ನೆಫ್ರೋ-ಯುರಾಲಜಿ ಸಂಸ್ಥೆ ನಿರ್ದೇಶಕರ ಬದಲಾವಣೆಗೆ ತಡೆ

ಬೆಂಗಳೂರು : ನೆಫ್ರೋ ಯುರಾಲಜಿ ಸಂಸ್ಥೆಯ ನಿರ್ದೇಶಕರಾಗಿದ್ದ ಡಾ.ಆರ್‌.ಕೇಶವಮೂರ್ತಿ ಅವರನ್ನು ಬದಲಿಸಿ ಆ ಜಾಗಕ್ಕೆ ಡಾ.ಎನ್‌.ಶಿವಲಿಂಗಯ್ಯ ಅವರನ್ನು ನಿರ್ದೇಶಕರನ್ನಾಗಿ ನೇಮಿಸಿ ಸರಕಾರ ಜೂ.20ರಂದು ಹೊರಡಿಸಿರುವ ಆದೇಶಕ್ಕೆ ಹೈಕೋರ್ಟ್‌ ತಡೆ ನೀಡಿದೆ.

ಕೇಶವಮೂರ್ತಿ ಸಲ್ಲಿಸಿದ್ದ ಅರ್ಜಿಯನ್ನು ಆಲಿಸಿದ ನ್ಯಾ.ಪಿ.ಬಿ.ಭಜಂತ್ರಿ ಅವರಿದ್ದ ಏಕಸದಸ್ಯಪೀಠ ಈ ಆದೇಶ ನೀಡಿ, ಎಲ್ಲ ಪ್ರತಿವಾದಿಗಳಿಗೆ ನೋಟಿಸ್‌ ಜಾರಿಗೊಳಿಸಿದೆ.

ನಿರ್ದೇಶಕ ಸ್ಥಾನದಿಂದ ತಮ್ಮನ್ನು ನಿಯಮಬಾಹಿರವಾಗಿ ಕೆಳಗಿಳಿಸಲಾಗಿದೆ. ಸರಕಾರ ಯಾವುದೇ ನಿಯಮಗಳನ್ನು ಪಾಲಿಸಿಲ್ಲ. ನಿರ್ದೇಶಕರ ನೇಮಕದಲ್ಲಿ ಸರಕಾರಕ್ಕೆ ಅಧಿಕಾರವಿಲ್ಲ, ಅಧಿಕಾರ ಇರುವುದು ಸಂಸ್ಥೆಯ ನಿರ್ದೇಶಕ ಮಂಡಳಿಗೆ ಮಾತ್ರ ಎಂದು ಕೇಶವಮೂರ್ತಿ ಹೇಳಿದ್ದಾರೆ.