ಕೇಸರಿ ಶಾಲಿನಲ್ಲಿ ಮಿಂಚುತ್ತಿರುವ ಎಂಟಿಬಿ ನಾಗರಾಜ್‌

ಬೆಂಗಳೂರು: ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರ ಸಚಿವ ಸಂಪುಟದ ನೂತನ ಸಚಿವರ ಪ್ರಮಾಣ ವಚನ ಸಮಾರಂಭ ಬುಧವಾರ (ಆಗಸ್ಟ್‌ 4)ರಂದು ನಡೆಯಿತು.

ಈ ಸಮಾರಂಭದಲ್ಲಿ ಬಿಜೆಪಿಯ ಕಾರ್ಯಕರ್ತರಿಗಿಂತ ಹೆಚ್ಚಾಗಿ ಮಿಂಚಿದ್ದು ಕಾಂಗ್ರೆಸ್‌ ಪಕ್ಷದ ಮಾಜಿ ನಾಯಕ, ಬಿಜೆಪಿಗೆ ಸೇರ್ಪಡೆಯಾಗಿರುವ ಎಂಟಿಬಿ ನಾಗರಾಜ್‌.

ಎಂಟಿಬಿ ನಾಗರಾಜ್‌ ಅವರು ಕೇಸರಿ ಶಾಲು ಧರಿಸಿ ಇಡೀ ರಾಜಭವನದಲ್ಲಿ ಓಡಾಡಿಕೊಂಡಿದ್ದು ಕಂಡುಬಂತು.

ಬಿಜೆಪಿಯ ಹಲವು ನಾಯಕರು ಕೇಸರಿ ಶಾಲು ಧರಿಸಿರುವುದು ಸಾಮಾನ್ಯವಾಗಿತ್ತು. ಆದರೆ ಎಂಟಿಬಿ ನಾಗರಾಜ್‌ ಅವರು ಬಿಜೆಪಿ ಶಾಲು ಧರಿಸಿ ಮಿಂಚುತ್ತಿರುವುದನ್ನು ಕಂಡು ಬಿಜೆಪಿ ನಾಯಕರೇ ಅಚ್ಚರಿಪಟ್ಟರು.

ವಿಧಾನ ಪರಿಷತ್‌ ಸದಸ್ಯರಾಗಿರುವ ಎಂಟಿಬಿ ನಾಗರಾಜ್‌ ಅವರು ದೇವರ ಹೆಸರಿನಲ್ಲಿ ಪ್ರಮಾಣ ವಚನ ಸ್ವೀಕರಿಸಿದರು.

ಎಂಟಿಬಿ ನಾಗರಾಜ್‌ ಅವರ ನೂರಾರು ಅಭಿಮಾನಿಗಳು ರಾಜಭವನದ ಮುಂಭಾಗದಲ್ಲಿ ನೆರೆದಿದ್ದರು ಅಲ್ಲದೇ, ದೊಡ್ಡ ಪರದೆಯ ಮೇಲೆ ಕಂಡ ಪ್ರಮಾಣ ವಚನ ಸ್ವೀಕಾರ ಸಮಾರಂಭವನ್ನು ಕಣ್ತುಂಬಿಕೊಂಡು ಘೋಷಣೆಗಳನ್ನು ಕೂಗಿದರು.