ಆನ್‌ಲೈನ್‌ ಮೂಲಕ ಮದ್ಯ ಮಾರಾಟ ಅಕ್ರಮವೆಂದು ಹೈಕೋರ್ಟ್‌ ತೀರ್ಪು

ಬೆಂಗಳೂರು: ಆನ್‌ಲೈನ್‌ ಮೂಲಕ ಮದ್ಯ ಸರಬರಾಜಿಗೆ ಬೇಡಿಕೆ ಪಡೆದು ಅದನ್ನು ಗ್ರಾಹಕರಿಗೆ ಪೂರೈಕೆ ಮಾಡುವುದು ಅಕ್ರಮ ಮತ್ತು ಅದಕ್ಕೆ ಅಬಕಾರಿ ನಿಯಮಗಳಡಿ ಅವಕಾಶವೂ ಇಲ್ಲಎಂದು ಹೈಕೋರ್ಟ್‌ ಮಹತ್ವದ ತೀರ್ಪು ನೀಡಿದೆ.

ಡಿಜಿಟಲ್‌ ವಾಲೆಟ್‌ ಮೂಲಕ ಆನ್‌ಲೈನ್‌ ಲಿಕ್ಕರ್‌ ವೆಂಡಿಂಗ್‌ಗೆ ಅನುಮತಿ ಕೋರಿ ಚೆನ್ನೈ ಮೂಲದ ಹಿಪ್‌ ಬಾರ್‌ ಪ್ರೈವೆಟ್‌ ಲಿಮಿಟೆಡ್‌ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿರುವ ನ್ಯಾ.ಎಸ್‌. ಸುಜಾತ ಅವರಿದ್ದ ಏಕಸದಸ್ಯಪೀಠ ಈ ಆದೇಶ ನೀಡಿದೆ.

'' ಆನ್‌ಲೈನ್‌ ಆರ್ಡರ್‌ಗಳಿಂದ ಮಕ್ಕಳೂ ಸೇರಿದಂತೆ ಯುವಜನರು ಮದ್ಯಪಾನ ಸೇವನೆ ಪ್ರಚೋದನೆಗೆ ಒಳಗಾಗುವ ಅಪಾಯವಿದೆ''ಎಂದೂ ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.

''ಕರ್ನಾಟಕ ಅಬಕಾರಿ ಕಾಯಿದೆಯ ಪ್ರಕಾರ ಕೇವಲ ಲೈಸನ್ಸ್‌ ಹೊಂದಿರುವವರು ಮಾತ್ರ ನಿಗದಿತ ಸಮಯದಲ್ಲಿಮದ್ಯವನ್ನು ಮಾರಾಟ ಮಾಡಬಹುದಾಗಿದೆ.ಆದರೆ ಅರ್ಜಿದಾರರು ದಿನದ 24 ಗಂಟೆಯೂ ಆನ್‌ಲೈನ್‌ ಮೂಲಕ ವಹಿವಾಟು ನಡೆಸಬಹುದು, ಹಾಗಾಗಿ ಅದಕ್ಕೆ ಅನುಮತಿ ನೀಡಲಾಗದು,''ಎಂದು ಹೈಕೋರ್ಟ್‌ ಹೇಳಿದೆ.

''ಇ-ವಾಣಿಜ್ಯ ಉದ್ಯಮದಲ್ಲಿಬೇರೆ ಬೇರೆ ವಸ್ತುಗಳಂತೆ ಆನ್‌ಲೈನ್‌ ಮೂಲಕ ಮದ್ಯ ಮಾರಾಟಕ್ಕೆ ಹೋಲಿಸಲಾಗದು. 1965ರ ಅಬಕಾರಿ ನಿಯಮದಡಿ ಆನ್‌ಲೈನ್‌ ಮಾರಾಟಕ್ಕೆ ಅವಕಾಶವೂ ಇಲ್ಲವಾಗಿದೆ''ಎಂದೂ ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.

ಅರ್ಜಿದಾರರ ಪರ ಹಿರಿಯ ನ್ಯಾಯವಾದಿ ಪಿ.ಚಿದಂಬರಂ,''2017ರ ಆ.1ರಂದು ಆನ್‌ಲೈನ್‌ನಲ್ಲಿಮದ್ಯ ಮಾರಾಟಕ್ಕೆ ಅನುಮತಿ ನೀಡಲಾಗಿತ್ತು. ಆದರೆ ಯಾವುದೇ ನೋಟಿಸ್‌ ನೀಡದೆ ಅದನ್ನು ವಾಪಸ್‌ ಪಡೆಯಲಾಗಿದೆ,''ಎಂದು ಹೇಳಿದ್ದರು.

ಅಡ್ವೊಕೇಟ್‌ ಜನರಲ್‌ ಉದಯ್‌ ಹೊಳ್ಳ, ಅರ್ಜಿದಾರ ಕಂಪನಿ ಮದ್ಯ ವ್ಯಾಪಾರ ಮಾಡುವ ಯಾವುದೇ ಮೂಲಭೂತ ಹಕ್ಕು ಅಥವಾ ಲೈಸನ್ಸ್‌ ಹೊಂದಿಲ್ಲ ಮತ್ತು ಕರ್ನಾಟಕ ಅಬಕಾರಿ ಕಾಯಿದೆಯ ನಿಯಮಗಳಲ್ಲಿಪೂರ್ವ ಪಾವತಿ ಸಾಧನಗಳನ್ನು ಬಳಸಿ ಆನ್‌ಲೈನ್‌ ಮೂಲಕ ವಹಿವಾಟು ನಡೆಸಲು ಯಾವುದೇ ಅವಕಾಶವಿಲ್ಲ. ಕಂಪನಿ ಸಿಎಲ್‌-2 ಲೈಸನ್ಸ್‌ದಾರರಿಂದ ಮದ್ಯ ಖರೀದಿಸಿ ಅದನ್ನು ಗ್ರಾಹಕರಿಗೆ ತಲುಪಿಸಿದರೆ, ಅದು ಮಾರಾಟವಾಗುತ್ತದೆ, ಅದಕ್ಕೆ ಕಂಪನಿ ಲಾಭ ಪಡೆಯುತ್ತದೆ ಎಂದು ಸರಕಾರದ ನಿಲುವನ್ನು ಸಮರ್ಥಿಸಿಕೊಂಡಿದ್ದರು.