ಪೊಲೀಸರ ‘ಫೋನ್‌ಇನ್‌’ಗೆ ಮಂಗಳೂರಿಗರ ಸ್ಪಂದನೆ

ವಿಕ ಕಾರ್ಯಕ್ರಮದಿಂದ ಪ್ರೇರಣೆ

ಮಂಗಳೂರು: ಪೊಲೀಸ್‌ ಇಲಾಖೆಯನ್ನು ಮತ್ತಷ್ಟು ಜನಸ್ನೇಹಿಯಾಗಿಸಲು ಮಂಗಳೂರು ಪೊಲೀಸ್‌ ಕಮಿಷನರೇಟ್‌ ವ್ಯಾಪ್ತಿಯಲ್ಲಿ ಹಮ್ಮಿಕೊಂಡ ಪೊಲೀಸ್‌ ‘ನೇರ ಫೋನ್‌-ಇನ್‌’ ಕಾರ‍್ಯಕ್ರಮಕ್ಕೆ ಸಾರ್ವಜನಿಕ ಉತ್ತಮ ಸ್ಪಂದನೆ ಸಿಕ್ಕಿದ್ದು, ಯಶಸ್ವಿಯಾಗಿ ಮೂಡಿಬಂತು.

ಬೆಳಗ್ಗೆ ಒಂದು ಗಂಟೆ ನಡೆದ ಕಾರ್ಯಕ್ರಮದಲ್ಲಿ ಎಡೆಬಿಡದೆ ಕರೆಗಳು ಬಂದವು. ಪೊಲೀಸ್‌ ಕಮಿಷನರ್‌ ಚಂದ್ರಶೇಖರ್‌, ಡಿಸಿಪಿ ಡಾ. ಸಂಜೀವ್‌ ಪಾಟೀಲ್‌ ಕರೆಗೆ ಸಾರ್ವಜನಿಕರ ಸಮಸ್ಯೆಗಳಿಗೆ ಸಾವಧಾನವಾಗಿ ಉತ್ತರಿಸಿದರು.

ಕೆಲವು ನಗರದ ಸಮಸ್ಯೆಯಾದರೆ, ಕೆಲವು ಅಮೂಲ್ಯ ಮಾಹಿತಿಗಳೂ ಇದ್ದವು. ಟ್ರಾಫಿಕ್‌, ಸ್ಕಿಲ್‌ಗೇಂ, ಗಾಂಜಾ, ಮಾದಕ ವಸ್ತುಗಳಿಗೆ ಸಂಬಂಧಿಸಿದ ಪ್ರಕರಣ ಸೇರಿದಂತೆ ಬಹುತೇಕ ಸಮಸ್ಯೆಗಳನ್ನು ಜನ ತೆರೆದಿಟ್ಟರು. ಪೊಲೀಸ್‌ ಕಮಿಷನರೇಟ್‌ ವ್ಯಾಪ್ತಿ ಮಾತ್ರವಲ್ಲದೆ ಹೊರ ಜಿಲ್ಲೆಗಳಿಂದಲೂ ಕರೆ ಬಂದಿದ್ದವು. ಕೆಲವು ಪೊಲೀಸ್‌ ಇಲಾಖೆ ಮಾತ್ರವಲ್ಲದೆ ಅನ್ಯ ಇಲಾಖೆಗೆ ಸಂಬಂಧಿಸಿದ್ದ ದೂರುಗಳಿದ್ದವು.

ಇತ್ತೀಚೆಗೆ ವಿಜಯ ಕರ್ನಾಟಕ ಕಚೇರಿಯಲ್ಲಿ ನಡೆದ ಫೋನ್‌ ಇನ್‌ ಕಾರ‍್ಯಕ್ರಮದಲ್ಲಿ ಪೊಲೀಸ್‌ ಕಮಿಷನರ್‌ ಪಾಲ್ಗೊಂಡಿದ್ದರು. ಆಗ ಜನರ ಸ್ಪಂದನೆ ನೋಡಿ ತಮ್ಮ ಇಲಾಖೆಯಿಂದಲೂ ಇಂತಹ ಕಾರ‍್ಯಕ್ರಮ ಮಾಡಲು ಮುಂದಾಗಿದ್ದರು. ಇದಕ್ಕಾಗಿ ವಿಕ ಮಂಗಳೂರು ಕಚೇರಿಗೆ ಪೊಲೀಸ್‌ ಸಿಬ್ಬಂದಿ ಆಗಮಿಸಿ ಫೋನ್‌ಇನ್‌ ಕಾರ‍್ಯಕ್ರಮ ಆಯೋಜಿಸುವ ಸಿದ್ಧತೆ ಕುರಿತು ಚರ್ಚಿಸಿದ್ದರು.

ಹೊಸ ಐಡಿಯಾ ಸಿಕ್ಕಿದೆ

ಫೋನ್‌-ಇನ್‌ ಕಾರ‍್ಯಕ್ರಮ ನಿಜಕ್ಕೂ ತುಂಬಾ ಖುಷಿಕೊಟ್ಟಿದೆ. ಎಲ್ಲ ವರ್ಗದ ಜನರನ್ನು ಸುಲಭದಲ್ಲಿ ತಲುಪಬಲ್ಲ ಮತ್ತು ತಳಮಟ್ಟದ ಸಮಸ್ಯೆಗಳನ್ನು ಅರಿತುಕೊಳ್ಳಲು ಈ ಕಾರ‍್ಯಕ್ರಮ ಸಹಕಾರಿಯಾಗಿದೆ. ಈ ಮುಖೇನ ಇಲಾಖೆಯ ಕಾರ್ಯವೈಖರಿಯನ್ನು ಮತ್ತಷ್ಟು ಚುರುಕುಗೊಳಿಸಲು ‘ಹೊಸ ಐಡಿಯಾ’ ಸಿಕ್ಕಂತಾಗಿದೆ. ಟ್ರಾಫಿಕ್‌, ಗಾಂಜಾ, ಮಟ್ಕಾ ಸೇರಿದಂತೆ ನಗರದ ಹಲವು ಸಮಸ್ಯೆಗಳನ್ನು ಸಾರ್ವಜನಿಕರು ತೆರೆದಿಟ್ಟರು. ಈ ಕಾರ್ಯಕ್ರಮವನ್ನು ಮುಂದಿನ ದಿನಗಳಲ್ಲಿ ಮತ್ತಷ್ಟು ಪರಿಣಾಮಕಾರಿಯಾಗಿ ನಡೆಸಲಾಗುವುದು.

-ಚಂದ್ರಶೇಖರ್‌, ಪೊಲೀಸ್‌ ಕಮಿಷನರ್‌, ಮಂಗಳೂರು