ಸಂಪುಟ ಸಂಕಷ್ಟ: ಶಾಸಕರ ವರ್ತನೆ ಸರಿಯಲ್ಲ, ಕೆ.ಎಸ್ ಈಶ್ವರಪ್ಪ ಗರಂ

ಶಿವಮೊಗ್ಗ: ಸಂಪುಟ ವಿಸ್ತರಣೆಯ ಬೆನ್ನಲ್ಲೇ ಬಿಜೆಪಿಯಲ್ಲಿ ಅತೃಪ್ತಿಯ ಹೊಗೆ ಕಾಣಿಸಿಕೊಂಡಿದ್ದು ಶಾಸಕರ ಬಹಿರಂಗ ಹೇಳಿಕೆಗೆ ಸಚಿವ ಕೆ.ಎಸ್ ಈಶ್ವರಪ್ಪ ಗರಂ ಆಗಿದ್ದಾರೆ. ಶಿವಮೊಗ್ಗದಲ್ಲಿ ಶುಕ್ರವಾರ ಮಾತನಾಡಿದ ಅವರು ಶಾಸಕರ ವರ್ತನೆ ಸರಿ ಇಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಸಂಪುಟ ವಿಸ್ತರಣೆಯ ಸಂದರ್ಭದಲ್ಲಿ ಅಸಮಾಧಾನ ಸಹಜ, ಆದರೆ ಸೂಕ್ತ ಸ್ಥಳದಲ್ಲಿ ಸರಿಪಡಿಸಿಕೊಳ್ಳಬೇಕು. ಹಾದಿ ಬೀದಿಯಲ್ಲಿ ಈ ರೀತಿ ಮಾತನಾಡುವುದು ಸರಿಯಲ್ಲ. ಈ ಬೆಳವಣಿಗೆ ಯಾರಿಗೂ ಸಮಾಧಾನ ತರಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಅಮಿತ್ ಶಾ ಮುಂದೆ 'ಆರೋಪ ಪಟ್ಟಿ' ಮಂಡಿಸಲು ಕಮಲ ಅತೃಪ್ತರ ಸಿದ್ಧತೆ! ಬಿಎಸ್‌ವೈ ಪ್ರತಿತಂತ್ರ ಏನು?

ಮಂತ್ರಿಯಾಗಲು ರಾಜಕೀಯ ಬರುವುದು ಎಂಬುವುದು ನೋವು ತಂದಿದೆ. ಯಾರು ಯಾರು ಮಂತ್ರಿ ಆಗಲು ಅಪೇಕ್ಷೆ ಪಟ್ಟಿದ್ದಾರಾ ಅವರು ಕೇವಲ ಮಂತ್ರಿ ಆಗಲು ರಾಜಕೀಯ ಬರಬಾರದು ಎಂದು ಮನವಿ ಮಾಡಿಕೊಂಡರು. ಇದು ಹೀಗೆ ಮುಂದುವರಿದರೆ ಇಂತಹ ಪರಿಸ್ಥಿತಿಗೆ ಕಾರಣರಾದವರ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳುವ ಅನಿವಾರ್ಯತೆ ಬರಬಹುದು ಎಂಬ ಎಚ್ಚರಿಕೆಯನ್ನು ನೀಡಿದ್ದಾರೆ.

ಮುಖ್ಯಮಂತ್ರಿ ಬಿಎಸ್ ಯಡಿಯೂರಪ್ಪ ಹಾಗೂ ಅವರ ಕುಟುಂಬದ ವಿರುದ್ಧ ಆರೋಪ, ಸಿ.ಡಿ ವಿಚಾರಗಳು ಸೇರಿದಂತೆ ಸದ್ಯದ ಎಲ್ಲಾ ಬೆಳವಣಿಗೆಗಳನ್ನು ಗಮಿಸಿದರೆ ಬಿಜೆಪಿ ಪಕ್ಷನಾ ಇದು ಎಂಬ ಅನುಮಾನ ಶುರುವಾಗಿದೆ ಎಂದು ತಮ್ಮ ಅಸಮಾಧಾನವನ್ನು ಈಶ್ವರಪ್ಪ ಹೊರಹಾಕಿದ್ದಾರೆ.