‘ಮೆಟ್ರೊ’ ಭದ್ರತೆಗೆ ಹೊಸ ನೇಮಕಾತಿ

ಬೆಂಗಳೂರು: ಮೆಟ್ರೊ ರೈಲು ನಿಲ್ದಾಣಗಳ ಭದ್ರತೆಯಲ್ಲಿ ಲೋಪವಿದೆ ಎಂಬ ಆರೋಪಗಳು ಕೇಳಿ ಬಂದ ಬೆನ್ನಲ್ಲೇ ಮೆಟ್ರೊ ನಿಲ್ದಾಣಗಳ ಭದ್ರತೆಗೆ ಮೀಸಲಿರುವಂತೆ ಕರ್ನಾಟಕ ರಾಜ್ಯ ಭದ್ರತಾ ಪಡೆಯ ಒಂದು ಬೆಟಾಲಿಯನ್‌ ನೇಮಕ ಮಾಡಲು ರಾಜ್ಯ ಸರಕಾರ ಅನುಮೋದನೆ ನೀಡಿದೆ.

ಭದ್ರತೆಗೆ ಅಗತ್ಯ ಇರುವ 1350 ಅಧಿಕಾರಿ ಮತ್ತು ಸಿಬ್ಬಂದಿ ಹುದ್ದೆಗಳನ್ನು ನೇರ ನೇಮಕಾತಿ ಮೂಲಕ ಭರ್ತಿ ಮಾಡಿಕೊಳ್ಳಲು ರಾಜ್ಯ ಸರಕಾರ ಒಪ್ಪಿಗೆ ಸೂಚಿಸಿದೆ. ಒಬ್ಬರು ಕಮಾಂಡೆಂಟ್‌, ಇಬ್ಬರು ಡೆಪ್ಯುಟಿ ಕಮಾಂಡೆಂಟ್‌, ಐದು ಮಂದಿ ಸಹಾಯಕ ಕಮಾಂಡೆಂಟ್‌ ಜತೆಗೆ 1018 ಪೊಲೀಸ್‌ ಪೇದೆಗಳೂ ಸೇರಿ ಒಟ್ಟು 1350 ಹುದ್ದೆಗಳನ್ನು ಸೃಜಿಸಲಾಗಿದೆ.

ಮೆಟ್ರೊ ಭದ್ರತೆಗೆ ಕೈಗಾರಿಕಾ ಭದ್ರತಾ ಪಡೆಯ ಒಂದು ಪೂರ್ಣ ಬೆಟಾಲಿಯನ್‌ ಅಗತ್ಯ ಇರುತ್ತದೆ. ಇದಕ್ಕೆ ಬೇಕಾದ ಅಧಿಕಾರಿ ಮತ್ತು ಸಿಬ್ಬಂದಿಯನ್ನು ಕರ್ನಾಟಕ ರಾಜ್ಯ ಮೀಸಲು ಪೊಲೀಸ್‌ ಪಡೆ, ನಗರ ಶಸಸ್ತ್ರ ಪಡೆ, ಜಿಲ್ಲಾ ಮೀಸಲು ಪಡೆಯಿಂದ ನಿಯೋಜಿಸುವಂತೆ ಹಿಂದಿನ ಸರಕಾರದ ಸೂಚನೆ ಇತ್ತು. ಈ ಬಗ್ಗೆ ಪೊಲೀಸ್‌ ಇಲಾಖೆಯಿಂದ ಬಂದ ವ್ಯತಿರಿಕ್ತ ವರದಿ ಹಿನ್ನೆಲೆಯಲ್ಲಿ ಸರಕಾರ ನೇರ ನೇಮಕಾತಿ ಮೂಲಕ ಅಷ್ಟೂ ಹುದ್ದೆಗಳ ಭರ್ತಿ ಮಾಡಲು ಅವಕಾಶ ಕಲ್ಪಿಸಿದೆ.