ಈ ಹಳ್ಳಿಯಲ್ಲಿ ಅಪ್ರಾಪ್ತರಿಗೆ ಮೊಬೈಲ್‌ ನಿಷೇಧ!

ಗಾಂಧಿನಗರ: ಇತ್ತೀಚಿನ ವರ್ಷಗಳಲ್ಲಿ ಮಕ್ಕಳಲ್ಲಿ ಮೊಬೈಲ್‌ ಬಳಕೆ ವ್ಯಸನವಾಗುತ್ತಿದ್ದು, ಅದು ನಾನಾ ರೀತಿಯ ದುರಂತಗಳಿಗೆ ಎಡೆ ಮಾಡಿಕೊಡುತ್ತಿದೆ. ತರಹೇವಾರಿ ಆ್ಯಪ್‌ಗಳು, ಆನ್‌ಲೈನ್‌ ಗೇಮ್‌ಗಳು ಮಕ್ಕಳ ಜೀವ ಪಡೆಯುತ್ತಿವೆ.

ಮಕ್ಕಳನ್ನು ಮೊಬೈಲ್‌ ಬಳಕೆಯ ಚಟದಿಂದ ದೂರ ಮಾಡುವ ಉದ್ದೇಶದಿಂದ ಗುಜರಾತಿನ ಮೆಹ್ಸಾನ ಜಿಲ್ಲೆಯ ಲಿಂಚ್‌ ಗ್ರಾಮದಲ್ಲಿ 18 ವರ್ಷದೊಳಗಿನ ಮಕ್ಕಳಿಗೆ ಮೊಬೈಲ್‌ ಬಳಕೆ ನಿಷೇಧಿಸಲಾಗಿದೆ. ಲಿಂಚ್‌ ಗ್ರಾಮದ ಮೊದಲ ಮಹಿಳಾ ಸರಪಂಚ್‌ ಅಂಜನಾಬೆನ್‌ ಪಟೇಲ್‌ ಇಂತಹದ್ದೊಂದು ನಿರ್ಧಾರ ಕೈಗೊಂಡಿದ್ದು, ಅದರ ಪರಿಣಾಮ ಈಗ ಗ್ರಾಮದ ಮಕ್ಕಳು ಮೊಬೈಲ್‌ನಲ್ಲಿ ವೃಥಾ ಕಾಲಹರಣ ಮಾಡುವ ಬದಲು ಓದಿನತ್ತ ಗಮನ ಹರಿಸಿದ್ದಾರೆ ಎನ್ನುತ್ತಾರೆ ಪೋಷಕರು. ಇತ್ತೀಚೆಗೆ ಗ್ರಾಮದಲ್ಲಿ ಇಬ್ಬರು ಹದಿ ಹರೆಯ ವಯಸ್ಸಿನ ಮಕ್ಕಳು ಮೊಬೈಲ್‌ನಲ್ಲಿ ಆನ್‌ಲೈನ್‌ ಗೇಮ್‌ ಹುಚ್ಚು ಹಿಡಿಸಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದರು. ಈ ಘಟನೆ ಬಳಿಕ ಗ್ರಾಮ ಪಂಚಾಯಿತಿ ಸಭೆ ನಡೆಸಿ ಗ್ರಾಮಸ್ಥರ ಅನುಮತಿ ಪಡೆದು 18 ವರ್ಷದೊಳಗಿನ ಮಕ್ಕಳಿಗೆ ಮೊಬೈಲ್‌ ಬಳಕೆ ನಿಷೇಧಿಸಿದೆ. ಅಲ್ಲದೇ ಮಕ್ಕಳ ಕೈಗೆ ಮೊಬೈಲ್‌ ಕೊಡದಂತೆ ಪೋಷಕರಲ್ಲಿ ಮನವಿ ಮಾಡಿಕೊಂಡಿದೆ.