ಶೀರೂರು ಶ್ರೀ ಶಂಕಾಸ್ಪದ ಸಾವು: ಮೂಲ ಮಠ ಪರಿಶೀಲನೆ, ಡಿವಿಆರ್‌ ಕಳುವಾಗಿಲ್ಲ ಎಂದು ಪೊಲೀಸರು

ಉಡುಪಿ: ಶೀರೂರು ಶ್ರೀಲಕ್ಷ್ಮೀವರ ತೀರ್ಥ ಶ್ರೀಪಾದರ ಸಂಶಯಾಸ್ಪದ ಸಾವಿನ ಹಿನ್ನೆಲೆಯಲ್ಲಿ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಲಕ್ಷ್ಮಣ ಬ. ನಿಂಬರಗಿ ಹಿರಿಯಡ್ಕ ಸಮೀಪದ ಶೀರೂರು ಮೂಲ ಮಠಕ್ಕೆ ಸೋಮವಾರ ತೆರಳಿ ಪರಿಶೀಲನೆ ನಡೆಸಿದ್ದಾರೆ.

ಪೊಲೀಸ್ ಸುಪರ್ದಿಯಲ್ಲಿರುವ ಮೂಲ ಮಠಕ್ಕೆ ಭೇಟಿ ನೀಡಿದ ಎಸ್ಪಿ ಮಠದ ಕೋಣೆ ಹೊರಂಗಣ, ಶ್ರೀಗಳ ವೃಂದಾವನ ಸ್ಥಳದಲ್ಲಿ ಪರಿಶೀಲನೆ ನಡೆಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಅಧಿಕಾರಿಗಳು ಭೇಟಿಯ ವೇಳೆ ಸಿಕ್ಕಿರುವ ಮಾಹಿತಿ, ದಿಢೀರ್ ಭೇಟಿಯ ಕಾರಣ ಇತ್ಯಾದಿಗಳ ಬಗ್ಗೆ ಮಾಹಿತಿ ತಿಳಿಸಲು ಪೊಲೀಸ್‌ ಅಧಿಕಾರಿಗಳು ನಿರಾಕರಿಸಿದ್ದಾರೆ. ಆದರೆ ಎಸ್ಪಿ ಭೇಟಿ ಬಗ್ಗೆ ಹಿರಿಯ ಅಧಿಕಾರಿಗಳೇ ಸ್ಪಷ್ಟ ಪಡಿಸಿದ್ದಾರೆ.

ತನಿಖೆ ಹಿನ್ನೆಲೆಯಲ್ಲಿ ಯಾರು ಪುತ್ತೂರಿಗೂ ಹೋಗಿಲ್ಲ. ಸುಳ್ಯಕ್ಕೂ ಹೋಗಿಲ್ಲ. ಇದೆಲ್ಲ ಮಾಧ್ಯಮ ಸೃಷ್ಟಿ ವರದಿ. ವರದಿಗೂ ಒಂದು ನಿರ್ದಿಷ್ಟ ಮೂಲಬೇಕು. ಮನಸ್ಸಿಗೆ ಬಂದಂತೆ ವರದಿ ಮಾಡುವುದು ಸಮಂಜಸವಲ್ಲ. ತನಿಖೆ ನಡೆಯುತ್ತಿದೆ. ಈಗ ಯಾವುದನ್ನು ಹೇಳಲು ಸಾಧ್ಯವಿಲ್ಲ. ಆರೋಪಿಗಳ ಹುಡುಕಾಟ ನಡೆಯುತ್ತಿದೆ. ಡಿವಿಆರ್ ನಾಪತ್ತೆಯಾಗಿರುವ ವರದಿಯೂ ಆಗಿಲ್ಲ. ಉಡುಪಿ ಮೂಲದ ಮಹಿಳೆ ತಪ್ಪೊಪ್ಪಿಕೊಂಡಿದ್ದಾಳೆ ಎನ್ನುವ ವರದಿಯೂ ಸತ್ಯಕ್ಕೆ ದೂರವಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ಸ್ಪಷ್ಟೀಕರಣ ನೀಡಿದ್ದಾರೆ.