ಜನ್ಮ ನೀಡಿದವರಿಗೆ ಕೋವಿಡ್-19:‌ ಹೆತ್ತವರನ್ನು ನೋಡುವ ಮೊದಲೇ ಅನಾಥವಾಗಿ ಅಂತ್ಯಸಂಸ್ಕಾರವಾಯಿತು ಕಂದಮ್ಮ

ಬೆಂಗಳೂರು: ಕೊರೊನಾ ಮಹಾಮಾರಿಯಿಂದಾಗಿ ಅವಧಿಗೆ ಮುನ್ನ ಜನಿಸಿದ 17 ದಿನದ ಮಗು ನಗರದ ಆಸ್ಪತ್ರೆಯೊಂದರಲ್ಲಿ ಮೃತಪಟ್ಟಿದೆ. ಇದೇ ವೇಳೆ ಸೋಂಕಿತರಾದ ಹೆತ್ತವರು ಮಗುವಿನ ಅಂತ್ಯಸಂಸ್ಕಾರದಲ್ಲೂ ಪಾಲ್ಗೊಳ್ಳಲಾಗದ ದಾರುಣ ಪರಿಸ್ಥಿತಿಗೆ ಸಿಲುಕಿದರು. ಅಂತಿಮವಾಗಿ ಪಾಲಿಕೆ ಚಿತಾಗಾರದ ಸಿಬ್ಬಂದಿಯೇ ಅಂತ್ಯಸಂಸ್ಕಾರವನ್ನು ನೆರವೇರಿಸಬೇಕಾಯಿತು.

ಕೊರೊನಾ ಸೃಷ್ಟಿಸಿದ ಹೃದಯ ವಿದ್ರಾವಿಕ ಘಟನೆಗಳ ಸರಣಿಗೆ ಈ ಪ್ರಕರಣವೂ ಸೇರ್ಪಡೆಯಾಗಿದೆ. ಬೆಳ್ಳಂದೂರಿನ ದಂಪತಿಗೆ ಅವಧಿಗೆ ಮನ್ನವೇ ಜನಿಸಿದ್ದ ಶಿಶುವನ್ನು ಅಲ್ಲಿನ ಖಾಸಗಿ ಆಸ್ಪತ್ರೆಯಲ್ಲಿಆರೈಕೆ ಮಾಡಲಾಗುತ್ತಿತ್ತು. ಪಾಲಕರಿಬ್ಬರಿಗೂ ಕೊರೊನಾ ಸೋಂಕು ತಗಲಿದ್ದರಿಂದ ಆಸ್ಪತ್ರೆ ಸೇರಿದ್ದರು. ಶಿಶುವಿಗೆ ಕೂಡ ಸೋಂಕು ಇರುವುದು ಖಚಿತವಾಗಿತ್ತು.

ಜನಿಸಿದಾಗಲೇ ಶಿಶು ಅನಾರೋಗ್ಯದಿಂದ ಬಳಲುತ್ತಿದ್ದು, ಅತಿ ಕಡಿಮೆ ತೂಕ ಹೊಂದಿತ್ತು. 17 ದಿನಗಳ ಕಾಲ ಆಸ್ಪತ್ರೆಯಲ್ಲೇ ಇದ್ದ ಶಿಶುವು ಜು.1 ರಂದು ಕೊನೆಯುಸಿರೆಳೆಯಿತು. ಮಗುವಿನ ಸಾವಿನ ಸುದ್ದಿ ತಿಳಿದರೂ ಸೋಂಕಿತರಾದ ಪಾಲಕರಿಗೆ ಬಂದು ನೋಡಲಾಗಲಿಲ್ಲ, ಆಸ್ಪತ್ರೆಯಲ್ಲೇ ಉಳಿಯಬೇಕಾಯಿತು. ಅದೇ ದಿನ ಸಂಜೆ 6.30 ಗಂಟೆಗೆ ಶಿಶುವನ್ನು ಆಂಬ್ಯುಲೆನ್ಸ್‌ನಲ್ಲಿ ಚಿತಾಗಾರಕ್ಕೆ ಕರೆತರಲಾಯಿತು.

''ಸಂಜೆಯಾಗಿದ್ದರಿಂದ ಚಿತಾಗಾರ ಮುಚ್ಚಲು ಸಿದ್ಧತೆ ಮಾಡಿಕೊಳ್ಳಲಾಗಿತ್ತು. ಆದರೆ ಆ ಕ್ಷಣದಲ್ಲಿ ಆಂಬ್ಯುಲೆನ್ಸ್‌ ಚಾಲಕ ಮೊಬೈಲ್‌ ಕರೆ ಮಾಡಿ, ಶಿಶುವಿನ ಹೆಣ ಇದೆ ಎಂದು ಹೇಳಿದ. ಈ ಮಾತನ್ನು ಕೇಳಿಯೇ ಕಣ್ಣೀರು ಬಂತು. ಹೀಗಾಗಿ ಚಿತಾಗಾರವನ್ನು ಮುಚ್ಚದೆ ಕಾದೆವು,'' ಎಂದು ಚಿತಾಗಾರದ ನಿರ್ವಹಣೆ ಮಾಡುತ್ತಿರುವ ರಾಜು ವಿವರಿಸಿದರು.

''ಪ್ರತಿ ದಿನ ಕೊರೊನಾದಿಂದ ಮೃತರಾದ ಐದಾರು ಶರೀರಗಳನ್ನು ಸುಡುತ್ತೇವೆ. ಆದರೆ ಎಂದಿಗೂ ಇಷ್ಟೊಂದು ದುಃಖ ಉಂಟಾಗಿರಲಿಲ್ಲ. ಆಂಬ್ಯುಲೆನ್ಸ್‌ ಬಂದಾಗ ಶಿಶುವನ್ನು ನಾವೇ ಎತ್ತಿಕೊಂಡು ಚಿತಾಗಾರಕ್ಕೆ ಸೇರಿಸಿದೆವು. ಶವ ದಹನಕ್ಕೆ 250 ರೂ. ನೀಡಲು ಚಾಲಕ ಮುಂದೆ ಬಂದ. ಆದರೆ, ಅದನ್ನು ನಾವು ಸ್ವೀಕರಿಸಲಿಲ್ಲ. ಆ ಹಣವನ್ನು ನಾವೇ ಭರಿಸಿದ್ದೇವೆ. ಶವ ದಹನ ಮಾಡುವಾಗ ಎಲ್ಲ ಸಿಬ್ಬಂದಿ ಕಣ್ಣೀರಾಗಿದ್ದೆವು,'' ಎಂದು ಅಂದಿನ ಘಟನೆ ಬಗ್ಗೆ ರಾಜು ವಿವರಿಸಿದರು.