ಅಂಬಾನಿ ಪುತ್ರಿ ಮದುವೆಗೆ ಮಂಗಳೂರಿನ ಫೋಟೊಗ್ರಾಫರ್‌!

ಮಂಗಳೂರು : ಉದ್ಯಮಿ ಮುಕೇಶ್‌ ಅಂಬಾನಿ ಮತ್ತು ನೀತಾ ಅಂಬಾನಿ ಪುತ್ರಿ ಇಶಾ ಮದುವೆ ಕಾರ್ಯಕ್ರಮದ ಛಾಯಾಗ್ರಾಹಕರಾಗಿ ಮಂಗಳೂರಿನ ವಿವೇಕ್‌ ಸ್ಟುಡಿಯೊ ಮಾಲೀಕ ವಿವೇಕ್‌ ಸಿಕ್ವೇರಾ ಕಾರ್ಯ ನಿರ್ವಹಿಸಿದ್ದು ಈಗ ಸುದ್ದಿಯಾಗುತ್ತಿದೆ.

ವಿಕದ ಜತೆ ಮಾತನಾಡಿದ ವಿವೇಕ್‌, ಸ್ನೇಹಿತರೊಬ್ಬರ ಮೂಲಕ ಈ ಅವಕಾಶ ಲಭಿಸಿದೆ. ಮೊದಲಿಗೆ ಕರೆ ಬಂದಾಗ ಯಾರ ಮದುವೆ ಎಂದೇ ಗೊತ್ತಿರಲಿಲ್ಲ, ಎರಡು ತಿಂಗಳ ಹಿಂದೆ ಮುಕೇಶ್‌ ಪುತ್ರಿಯ ಮದುವೆ ಎಂದು ತಿಳಿಯಿತು. ಆದರೆ ಈ ಕುರಿತು ಯಾರ ಬಳಿಯಲ್ಲೂ ಹೇಳಲು ಅವಕಾಶವಿರಲಿಲ್ಲ. ಇಂಗ್ಲೆಂಡ್‌ನಿಂದ ಎರಡು ತಂಡಗಳು ಹಾಗೂ ಭಾರತದ ಎರಡು ತಂಡಗಳಿಗೆ ಅಧಿಕೃತವಾಗಿ ಮದುವೆಯ ಚಿತ್ರೀಕರಿಸಲು ಅವಕಾಶ ಪಡೆದವು ಎಂದರು.

ಮುಂಬೈನಲ್ಲಿರುವ ಅಂಬಾನಿಯ 27 ಮಹಡಿಯ ಮನೆ 'ಆಂಟಿಲಿಯಾ'ದಲ್ಲಿ ನಡೆದ ಮದುವೆ, ಡಿ.14ರಂದು ಬಾಂದ್ರಾ ಕುರ್ಲಾ ಕಾಂಪ್ಲೆಕ್ಸ್‌ನಲ್ಲಿರುವ ಜಿಯೋಗಾರ್ಡನ್‌ನಲ್ಲಿ ನಡೆದ ಔತಣಕೂಟ ಸೇರಿದಂತೆ ಡಿ. 1,2,3ರಂದು ನಡೆದ ವರನ ಕಡೆಯ ಮನೆಯ ಗೃಹಪ್ರವೇಶ, ಡಿ.7,8,9ರಂದು ಉದಯಪುರದಲ್ಲಿ ನಡೆದ ಮದುವೆಯ ಪೂರ್ವ ಕಾರ್ಯಕ್ರಮದಲ್ಲಿಯೂ ವಿವೇಕ್‌ ಛಾಯಾಗ್ರಾಹಕರಾಗಿ ಭಾಗವಹಿಸಿದ್ದಾರೆ.

ವಿವೇಕ್‌ 2010, 2011, 2012 ಮತ್ತು 2014ರಲ್ಲಿ 'ಬೆಟರ್‌ ಫೋಟೋಗ್ರಫಿ' ಸಂಸ್ಥೆ ನೀಡುವ ಅತ್ಯುತ್ತಮ ಮದುವೆ ಫೋಟೋಗ್ರಾಫರ್‌ ಪುರಸ್ಕಾರಕ್ಕೆ ಆಯ್ಕೆಯಾಗಿದ್ದರು. ಇದೀಗ ವಿವೇಕ್‌, ಅಂಬಾನಿ ಮಗಳ ಫೋಟೊ ತೆಗೆಯುವ ಮೂಲಕ ದೇಶದ ಗಮನ ಸೆಳೆದಿದ್ದಾರೆ. ಇದುವರೆಗೆ 15 ದೇಶಗಳಿಗೆ ಭೇಟಿ ಕೊಟ್ಟು 1300ಕ್ಕೂ ಹೆಚ್ಚು ಮದುವೆಗಳ ಫೋಟೊ ತೆಗೆದಿದ್ದಾರೆ.


ದೇಶದ ನಂಬರ್‌ ಒನ್‌ ಉದ್ಯಮಿಯ ಮದುವೆಯಲ್ಲಿ ಭಾಗವಹಿಸಿರುವುದು ಆಕಸ್ಮಿಕವಾಗಿ ಬಂದ ಅವಕಾಶ. ಕಳೆದ ಹಲವು ದಿನಗಳಿಂದ ಮುಂಬೈಯಲ್ಲಿದ್ದು, ಮದುವೆಗೆ ಮುಂಚೆ ನಡೆದ ಕಾರ್ಯಕ್ರಮಗಳು ಮತ್ತು ಮದುವೆ ನಂತರದ ಔತಣಕೂಟದಲ್ಲಿ ನಾಲ್ವರು ಪ್ರಮುಖ ಛಾಯಾಗ್ರಾಹಕರ ಜತೆ ನಾನೂ ಒಬ್ಬನಾಗಿ ಭಾಗವಹಿಸಿದ್ದು ನನಗೆ ಮರೆಯಲಾಗದ ಸಂಗತಿ.

-ವಿವೇಕ್‌ ಸಿಕ್ವೇರಾ, ಛಾಯಾಗ್ರಾಹಕ