸಿಕೊಂಡ ಮಹಾಘಟಬಂಧನ ಮೋದಿಯವರನ್ನು ಸೋಲಿಸುವುದಕ್ಕಲ್ಲ, ಅದು ಜನರ ಜೇಬಿನ ಹಣವನ್ನು ಲೂಟಿ ಮಾಡಲು ಮಾಡಿಕೊಂಡಿದ್ದಾರೆ ಎಂದು ಕೇಂದ್ರ ಜವಳಿ ಸಚಿವೆ ಸ್ಮೃತಿ ಇರಾನಿ ಆರೋಪಿಸಿದರು.

ಭಾರತೀಯ ವಿದ್ಯಾಭವನದಲ್ಲಿ ಬಿಜೆಪಿ ಆಯೋಜಿಸಿದ್ದ ಪ್ರಬುದ್ಧರ ಗೋಷ್ಠಿಯಲ್ಲಿ ಮಾತನಾಡಿ, ''ಕಾಂಗ್ರೆಸ್‌ ಅಧಿಕಾರಾವಧಿಯಲ್ಲಿ ಸುಮಾರು 3 ಲಕ್ಷ ಕಂಪನಿಗಳು ತೆರಿಗೆ ವಂಚಿಸಿದ್ದವು. 8 ಕೋಟಿ ಕುಟುಂಬಗಳು ಅರ್ಹತೆ ಇಲ್ಲದಿದ್ದರೂ ಅಡುಗೆ ಅನಿಲದ ಸಹಾಯಧನ ಪಡೆದವು. 20 ಸಾವಿರ ಸಂಘ ಸಂಸ್ಥೆಗಳು ಅಕ್ರಮವಾಗಿ ವಿದೇಶಿ ಹಣ ಪಡೆದು ಬೆಳೆದವು. ಇಂತಹ ಅಕ್ರಮಕ್ಕೆ ಬೆಂಬಲ ನೀಡುತ್ತಲೇ ಬಂದಿದ್ದ ಪಕ್ಷಗಳಿಗೆ ಈಗ ಮೋದಿ ಅಡ್ಡವಾಗಿ ನಿಂತಿದ್ದಾರೆ. ದೇಶವನ್ನು ಲೂಟಿ ಮಾಡಲು ಅಂತಹವರಿಗೆ ಅವಕಾಶ ನೀಡಬೇಕೆ, ಬೇಡವೆ ಎಂಬ ಆಯ್ಕೆಯನ್ನು ಜನರು ಮಾಡಬೇಕು'' ಎಂದರು.

''ದೇಶದ ಅಳಿಯನೆಂದು ಕರೆಯಲ್ಪಡುವವರೊಬ್ಬರು ಲಂಡನ್‌ಗೆ ಹೋಗಿ ಮನೆ ಖರೀದಿಸುತ್ತಾರೆ. ಇದನ್ನು ತನಿಖೆ ಮಾಡಲು ಹೋದರೆ ಅಧಿಕಾರಿಗಳ ಮೇಲೆ ಹಲ್ಲೆ ಮಾಡುತ್ತಾರೆ. ಇಡಿ ಕಚೇರಿಗೆ ಹೋಗಲು ಭಯಪಡುವ ಈ ವ್ಯಕ್ತಿಗಳ ಕುಟುಂಬ ಸದಸ್ಯರು ಕೇಂದ್ರದ ಮೇಲೆ ಆರೋಪಗಳನ್ನು ಮಾಡುತ್ತಾರೆ'' ಎಂದು ಟೀಕಿಸಿದರು.

''ಬಯಲು ಶೌಚ ಮುಕ್ತಗೊಳಿಸಲು 9 ಕೋಟಿ ಕುಟುಂಬಗಳಿಗೆ ಶೌಚಾಲಯ ವ್ಯವಸ್ಥೆ, 10 ಕೋಟಿ ಕುಟುಂಬಗಳಿಗ ಆಯುಷ್ಮಾನ್‌ ಭಾರತ್‌ನಡಿ ವಿಮೆ ಸೇರಿದಂತೆ ಹಲವಾರು ಉತ್ತಮ ಯೋಜನೆಗಳನ್ನು ಬಿಜೆಪಿ ಸರಕಾರ ಜಾರಿ ಮಾಡಿದೆ. ಎಲ್ಲಕ್ಕಿಂತ ಮುಖ್ಯವಾಗಿ ಭ್ರಷ್ಟಾಚಾರಕ್ಕೆ ಕಡಿವಾಣ ಹಾಕಲಾಗಿದೆ'' ಎಂದರು.

ಸಂಸದ ಪಿ.ಸಿ.ಮೋಹನ್‌ ಮಾತನಾಡಿ, ''ಕೇಂದ್ರ ಸರಕಾರ ರಾಜ್ಯದ ಅಭಿವೃದ್ಧಿಗೆ, ಅದರಲ್ಲೂ ಬೆಂಗಳೂರಿನ ಅಭಿವೃದ್ಧಿಗೆ ಸಹಕಾರ ನೀಡುತ್ತಿದೆ. ಆದರೆ ರಾಜ್ಯ ಸರಕಾರ ಸರಿಯಾಗಿ ಸ್ಪಂದಿಸುತ್ತಿಲ್ಲ'' ಎಂದು ದೂರಿದರು.