ಡಿಗ್ರಿ ಎಕ್ಸಾಂ ಹಾಲ್‌ಗಳಿಗೆ ಜಾಮರ್: ಪರೀಕ್ಷಾ ಅಕ್ರಮ ತಡೆಗೆ ಯುಜಿಸಿ ಮಾರ್ಗೋಪಾಯ

ಬೆಂಗಳೂರು: ವಿಶ್ವವಿದ್ಯಾಲಯ ಹಾಗೂ ಪದವಿ ಕಾಲೇಜು ಪರೀಕ್ಷೆಗಳಲ್ಲಿಅಕ್ರಮಗಳ ತಡೆಗೆ ಪರೀಕ್ಷಾ ಕೊಠಡಿಗಳಿಗೆ ಕೇಂದ್ರ ಸರಕಾರ ರೂಪಿಸಿರುವ ಜಾಮರ್‌ ನೀತಿ ಅನ್ವಯ ಜಾಮರ್‌ಗಳನ್ನು ಅಳವಡಿಸಿಕೊಳ್ಳುವಂತೆ ವಿಶ್ವವಿದ್ಯಾಲಯ ಧನಸಹಾಯ ಆಯೋಗ (ಯುಜಿಸಿ) ದೇಶದ ಎಲ್ಲ ಉನ್ನತ ಶಿಕ್ಷಣ ಸಂಸ್ಥೆಗಳಿಗೆ ಸೂಚಿಸಿದೆ.

ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ (ವಿಟಿಯು) ಆನ್‌ಲೈನ್‌ ಮೂಲಕ ಕಾಲೇಜುಗಳಿಗೆ ರವಾನಿಸಿದ ಪ್ರಶ್ನೆ ಪತ್ರಿಕೆಯು ಪರೀಕ್ಷೆಗೂ ಅರ್ಧ ಗಂಟೆಗೂ ಮುನ್ನವೇ ಸೋರಿಕೆಯಾಗಿ ವಿದ್ಯಾರ್ಥಿಗಳ ಕೈಸೇರಿತ್ತು. ಈ ಪ್ರಕರಣದ ಬಗ್ಗೆ ವಿವಿಯು ಕಳೆದ ಎರಡೂವರೆ ತಿಂಗಳಿಂದ ಆಂತರಿಕ ತನಿಖೆ ನಡೆಸುತ್ತಿದ್ದು, ಇನ್ನಷ್ಟೇ ಹೇಗೆ ಪ್ರಶ್ನೆ ಪತ್ರಿಕೆ ಸೋರಿಕೆಯಾಯಿತು ಎಂಬುದು ಬಯಲಾಗಬೇಕಿದೆ. ವಿವಿಯ ಸೆಮಿಸ್ಟರ್‌ ಪರೀಕ್ಷೆಯ ಪ್ರಶ್ನೆ ಪತ್ರಿಕೆಗಳಲ್ಲದೆ, ಕೆಲ ಇಲಾಖಾ ಪರೀಕ್ಷೆಗಳ ಪ್ರಶ್ನೆ ಪತ್ರಿಕೆಗಳನ್ನು ಕೂಡ ವಾಟ್ಸ್ಆ್ಯಪ್‌ನಲ್ಲಿ ರವಾನಿಸಲಾಗುತ್ತದೆ.

