ರಾಜ್ಯದಲ್ಲಿ ಹೊಸ ಮೊಬೈಟ್‌ ಟಾವರ್‌ ನೀತಿ

ಬೆಂಗಳೂರು : ರಾಜ್ಯದಲ್ಲಿ ಹೊಸ ಮೊಬೈಲ್‌ ಟವರ್‌ ನೀತಿ ತರುವ ಸಂಬಂಧ ಸರಕಾರ ಆದೇಶ ಹೊರಡಿಸಿದೆ. ಇದರಿಂದ ಬೊಕ್ಕಸಕ್ಕೆ ಹೆಚ್ಚುವರಿ ಆದಾಯ ನಿರೀಕ್ಷಿಸಲಾಗಿದೆ.

ಸುದ್ದಿಗೋಷ್ಠಿ ಉದ್ದೇಶಿಸಿ ಖಾಸಗಿ ಹೋಟಲ್‌ನಲ್ಲಿ ಗುರುವಾರ ಮಾತನಾಡಿದ ನಗರಾಭಿವೃದ್ಧಿ ಸಚಿವ ಯು.ಟಿ.ಖಾದರ್‌,'' ಈಗಾಗಲೇ ಮೊಬೈಲ್‌ ಟವರ್‌ ಹಾಕಿಕೊಂಡಿರುವ ಸಂಸ್ಥೆಗಳು ಹೊಸ ಮಾರ್ಗಸೂಚಿಯನ್ನು 3 ತಿಂಗಳಲ್ಲಿ ಅಳವಡಿಸಿಕೊಳ್ಳಬೇಕು ಎಂದು ತಿಳಿಸಿದರು.

''ಯಾವುದೇ ಮೊಬೈಲ್‌ ಟವರ್‌ಗಳು ಶಾಲಾ, ಕಾಲೇಜುಗಳಿಂದ 50 ಮೀಟರ್‌ ದೂರದಲ್ಲಿರಬೇಕು ಎಂಬ ನಿರ್ಬಂಧ ವಿಧಿಸಲಾಗುತ್ತಿದೆ. ಸದ್ಯಕ್ಕೆ ಇರುವ ಟವರ್‌ಗಳ ಸಂಬಂಧ ಸಮರ್ಪಕ ಮಾಹಿತಿಯೂ ಇಲ್ಲ. ಜತೆಗೆ ಆದಾಯವೂ ಸರಿಯಾಗಿ ಬರುತ್ತಿಲ್ಲ. ಹೊಸ ನೀತಿ ಈ ಸಮಸ್ಯೆ ಇತ್ಯರ್ಥ ಪಡಿಸಲಿದೆ. ಈ ನೀತಿ ತರಲು ಈಗಾಗಲೇ ಸರಕಾರಿ ಆದೇಶ ಹೊರಡಿಸಲಾಗಿದೆ,'' ಎಂದರು.


ಪ್ರಮುಖಾಂಶ

* 2ನೇ ಹಂತದ ನಗರಗಳಲ್ಲಿ ಪಾರ್ಕಿಂಗ್‌ ವ್ಯವಸ್ಥೆಗೆ ನಿಯಮ ತರಲಾಗುವುದು.

* ನಗರ ಸ್ಥಳೀಯ ಸಂಸ್ಥೆಗಳ ಆಸ್ತಿ ವರ್ಗಾವಣೆಗೆ ಇ-ಸ್ವತ್ತು ತಂತ್ರಾಂಶ ಅಳವಡಿಸಿಕೊಳ್ಳಲಾಗಿದ್ದು ಇದನ್ನು ಮನಪಾಗಳಿಗೂ ವಿಸ್ತರಿಸಲಾಗುವುದು.

* ನಗರ, ಪಟ್ಟಣದ ಕಟ್ಟಡಗಳ ಮೇಲೆ ಸೋಲಾರ್‌ ಪ್ಯಾನಲ್‌ ಅಳವಡಿಸಿಲು ಕಟ್ಟಡದ ಅನುಪಾತದಲ್ಲಿ (ಎಫ್‌ಎಆರ್‌) ವಿನಾಯಿತಿ.

* ವಾಯುಮಾಲಿನ್ಯ ನಿಯಂತ್ರಣಕ್ಕೆ ವಿದ್ಯುತ್‌ ಚಾಲಿತ ವಾಹನ, ರಿಕ್ಷಾಗಳಿಗೆ ಪ್ರೋತ್ಸಾಹಿಸಲು ನೀತಿ ತರಲಾಗುವುದು.

* ಕುಡಿಯುವ ನೀರಿಗೆ ಸಂಬಂಧಿಸಿದ ಡ್ಯಾಮ್‌ಗಳ ನಿರ್ವಹಣೆ ಮಾಡಲು ನಗರ ನೀರು ಸರಬರಾಜು ಮಂಡಳಿಗೆ ಸೂಚನೆ.

* ಒಳಚರಂಡಿ ಸೌಕರ್ಯದ ನಿರ್ವಹಣೆಯನ್ನೂ ಇಲಾಖೆ ಕೈಗೊಳ್ಳಲಿದೆ.

* ಒಳಚರಂಡಿಯಲ್ಲಿ ಸಂಗ್ರಹವಾದ ತ್ಯಾಜ್ಯ ಸಂಸ್ಕರಣೆಗೆ ಘಟಕ ನಿರ್ಮಿಸಲಾಗುವುದು.