ಗೋಬ್ಯಾಕ್‌ಮೋದಿ ಅಭಿಯಾನ ನಡೆಸಿದ ಕಾಂಗ್ರೆಸ್‌

ಬೆಂಗಳೂರು : ಪ್ರಧಾನಿ ಮೋದಿಯವರು ಹುಬ್ಬಳ್ಳಿಯಲ್ಲಿ ರಾರ‍ಯಲಿ ನಡೆಸಿದ ಸಂದರ್ಭದಲ್ಲಿ ಕಾಂಗ್ರೆಸ್‌ನಿಂದ 'ಗೋಬ್ಯಾಕ್‌ಮೋದಿ' ಎಂಬ ಅಭಿಯಾನ ವಿಚಾರದಲ್ಲಿ ಕೆಪಿಸಿಸಿ ಅಧಿಕೃತ ಟ್ವಿಟರ್‌ ಹ್ಯಾಂಡಲ್‌ನಿಂದ ಸರಣಿ ಟ್ವೀಟ್‌ ಮಾಡಲಾಗಿದೆ.

ಇದನ್ನು ಬೆಂಬಲಿಸಿ ಡಿಸಿಎಂ ಜಿ.ಪರಮೇಶ್ವರ್‌ ಹಾಗೂ ಇತರರು ಟ್ವೀಟ್‌ ಮಾಡಿದ್ದಾರೆ. ಮಹದಾಯಿ ಸಂಬಂಧದಲ್ಲಿ ರಾಜ್ಯಕ್ಕೆ ಕೇಂದ್ರದಿಂದ ಅನ್ಯಾಯವಾಗಿದೆಯೆಂದು ಆರೋಪಿಸಲಾಗಿದೆ.

''ಮೋದಿಯವರೇ, ನಿಮಗೂ ಸತ್ಯಕ್ಕೂ ಹೊಂದಾಣಿಕೆ ಆಗುವುದಿಲ್ಲವೇ? ನಿಮ್ಮ ಬಾಯಿಯಿಂದ ಸತ್ಯ ಮತ್ತು ವಾಸ್ತವತೆ ಹೊರಡುವುದೇ ಇಲ್ಲವೇ? ರಾಜ್ಯದ ಸಿಎಂ ಅಸಹಾಯಕರಲ್ಲ. ಸರಕಾರವೂ ಅಸಹಾಯಕವಲ್ಲ. ಬಿಎಸ್‌ವೈ ಮತ್ತು ತಂಡ ಮಾತ್ರ ಅಸಹನೆ, ಅಸತ್ಯ, ಅಧರ್ಮದ ದಾರಿಯಲ್ಲಿದೆ. ಪ್ರಜಾಪ್ರಭುತ್ವ ವಿರೋಧಿ ಆಪರೇಷನ್‌ ಕಮಲದ ಬಗ್ಗೆ ಚಕಾರವೆತ್ತಲಿಲ್ಲವೇಕೆ,'' ಎಂದು ಕೆಪಿಸಿಸಿ ಪ್ರಶ್ನಿಸಿದೆ.

ಬರ ಪರಿಹಾರದಲ್ಲಿ ತಾರತಮ್ಯ. ನರೇಗ ಹಣ ನೀಡುವುದರಲ್ಲಿ ವಿಳಂಬ. ಧಾರವಾಡ ಐಐಟಿ ಸ್ಥಾಪನೆಗೆ ರಾಜ್ಯ ಸರಕಾರ ನೀಡಿದ ಕೊಡುಗೆ ಕಡೆಗಣನೆ. ರಾಫೇಲ್‌ ಡೀಲ್‌ನಲ್ಲಿ ಎಚ್‌ಎಲ್‌ ನಿರ್ಲಕ್ಷ್ಯ. ರಾಜ್ಯಕ್ಕೆ ಮಾಡಿರುವ ಅನ್ಯಾಯದ ಪಟ್ಟಿಯನ್ನು ಒಂದೇ ಟ್ವೀಟ್‌ನಲ್ಲಿ ಹೇಳಲು ಸಾಧ್ಯವಿಲ್ಲ. ಇಷ್ಟೆಲ್ಲ ಇದ್ದರೂ ರಾಜ್ಯದ ಜನರನ್ನು ನೀವು ಹೇಗೆ ಎದುರಿಸುತ್ತೀರಿ?

-ಜಿ.ಪರಮೇಶ್ವರ್‌, ಡಿಸಿಎಂ

ಸೌಥ್‌ಇಂಡಿಯಫಾರ್‌ನಮೋ
ಬಿಜೆಪಿಯಿಂದ 'ಸೌಥ್‌ಇಂಡಿಯಫಾರ್‌ನಮೋ' ಅಭಿಯಾನ ನಡೆಸಲಾಯಿತು. ರಾಜ್ಯ ಬಿಜೆಪಿಯ ಟ್ವಿಟರ್‌ ಹ್ಯಾಂಡಲ್‌ನಿಂದ ಸರಣಿ ಟ್ವೀಟ್‌ಗಳನ್ನು ಮಾಡುವ ಮೂಲಕ ಮೋದಿ ಸರಕಾರದ ಕಾರ್ಯಕ್ರಮಗಳ ವಿವರ ಹಂಚಿಕೊಳ್ಳಲಾಯಿತು. ರಾಜ್ಯಕ್ಕೆ ಕೇಂದ್ರದ ಕೊಡುಗೆಯೂ ಬಗ್ಗೆಯೂ ಟ್ವೀಟ್‌ ಮಾಡಲಾಯಿತು. ಪಕ್ಷದ ಹಲವು ಮುಖಂಡರೂ ಇದನ್ನು ಅನುಸರಿಸಿ ಟ್ವೀಟ್‌ ಮಾಡಿದರು.