ರಾಜ್ಯದಲ್ಲ 6,577 ವೈದ್ಯ, 2674 ದಂತ ವೈದ್ಯ ಸೀಟು ಲಭ್ಯ

ಬೆಂಗಳೂರು: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವು (ಕೆಇಎ) 6577 ವೈದ್ಯ ಹಾಗೂ 2674 ದಂತ ವೈದ್ಯ ಸೀಟುಗಳ ಹಂಚಿಕೆಗೆ ಸೀಟ್‌ ಮ್ಯಾಟ್ರಿಕ್ಸ್‌ ಪ್ರಕಟಿಸಿದೆ.

ಒಟ್ಟು 52 ವೈದ್ಯ ಕಾಲೇಜುಗಳಲ್ಲಿ ಸರಕಾರಿ ವೈದ್ಯ ಸೀಟುಗಳು 3,950, ಖಾಸಗಿ/ ಆಡಳಿತ ಮಂಡಳಿ ಕೋಟಾದ ಸೀಟುಗಳು 1845, ಎನ್‌ಆರ್‌ಐ ಸೀಟುಗಳು 596 ಹಾಗೂ ಇತರೆ 186 ಸೀಟುಗಳು ಲಭ್ಯವಿವೆ. ಹಾಗೆಯೇ, 36 ದಂತ ವೈದ್ಯ ಕಾಲೇಜುಗಳಲ್ಲಿ ಸರಕಾರಿ ಸೀಟು 915, ಖಾಸಗಿ ಸೀಟು 1255, ಎನ್‌ಆರ್‌ಐ ಸೀಟು 383 ಹಾಗೂ ಇತರೆ 121 ಸೀಟುಗಳು ಲಭ್ಯವಿವೆ.

ವಾರ್ಷಿಕ ಶುಲ್ಕ ನಿಗದಿ (ವಿವಿ ಶುಲ್ಕ ಸೇರಿ):

ಸರಕಾರಿ ವೈದ್ಯ ಕಾಲೇಜುಗಳಲ್ಲಿ ಶುಲ್ಕ 59,850 ರೂ., ಖಾಸಗಿ ವೈದ್ಯ ಕಾಲೇಜುಗಳಲ್ಲಿ ಸರಕಾರಿ ಕೋಟಾದ ಸೀಟಿಗೆ 1,24,403 ರೂ., ಖಾಸಗಿ/ ಆಡಳಿತ ಮಂಡಳಿ ಸೀಟುಗಳಿಗೆ 7,98,015 ರೂ. ಶುಲ್ಕ ನಿಗದಿಯಾಗಿದೆ. ಎನ್‌ಆರ್‌ಐ ಹಾಗೂ ಇತರೆ ಸೀಟುಗಳಿಗೆ 25,12,450ರಿಂದ 50,12,450 ರೂ. ಶುಲ್ಕ ನಿಗದಿಯಾಗಿದೆ.

ಇನ್ನು, ಸರಕಾರಿ ದಂತ ವೈದ್ಯ ಕಾಲೇಜುಗಳಲ್ಲಿ ದಂತ ವೈದ್ಯ ಸೀಟಿಗೆ 49,850 ರೂ., ಖಾಸಗಿ ಕಾಲೇಜುಗಳಲ್ಲಿ ಸರಕಾರಿ ಕೋಟಾದ ದಂತ ವೈದ್ಯ ಸೀಟಿಗೆ 84,935 ಹಾಗೂ ಖಾಸಗಿ ಸೀಟುಗಳಿಗೆ 5,45,268 ರೂ. ನಿಗದಿಪಡಿಸಲಾಗಿದೆ. ಎನ್‌ಆರ್‌ಐ ಹಾಗೂ ಇತರೆ ಸೀಟುಗಳಿಗೆ 2,91,250ರಿಂದ 8,87,450 ರೂ. ಶುಲ್ಕ ನಿಗದಿಪಡಿಸಲಾಗಿದೆ.

ಇಚ್ಛೆ ದಾಖಲಿಸಲು ಅವಕಾಶ:

'ನೀಟ್‌'ನಲ್ಲಿ ಅರ್ಹ ರಾರ‍ಯಂಕ್‌ ಪಡೆದಿರುವ ಜುಲೈ 3ರಂದು ಬೆಳಗ್ಗೆ 11.30ರವರೆಗೆ ಇಚ್ಛೆ ದಾಖಲಿಸಲು ಅವಕಾಶವಿದೆ. ಜು. 4ರಂದು ಬೆಳಗ್ಗೆ 11 ಗಂಟೆಗೆ ಅಣಕು ಸೀಟು ಹಂಚಿಕೆ ಫಲಿತಾಂಶ ಪ್ರಕಟಿಸಲಾಗುತ್ತದೆ. ಅರ್ಹ ಅಭ್ಯರ್ಥಿಗಳು ಇಚ್ಛೆ/ ಆಯ್ಕೆ ಬದಲಾವಣೆ ಮಾಡಿಕೊಳ್ಳಲು ಜು. 4ರಂದು ಮಧ್ಯಾಹ್ನ 2 ಗಂಟೆಯಿಂದ ಜು. 6ರಂದು ಮಧ್ಯಾಹ್ನ 2 ಗಂಟೆವರೆಗೆ ಅವಕಾಶ ಕಲ್ಪಿಸಲಾಗಿದೆ. ಜು. 7ರಂದು ಸಂಜೆ 6 ಗಂಟೆಗೆ ಮೊದಲ ಸುತ್ತಿನ ಸೀಟು ಹಂಚಿಕೆ ಫಲಿತಾಂಶವನ್ನು ಪ್ರಕಟಿಸಲಾಗುತ್ತದೆ.