ಮುಂಬೈನಲ್ಲಿ ಮರಿತಿಬ್ಬೇಗೌಡ ಸಂಧಾನಕ್ಕೆ ಯತ್ನ

ಬೆಂಗಳೂರು : ಮುಂಬೈ ತಲುಪಿರುವ ದೋಸ್ತಿ ಪಕ್ಷಗಳ 10 ಮಂದಿ ರೆಬೆಲ್‌ ಶಾಸಕರ ಮನವೊಲಿಕೆಗೆ ವಿಧಾನ ಪರಿಷತ್ತಿನ ಜೆಡಿಎಸ್‌ ಸದಸ್ಯ ಮರಿತಿಬ್ಬೇಗೌಡ ಪ್ರಯತ್ನ ನಡೆಸಿದ್ದಾರೆ.

ಹೋಟೆಲ್‌ನಲ್ಲಿ ತಂಗಿರುವ ಶಾಸಕರ ಪೈಕಿ ಮಾಜಿ ಸಚಿವ ರಮೇಶ್‌ ಜಾರಕಿಹೊಳಿ ಅವರನ್ನು ಭೇಟಿಯಾಗಿ ಕೆಲಕಾಲ ಮಾತುಕತೆ ನಡೆಸಿದ್ದಾರೆ. ಆದರೆ ಮಾತುಕತೆಯ ವಿವರಗಳು ಲಭ್ಯವಾಗಿಲ್ಲ. ಜೆಡಿಎಸ್‌ನಿಂದ ಸಂಧಾನಕಾರರಾಗಿ ಹೋಟೆಲ್‌ಗೆ ಹೋಗಿದ್ದರೆ ಅಥವಾ ಆಕಸ್ಮಿಕ ಭೇಟಿಯೇ ಎಂಬುದು ದೃಢಪಟ್ಟಿಲ್ಲ. ಈ ಮಧ್ಯೆ ದೋಸ್ತಿ ಶಾಸಕರ ಹೋಟೆಲ್‌ ಉಸ್ತುವಾರಿಯನ್ನು ಸ್ಥಳೀಯ ಬಿಜೆಪಿ ನಾಯಕರು ಹೊರಗಿನಿಂದಲೇ ನಿರ್ವಹಿಸುತ್ತಿದ್ದಾರೆ. ನೇರವಾಗಿ ರೆಬೆಲ್‌ಗಳ ಜತೆ ಗುರುತಿಸಿಕೊಂಡಿಲ್ಲ ಎನ್ನಲಾಗಿದೆ.