ಈ ಹಿನ್ನೆಲೆಯಲ್ಲಿ ಜಾಮರ್‌ ಅಳವಡಿಕೆಗೆ ನಿರ್ದೇಶನ ನೀಡಲಾಗಿದೆ. ಜಾಮರ್‌ ಬಳಕೆಯ ನಿಯಂತ್ರಣ ದೂರ ಸಂಪರ್ಕ ಇಲಾಖೆ ವ್ಯಾಪ್ತಿಗೆ ಬರಲಿದ್ದು, ಇಂಡಿಯನ್‌ ವೈರ್‌ಲೆಸ್‌ ಟೆಲಿಗ್ರಾಫಿ ಕಾಯ್ದೆ-1933 ಪ್ರಕಾರ, ಪರೀಕ್ಷಾ ಕೊಠಡಿಗಳಲ್ಲಿ ಜಾಮರ್‌ಗಳನ್ನು ಬಳಕೆ ಮಾಡಲು ಅನುಮತಿ ಪಡೆಯಬೇಕಾಗುತ್ತದೆ ಎಂದು ಯುಜಿಸಿ ಸ್ಪಷ್ಟಪಡಿಸಿದೆ. ಈಗಾಗಲೇ ಪರೀಕ್ಷಾರ್ಥ ಹಾಗೂ ಪ್ರಾಯೋಗಿಕವಾಗಿ ಬಳಸಿದ ಜಾಮರ್‌ಗಳನ್ನು ಬಳಸುವುದು ಸೂಕ್ತ. ಪ್ರತಿ ಪರೀಕ್ಷಾ ಕೇಂದ್ರದಲ್ಲಿಪರೀಕ್ಷೆ ಪ್ರಾರಂಭಕ್ಕೂ ಮುನ್ನ ಜಾಮರ್‌ಗಳ ಕಾರ್ಯಕ್ಷಮತೆ ಬಗ್ಗೆ ದೃಢಪಡಿಸಿಕೊಳ್ಳುವಂತೆ ಯುಜಿಸಿ ಕಾರ್ಯದರ್ಶಿ ರಜನೀಶ್‌ ಜೈನ್‌ ಸಲಹೆ ಮಾಡಿದ್ದಾರೆ. ಕೇಂದ್ರದ ನೀತಿ ಪ್ರಕಾರ, ಖಾಸಗಿ ವಲಯದ ಸಂಸ್ಥೆಗಳು ಅಥವಾ ಖಾಸಗಿ ವ್ಯಕ್ತಿಗಳು ಜಾಮರ್‌ಗಳನ್ನು ಖರೀದಿಸುವುದು ಅಥವಾ ಬಳಕೆ ಮಾಡುವುದು ನಿಷಿದ್ಧ. ಆದರೆ, ರಾಜ್ಯ ಸರಕಾರಗಳು ಜಾಮರ್‌ಗಳನ್ನು ಖರೀದಿಸಿ, ನಿಯಮಾನುಸಾರ ಬಳಕೆ ಮಾಡಲು ಅವಕಾಶ ಕಲ್ಪಿಸಲಾಗಿದೆ.

ಈ ಹಿನ್ನೆಲೆಯಲ್ಲಿಪರೀಕ್ಷೆ ನಡೆಸುವಂತಹ ವಿಶ್ವವಿದ್ಯಾಲಯಗಳು ಹಾಗೂ ಉನ್ನತ ಶಿಕ್ಷಣ ಸಂಸ್ಥೆಗಳು ಪರೀಕ್ಷಾ ಅಕ್ರಮ ಚಟುವಟಿಕೆಗಳನ್ನು ತಡೆಯುವುದಕ್ಕೆ ಸೀಮಿತವಾಗಿ ಕಡಿಮೆ ಸಾಮರ್ಥ್ಯದ ಜಾಮರ್‌ಗಳನ್ನು ಬಳಸುವಂತೆ ಸಲಹೆ ಮಾಡಲಾಗಿದೆ. ಪರೀಕ್ಷಾ ಅವಧಿಗೆ ಸೀಮಿತವಾಗಿ ಗುತ್ತಿಗೆ ಆಧಾರದಲ್ಲಿಯೂ ಜಾಮರ್‌ಗಳನ್ನು ಪಡೆಯಬಹುದಾಗಿದ್ದು, ನಿರ್ದಿಷ್ಟ ಅವಧಿಗೆ ಬಾಡಿಗೆ ಪಾವತಿಸಲು ಕೂಡ ಸೂಚಿಸಲಾಗಿದೆ.