ಮಂಜೇಗೌಡ ರಾಜೀನಾಮೆ :ಕೋರ್ಟ್‌ ತೀರ್ಪಿಗೆ ಒಳಪಡಲಿದೆ

ಬೆಂಗಳೂರು: ಹಾಸನ ಜಿಲ್ಲೆಯ ಹೊಳೆನರಸೀಪುರ ಕ್ಷೇತ್ರದ ಕಾಂಗ್ರೆಸ್‌ ಅಭ್ಯರ್ಥಿಯಾಗಲು ಸರಕಾರಿ ಹುದ್ದೆಗೆ ಬಿ.ಪಿ.ಮಂಜೇಗೌಡ ನೀಡಿರುವ ರಾಜೀನಾಮೆ ಅಂಗೀಕಾರದ ಸರಕಾರಿ ಆದೇಶ ಹೈಕೋರ್ಟ್‌ ತೀರ್ಪಿಗೆ ಒಳಪಡಲಿದೆ.

ಚುನಾವಣೆಯಲ್ಲಿ ಸ್ಪರ್ಧಿಸಲೆಂದೇ ಹುದ್ದೆಗೆ ರಾಜೀನಾಮೆ ನೀಡಿದ ಪ್ರಕರಣ ಚರ್ಚೆಗೆ ಗ್ರಾಸ ಒದಗಿಸಿದೆ. ಟಿಕೆಟ್‌ ಕಾಯಂ ಆದ ಬಳಿಕ ರಾಜೀನಾಮೆ ನೀಡಿ ಅದನ್ನು ಅಂಗೀಕರಿಸಲು ಸರಕಾರದ ಮೇಲೆ ಒತ್ತಡ ಹೇರಲಾಗಿತ್ತು ಎಂಬ ಆಕ್ಷೇಪ ಹಿನ್ನೆಲೆಯಲ್ಲಿ ಪ್ರಕರಣ ನ್ಯಾಯಾಲಯದ ಮೆಟ್ಟಿಲೇರಿದೆ.

ಚನ್ನರಾಯಪಟ್ಟಣ ತಾಲೂಕಿನ ಡಿ.ಆರ್‌.ನಾರಾಯಣಸ್ವಾಮಿ ಹಾಗೂ ಇತರರು ದಾಖಲಿಸಿರುವ ಅರ್ಜಿ ಆಲಿಸಿದ ನ್ಯಾ. ಬಿ.ವೀರಪ್ಪ ಹಾಗೂ ನ್ಯಾ. ಸುನೀಲ್‌ದತ್‌ ಯಾದವ್‌ ಅವರಿದ್ದ ರಜಾ ಕಾಲದ ನ್ಯಾಯಪೀಠವು ಅರ್ಜಿ ವಿಚಾರಣೆ ನಡೆಸಿ ಪ್ರಕರಣವು ಕೋರ್ಟ್‌ನ ತೀರ್ಪಿಗೆ ಒಳಪಟ್ಟಿರುತ್ತದೆ ಎಂದು ಶುಕ್ರವಾರ ಮಧ್ಯಾಂತರ ಆದೇಶ ಹೊರಡಿಸಿತು.