ಮದುವೆ ನೋಂದಣಿ ಇನ್ನು ಆನ್‌ಲೈನ್‌ನಲ್ಲೇ ಲಭ್ಯ

ಬೆಂಗಳೂರು: ಮದುವೆ ನೋಂದಣಿ ಮಾಡಿಸಿಕೊಳ್ಳಬೇಕಾದವರು ಇನ್ನು ಮುಂದೆ ಉಪ ನೋಂದಣಿ ಕಚೇರಿಗೆ ಅಲೆಯಬೇಕಾಗಿಲ್ಲ. ಏಕೆಂದರೆ ಆನ್‌ ಲೈನ್‌ನಲ್ಲಿಯೇ ಮದುವೆ ಸರ್ಟಿಫಿಕೇಟ್‌ ದೊರೆಯಲಿದೆ.

ಕರ್ನಾಟಕ ಛಾಪಾ ಮತ್ತು ನೋಂದಣಿ ಇಲಾಖೆ ತಂತ್ರಜ್ಞಾನ ಬಳಕೆಗೆ ಮುಂದಾಗಿದ್ದು, ಪ್ರತ್ಯೇಕ ಪೋರ್ಟಲ್‌ವೊಂದನ್ನು ಆರಂಭಿಸಲು ತಯಾರಿ ನಡೆಸಿದೆ. ಇದರಿಂದ ಸರಕಾರಿ ಕಚೇರಿಗಳಿಗೆ ನಾಗರಿಕರು ಅಲೆಯುವುದು ತಪ್ಪುತ್ತದೆ.

ವಿವಾಹ ನೋಂದಣಿ ಸರ್ಟಿಫಿಕೇಟ್‌ ಪಡೆಯಲು ಈ ಹಿಂದೆ ಕಚೇರಿಗೆ ಅಲೆಯಬೇಕಾಗಿತ್ತು. ಈಗ ಹೊಸ ವ್ಯವಸ್ಥೆಯನ್ನು ಜಾರಿಗೆ ತರಲಾಗುತ್ತಿದ್ದು, ಬೆರಳ ತುದಿಯಲ್ಲಿಯೇ ಸರ್ಟಿಫಿಕೇಟ್‌ ಲಭ್ಯವಾಗಲಿದೆ ಎಂದು ಇಲಾಖೆ ಆಯುಕ್ತ ಮನೋಜ್‌ ಕುಮಾರ್‌ ತಿಳಿಸಿದ್ದಾರೆ.

ವಿಜಯ ಕರ್ನಾಟಕ ಸೋದರ ಸಂಸ್ಥೆ ಟೈಮ್ಸ್‌ ಆಫ್‌ ಇಂಡಿಯಾಗೆ ಆಯುಕ್ತರು ಮಾಹಿತಿ ನೀಡಿದ್ದಾರೆ.

ಪ್ರಾಯೋಗಿಕವಾಗಿ ಈ ಆನ್‌ಲೈನ್‌ ಸೇವೆಯನ್ನು ಬೆಂಗಳೂರಿನಲ್ಲಿ ಆರಂಭಿಸಲಾಗುವುದು, ನಂತರ ಇಡೀ ಕರ್ನಾಟಕಕ್ಕೆ ವಿಸ್ತರಿಸಲಾಗುವುದು ಎಂದು ಮನೋಜ್‌ ಕುಮಾರ್‌ ತಿಳಿಸಿದ್ದಾರೆ.

ಆಧಾರ್‌ ಕಾರ್ಡ್‌ ಜೋಡಣೆ ಸಹಿತ ಆನ್‌ಲೈನ್‌ ವಿವಾಹ ನೋಂದಣಿ ಸರ್ಟಿಫಿಕೇಟ್‌ ಪಡೆಯುವ ಸೇವೆ ಒದಗಿಸಲಾಗುತ್ತದೆ.

ಅದೇ ರೀತಿ ಮುಂದಿನ ದಿನಗಳಲ್ಲಿ ಜನನ ಹಾಗೂ ಮರಣ ಪ್ರಮಾಣ ಪತ್ರಗಳನ್ನು ಆನ್‌ಲೈನ್‌ನಲ್ಲಿಯೇ ಪಡೆಯುವ ಸೇವೆಯನ್ನೂ ಆರಂಭಿಸಲು ಇಲಾಖೆ ಮುಂದಾಗಿದೆ.

Now, get marriage certificate online