ಮಕ್ಕಳನ್ನು ಬಚಾವ್‌ ಮಾಡಿ ಸಿಡಿಲಿಗೆ ಬಲಿಯಾದ ತಾಯಿ

ಬಾದಾಮಿ: ಹೊಲದಲ್ಲಿ ಕೆಲಸ ಮಾಡುತ್ತಿದ್ದ ಮಹಿಳೆಯೊಬ್ಬರು ಸಿಡಿಲಿನ ಹೊಡೆತಕ್ಕೆ ಬಲಿಯಾಗಿದ್ದಾರೆ. ಅವರ ಜತೆಗೇ ಇದ್ದ ಪುಟ್ಟ ಮಕ್ಕಳಿಬ್ಬರು ಅದೃಷ್ಟವಶಾತ್‌ ಸಿಡಿಲಿಗೆ ಸಿಲುಕದೆ ಬಚಾವಾಗಿದ್ದಾರೆ.

ಬಾದಾಮಿ ತಾಲೂಕಿನ ಹೊಸೂರ ಗ್ರಾಮದ ಶಾಂತವ್ವ ಬೋವಿ (25) ಸಿಡಿಲಿಗೆ ಬಲಿಯಾದ ಮಹಿಳೆ. ಹೊಲದಲ್ಲಿಕೆಲಸ ಮಾಡುತ್ತಿದ್ದ ವೇಳೆ ಒಮ್ಮಿಂದೊಮ್ಮೆ ಗುಡುಗು ಸಿಡಿಲು ಅಬ್ಬರಿಸಲು ಆರಂಭವಾಯಿತು.

ಇದರಿಂದ ಅಪಾಯದ ಸುಳಿವು ಪಡೆದ ಶಾಂತವ್ವ ತಕ್ಷಣ ತನ್ನ ಜತೆಗಿದ್ದ 1 ವರ್ಷದ ಶ್ರಾವಣಿ ಮತ್ತು 4 ವರ್ಷದ ಸೃಷ್ಟಿಯನ್ನು ಬೇಗನೆ ಹೊಲದಿಂದ ಹೊರಡೋಣ ಎಂದು ಹೊರಡಿಸುತ್ತಾ ದೂರ ತಳ್ಳಿದರು ಎನ್ನಲಾಗಿದೆ.

ಅಷ್ಟು ಹೊತ್ತಿಗೆ ಸಿಡಿಲು ನೇರವಾಗಿ ಶಾಂತವ್ವಳಿಗೆ ಬಡಿದು ಮೃತಪಟ್ಟಿದ್ದಾರೆ. ಮಕ್ಕಳ ಕಿರುಚಾಟ ಕೇಳಿ ಅಕ್ಕಪಕ್ಕದಲ್ಲಿದ್ದವರು ಬಂದು ಮಕ್ಕಳನ್ನು ರಕ್ಷಿಸಿದರು. ಬಾದಾಮಿ ಪೊಲೀಸ್‌ ಠಾಣೆಯ ಪಿಎಸ್‌ಐ ಪ್ರಕಾಶ ಬಣಕಾರ ಸ್ಥಳಕ್ಕೆ ಧಾವಿಸಿ ತನಿಖೆ ಕೈಗೊಂಡಿದ್ದಾರೆ. ಪ್ರಕರಣ ದಾಖಲಾಗಿದೆ.