ಪೊಲೀಸ್ ಇಲಾಖೆಯಲ್ಲಿ ಫೋನ್‌ ಕದ್ದಾಲಿಕೆ ಸದ್ದು: ತನಿಖೆಗೆ ಆದೇಶ

ಬೆಂಗಳೂರು: ಪೊಲೀಸ್‌ ಕಮೀಷನರ್‌ ಹುದ್ದೆಗೇರುವ ಮುನ್ನ ಭಾಸ್ಕರ್‌ ರಾವ್‌ ಅವರ ಫೋನ್‌ ಕದ್ದು ಆಲಿಸಿರುವ ಸಂಬಂಧ ತನಿಖೆಗೆ ಆದೇಶಿಸಲಾಗಿದೆ.

ತಮ್ಮ ಫೋನ್‌ ಕದ್ದಾಲಿಕೆ ಸಂಬಂಧ ಬುಧವಾರವೇ ರಾಜ್ಯ ಪೊಲೀಸ್‌ ಮಹಾ ನಿರ್ದೇಶಕಿ ನೀಲಮಣಿ ಎನ್‌ ರಾಜು ಅವರಿಗೆ ದೂರು ನೀಡಿರುವ ಭಾಸ್ಕರ್‌ ರಾವ್‌ ಅಪರಾಧ ವಿಭಾಗದ ಹೆಚ್ಚುವರಿ ಆಯುಕ್ತ ಸಂದೀಪ್‌ ಪಾಟೀಲ್‌ ಅವರಿಗೆ ತನಿಖೆಯ ಹೊಣೆ ವಹಿಸಲಾಗಿದೆ. ಆದಷ್ಟು ಬೇಗ ತನಿಖೆ ನಡೆಸಿ ವರದಿ ನೀಡುವಂತೆ ಸೂಚಿಸಲಾಗಿದೆ.

ವಂಚನೆ ಪ್ರಕರಣವೊಂದರಲ್ಲಿ ಸಿಸಿಬಿ ಪೊಲೀಸರಿಗೆ ಬೇಕಾಗಿದ್ದ ಫರಾಜ್‌ ಎಂಬ ಆರೋಪಿಯ ಫೋನನ್ನು ಟ್ಯಾಪ್‌ ಮಾಡಲಾಗಿತ್ತು. ಆ ವೇಳೆ ಆತ ಹಿಂದಿನ ಕೆಎಸ್‌ಆರ್‌ಪಿ ಎಡಿಜಿಪಿ ಆಗಿದ್ದ ಭಾಸ್ಕರ್‌ ರಾವ್‌ ಅವರಿಗೆ ಕರೆ ಮಾಡಿದ್ದ. ಈ ಫೋನ್‌ ಸಂಭಾಷಣೆಯನ್ನು ಕಾನೂನಿಗೆ ವಿರುದ್ಧವಾಗಿ ಬಹಿರಂಗಪಡಿಸಲಾಗಿದೆ. ಭಾಸ್ಕರ್‌ ರಾವ್‌ ಅವರ ಸಂಭಾಷಣೆಯನ್ನು ನಿಯಮ ಬಾಹಿರವಾಗಿ ಕದ್ದು ಆಲಿಸಿದ್ದಲ್ಲದೆ ಈ ಸಂಭಾಷಣೆಯ ತುಣುಕನ್ನು ದುರ್ಬಳಕೆ ಮಾಡಿಕೊಳ್ಳಲಾಗಿದೆ ಎಂದು ಭಾಸ್ಕರ್‌ ರಾವ್‌ ದೂರು ನೀಡಿದ್ದಾರೆ ಎಂದು ತಿಳಿದು ಬಂದಿದೆ.