ಅಕ್ರಮ ಗಣಿಗಾರಿಕೆ ಕೇಸ್‌ : ಆನಂದ್‌ ಸಿಂಗ್‌ ಪೊಲೀಸ್‌ ಕಸ್ಟಡಿಗೆ

ಬೆಂಗಳೂರು: ಬಳ್ಳಾರಿ ಅಕ್ರಮ ಗಣಿಗಾರಿಕೆ ಪ್ರಕರಣದಲ್ಲಿ ನ್ಯಾಯಾಲಯದ ವಿಚಾರಣೆಗೆ ಗೈರು ಹಾಜರಾಗಿದ್ದ ಹೊಸಪೇಟೆ ಶಾಸಕ ಆನಂದ್‌ ಸಿಂಗ್‌ ಅವರನ್ನು ಜನಪ್ರತಿನಿಧಿಗಳ ವಿಶೇಷ ನ್ಯಾಯಾಲಯ ಪೊಲೀಸ್‌ ವಶಕ್ಕೆ ನೀಡಿತ್ತು.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಈ ಹಿಂದಿನ ವಿಚಾರಣೆ ವೇಳೆ ಗೈರು ಹಾಜರಾಗಿದ್ದ ಕಾರಣ ಜಾಮೀನುರಹಿತ ವಾರೆಂಟ್‌ ಹೊರಡಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ವಾರೆಂಟ್‌ ರೀಕಾಲ್‌ ಮಾಡಿಕೊಳ್ಳಲು ಆನಂದ್‌ ಸಿಂಗ್‌ ಅವರು ನ್ಯಾಯಾಲಯಕ್ಕೆ ಆಗಮಿಸಿದ್ದರು.

ಅರ್ಜಿ ಸಲ್ಲಿಸಿದ ಬಳಿಕ ಶಾಸಕರನ್ನು ವಶಕ್ಕೆ ತೆಗೆದುಕೊಳ್ಳುವಂತೆ ಪೊಲೀಸರಿಗೆ ನ್ಯಾಯಾಧೀಶರು ಸೂಚಿಸಿದರು. ಮಧ್ಯಾಹ್ನ ಅರ್ಜಿ ವಿಚಾರಣೆ ನಡೆಸಿದ ಆನಂದ್‌ ಸಿಂಗ್‌ ಅವರಿಗೆ 1,200 ದಂಡ ವಿಧಿಸಿದ ನ್ಯಾಯಾಲಯ, ವಿಚಾರಣೆಗೆ ಸರಿಯಾಗಿ ಹಾಜರಾಗುವಂತೆ ತಿಳಿಸಿ ವಾರೆಂಟ್‌ ವಿಚಾರಣೆ ಪೂರ್ಣಗೊಳಿಸಿತು.

ಸಂಬಂಧಿಗೆ ತರಾಟೆ: ಆನಂದ್‌ ಸಿಂಗ್‌ ಜಾಮೀನು ಶ್ಯೂರಿಟಿಗೆ ಬಂದಿದ್ದ ಸಂಬಂಧಿ ಸಂತೋಷ್‌ ಕುಮಾರ್‌ ಎಂಬುವರನ್ನು ನ್ಯಾಯಾಧೀಶರು ತರಾಟೆಗೆ ತೆಗೆದುಕೊಂಡರು.

ವಿಚಾರಣೆ ಮುಗಿಯುವ ಮೊದಲೇ ನ್ಯಾಯಾಲಯದಿಂದ ಹೊರ ನಡೆದ ಸಂತೋಷ್‌ ಕುಮಾರ್‌ ಅವರ ವರ್ತನೆಗೆ ಬೇಸರ ವ್ಯಕ್ತಪಡಿಸಿದ ನ್ಯಾಯಾಧೀಶರು, ''ಕೋರ್ಟ್‌ನಲ್ಲಿ ಗೌರವದಿಂದ ನಡೆದುಕೊಳ್ಳಬೇಕು. ಸಿನಿಮಾ ಮಂದಿರ, ಹೊಟೇಲ್‌ನಂತೆ ಓಡಾಟ, ನಿಂತುಕೊಳ್ಳುವುದು ಮಾಡಬಾರದು. ನ್ಯಾಯಾಲಯಕ್ಕೆ ಗೌರವ ಕೊಡುವುದನ್ನು ಕಲಿಯಬೇಕು,'' ಎಂದು ಹೇಳಿದರು.