ಬೆಂಗಳೂರು: ರಾಜ್ಯದಲ್ಲಿ ಕೊರೊನಾ ನಿಯಂತ್ರಣಕ್ಕೆ ಖರೀದಿಸಲಾದ ಸಾಮಗ್ರಿಗಳು ಹಾಗೂ ಎಸ್‌ಡಿಆರ್‌ಎಫ್‌ ಹಣ ವೆಚ್ಚದ ಬಗ್ಗೆ 15 ದಿನಗಳ ಒಳಗೆ ವಿಶೇಷ ಆಡಿಟ್‌ ನಡೆಸುವಂತೆ ಸಾರ್ವಜನಿಕ ಲೆಕ್ಕ ಪತ್ರ ಸಮಿತಿ (ಪಿಎಸಿ)ಯು ಸಿಎಜಿಗೆ ಸೂಚನೆ ನೀಡಿದೆ.

ಲೆಕ್ಕ ಪತ್ರ ಸಮಿತಿ ಅಧ್ಯಕ್ಷರಾದ ಎಚ್‌.ಕೆ.ಪಾಟೀಲ್‌ ಅವರು ಈ ಸಂಬಂಧ ಸಿಎಜಿಗೆ ಪತ್ರ ಬರೆದಿದ್ದು ವಿಶೇಷ ಆಡಿಟ್‌ ನಡೆಸಲು ಅಗತ್ಯ ಸಿಬ್ಬಂದಿ ನಿಯೋಜಿಸುವಂತೆಯೂ ಸೂಚಿಸಿದ್ದಾರೆ. ಒಟ್ಟು 23 ಅಂಶಗಳ ಬಗ್ಗೆ ವಿಶೇಷ ಆಡಿಟ್‌ ನಡೆಸಬೇಕೆಂದು ಕೋರಿದ್ದಾರೆ.

ಪಿಪಿಇ ಕಿಟ್‌ಗಳ ಗುಣಮಟ್ಟ, ಖರೀದಿ ದಾಸ್ತಾನು, ಪೂರೈಕೆಯಾದ ಒಟ್ಟು ಸಂಖ್ಯೆ, ಡೆಲಿವರಿ ಚಲನ್‌ ಮತ್ತು ದಾಸ್ತಾನಿಗೆ ತಾಳೆ ಹಾಕಿ ಪ್ರಮಾಣೀಕರಿಸಿದವರು ಯಾರು? ಪಿಪಿಇ ಕಿಟ್‌ಗಳ ಗಾತ್ರ, ಅಳತೆ ಮತ್ತು ಗುಣಮಟ್ಟ ಹಾಗೂ ಸುರಕ್ಷತೆ ಮಾನದಂಡಗಳ ಪರಿಶೀಲನೆಗೆ ಯಾವ ಸಂಸ್ಥೆ ನಿಗದಿಪಡಿಸಲಾಗಿದೆ, ಬಳಕೆಗೆ ಯೋಗ್ಯವಲ್ಲದ ಕಿಟ್‌ಗಳ ಬಳಕೆಗೆ ಯಾವ ಅಧಿಕಾರಿ ಸೂಚಿಸಿದ್ದರು? ಎಂಬುದರ ಬಗ್ಗೆ ತನಿಖೆಗೆ ಸೂಚಿಸಿದ್ದಾರೆ.

ಕೊರೊನಾ ಸೋಂಕಿತರಿಗೆ ಚಿಕಿತ್ಸೆ ನಿರಾಕರಿಸುವವರನ್ನು ಬಂಧಿಸಿ - ಮಾನವ ಹಕ್ಕುಗಳ ಆಯೋಗ ಆದೇಶ

ಜೊತೆಗೆ, ಸ್ಯಾನಿಟೈಸರ್‌ ಪೂರೈಕೆ ಸಂಬಂಧ ಯಾವುದಾದರೂ ಪ್ರಯೋಗಾಲಯದಿಂದ ಕಳಪೆ ಮಟ್ಟ ಅಥವಾ ಗುಣಮಟ್ಟದಿಂದ ಕೂಡಿಲ್ಲದ ಸ್ಯಾನಿಟೈಸರ್‌ ಎಂಬ ಪ್ರಯೋಗಾಲಯ / ಔಷಧಿ ನಿಯಂತ್ರಣ ಪ್ರಾಧಿಕಾರಗಳಿಂದ ವರದಿ ಬಂದಿದೆಯೇ? ವೆಂಟಿಲೇಟರ್‌ಗಳ ಖರೀದಿ, ಅವುಗಳ ಗುಣಮಟ್ಟ, ಸಿರಿಂಜ್‌ ಉಪಕರಣಗಳ ಖರೀದಿ ಸೇರಿದಂತೆ ಒಟ್ಟಾರೆ ಖರೀದಿ, ಗುಣಮಟ್ಟದ ಅಂಶಗಳನ್ನು ಮುಂದಿಟ್ಟುಕೊಂಡು ಆಡಿಟ್‌ಗೆ ಆದೇಶ ನೀಡಲಾಗಿದೆ.