ನರ್ಸ್‌ಗಳ ವಿರುದ್ಧ ಕ್ರಮಕ್ಕೆ ಕೆಎಂಸಿಗೆ ಅಧಿಕಾರವಿಲ್ಲ

ಬೆಂಗಳೂರು: ವೈದ್ಯಕೀಯ ನಿರ್ಲಕ್ಷ್ಯಕ್ಕೆ ನರ್ಸ್‌ಗಳ ವಿರುದ್ಧ ಕ್ರಮ ಕೈಗೊಳ್ಳಲು ಕರ್ನಾಟಕ ವೈದ್ಯಕೀಯ ಮಂಡಳಿ(ಕೆಎಂಸಿ)ಗೆ ಯಾವುದೇ ಅಧಿಕಾರವಿಲ್ಲ. ನರ್ಸ್‌ಗಳನ್ನು ವೈದ್ಯಕೀಯ ವೃತ್ತಿಪರರು(ಮೆಡಿಕಲ್‌ ಪ್ರಾಕ್ಟೀಷನರ್ಸ್‌ )ಎಂಬ ಕೆಟಗರಿಗೆ ಸೇರಿಸಲಾಗದು ಎಂದು ಹೈಕೋರ್ಟ್‌ ಆದೇಶಿಸಿದೆ.

ಉಡುಪಿ ಜಿಲ್ಲೆಯ ಮಣಿಪಾಲದ ಕಸ್ತೂರ ಬಾ ವೈದ್ಯ ಕಾಲೇಜಿನ ಇಬ್ಬರು ಸಂಗೀತಾಶೆಟ್ಟಿ ಮತ್ತು ಸುಮಲತ ವಿರುದ್ಧ ಕ್ರಮಕ್ಕೆ ಕೆಎಂಸಿ ಆದೇ ಶ ನೀಡಿದ್ದನ್ನು ರದ್ದುಗೊಳಿಸಿರುವ ನ್ಯಾ.ಬಿ.ವೀರಪ್ಪ ಅವರಿದ್ದ ಏಕಸದಸ್ಯಪೀಠ ಈ ಆದೇಶ ನೀಡಿದೆ.

ನರ್ಸ್‌ಗಳ ವಿರುದ್ಧ ಕ್ರಮ ಕೈಗೊಳ್ಳುವುದು ಕೆಎಂಸಿ ವ್ಯಾಪ್ತಿಗೆ ಬರುವುದಿಲ್ಲ.ಯಾವುದೇ ಮೆಡಿಕಲ್‌ ಪ್ರಾಕ್ಟೀಷನರ್ಸ್‌ ನೋಂದಾಯಿಸಿಕೊಳ್ಳುವುದು ಕಡ್ಡಾಯ, ನೋಂದಾಯಿಸಿಕೊಳ್ಳದೆ ರಾಜ್ಯದಲ್ಲಿ ವೈದ್ಯಕೀಯ ವೃತ್ತಿಯನ್ನೇ ಕೈಗೊಳ್ಳುವಂತಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

''ಎಲ್ಲ ನರ್ಸ್‌ಗಳು ಆಸ್ಪತ್ರೆಗಳಲ್ಲಿ ಉತ್ತಮ ವೈದ್ಯ ಸೇವೆಯನ್ನು ನೀಡುವಂತೆ ನೋಡಿಕೊಳ್ಳುವುದು ಮತ್ತು ಅವರು ವೈದ್ಯಕೀಯ ವೃತ್ತಿ ಅತ್ಯಂತ ಪವಿತ್ರವಾದುದೆಂದು ಆದಕ್ಕೆ ತಕ್ಕಂತೆ ನಡೆದುಕೊಳ್ಳುವಂತೆ ನೋಡಿಕೊಳ್ಳುವುದು ಆ್ಪಸ್ಪತ್ರೆಗಳ ಮೆಡಿಕಲ್‌ ಸೂಪರಿಂಟೆಂಡೆಂಟ್‌ಗಳ ಕೆಲಸ''ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.

ನರ್ಸ್‌ಗಳಾದ ಸಂಗೀತಾಶೆಟ್ಟಿ ಮತ್ತು ಸಮಲತ ಅವರ ವಿರುದ್ಧ ಕ್ರಮಕ್ಕೆ 2012ರಲ್ಲಿ ಕೆಎಂಸಿ ನೀಡಿದ್ದ ನಿರ್ದೇಶನವನ್ನು ಹೈಕೋರ್ಟ್‌ ರದ್ದು ಮಾಡಿದೆ.

ಪ್ರಕರಣದ ಹಿನ್ನೆಲೆ: ಬೆಂಗಳೂರಿನ ವಾಸಿಗಳಾದ ಫಾತೀಮಾ ಬಿ 2010ರ ಅ.9ರಂದು ಮಣಿಪಾಲದ ಕಸ್ತೂರ ಬಾ ಆಸ್ಪತ್ರೆಯಲ್ಲಿ ನಿಧನ ಹೊಂದಿದರು. ಆಸ್ಪತ್ರೆ ಮತ್ತು ಸಿಬ್ಬಂದಿಗಳ ನಿರ್ಲಕ್ಷ್ಯದಿಂದಾಗಿ ತಾಯಿ ಸಾವನ್ನಪ್ಪಿದ್ದಾರೆಂದು ಫಾತಿಮಾ ಅವರ ಪುತ್ರ ಮೊಹಮದ್‌ ರಫಿ ಕೆಎಂಸಿಗೆ ದೂರು ನೀಡಿದ್ದರು. ಕೆಎಂಸಿ ವೈದ್ಯರ ತಪ್ಪಿಲ್ಲವೆಂದು ಹೇಳಿ ನರ್ಸ್‌ಗಳ ವಿರುದ್ಧ ಕ್ರಮಕ್ಕೆ ಆದೇಶ ನೀಡಿತ್ತು. ಅದನ್ನು ಅರ್ಜಿದಾರ ನರ್ಸ್‌ಗಳು ಪ್ರಶ್ನಿಸಿದ್ದರು.