ಆಸ್ಪತ್ರೆಗಳಿಗೆ ಗುಣಮಟ್ಟ ಪರೀಕ್ಷಿಸದೆ ಔಷಧಗಳ ಪೂರೈಕೆ: ಸಿಎಜಿ ವರದಿಯಿಂದ ಬೆಳಕಿಗೆ

ಬೆಂಗಳೂರು: ಗುಣಮಟ್ಟ ಕಾಯ್ದುಕೊಳ್ಳದ ಔಷಧಗಳನ್ನು ಪರೀಕ್ಷೆ ನಡೆಸದೆಯೇ ಖರೀದಿಸಿ ಸರಕಾರ ಆಸ್ಪತ್ರೆಗಳಿಗೆ ಪೂರೈಸಿರುವ 'ಕರ್ನಾಟಕ ಸ್ಟೇಟ್‌ ಡ್ರಗ್ಸ್‌ ಲಾಜಿಸ್ಟಿಕ್‌ ಆ್ಯಂಡ್‌ ವೇರ್‌ ಔಸಿಂಗ್‌ ಸೊಸೈಟಿ' ಲೋಪ ಎಸಗಿರುವುದನ್ನು ಭಾರತೀಯ ಲೆಕ್ಕ ಪರಿಶೋಧಕರ ವರದಿ(ಸಿಎಜಿ) ಯಿಂದ ಬಹಿರಂಗವಾಗಿದೆ.

2017ರ ಮಾರ್ಚ್‌ಗೆ ಕೊನೆಗೊಂಡಂತೆ ಸಿಎಜಿಯ 2ನೇ ವರದಿಯಲ್ಲಿ ಲೋಪ ಪತ್ತೆ ಹಚ್ಚಲಾಗಿದೆ. ಈ ವರದಿ ಆಧರಿಸಿ ವಕೀಲರೊಬ್ಬರು ಹಿಂದಿನ ಆರೋಗ್ಯ ಸಚಿವರಾದ ರಮೇಶ್‌ ಕುಮಾರ್‌ ಹಾಗೂ ಯು.ಟಿ.ಖಾದರ್‌ ವಿರುದ್ಧ ಲೋಕಾಯುಕ್ತಕ್ಕೆ ದೂರು ನೀಡಿದ್ದಾರೆ. ದೂರಿನ ಕುರಿತು ಪರಿಶೀಲನೆ ನಡೆದಿದೆ ಎಂದು ಲೋಕಾಯುಕ್ತ ಮೂಲಗಳು ತಿಳಿಸಿವೆ.

ಸರಕಾರದ ಆರೋಗ್ಯ ಸಂಸ್ಥೆಗಳಿಗೆ ಸಮರ್ಥ ಮತ್ತು ಉತ್ತಮ ಗುಣಮಟ್ಟದ ಔಷಧ, ರಸಾಯನಿಕಗಳು, ಸಲಕರಣೆ, ಉಪಕರಣಗಳನ್ನು ಪೂರೈಸುವ ಕೆಲಸವನ್ನು ಸೊಸೈಟಿ ಮಾಡುತ್ತದೆ. ಆದರೆ, 2014-15ರಿಂದ 2016-17ರ ನಡುವೆ ಸೊಸೈಟಿಯು 535.22 ಕೋಟಿ ರೂ. ಮೌಲ್ಯದ 14,209 ಬ್ಯಾಚ್‌ಗಳಲ್ಲಿ 1,110 ಮಾದರಿಯ ಔಷಧಗಳನ್ನು ಖರೀದಿಸಿತ್ತು. ಪೂರೈಕೆಯಾಗುವ ಪ್ರತಿ ಬ್ಯಾಚ್‌ ಔಷಧಗಳನ್ನು ಸೊಸೈಟಿ ವತಿಯಿಂದ ಗುಣಮಟ್ಟ ಪರೀಕ್ಷೆಗೆ ಒಳಪಡಿಸಬೇಕು. ಅದಕ್ಕಾಗಿ ಬ್ಯಾಚ್‌ಗಳಿಂದ ಕೆಲವು ಸ್ಯಾಂಪಲ್‌ಗಳನ್ನು ಪರೀಕ್ಷೆಗೆ ಕಳುಹಿಸಬೇಕು.

ಮೂರು ವರ್ಷಗಳ ಅವಧಿಯಲ್ಲಿ ಪೂರೈಕೆಯಾಗಿದ್ದ 14,209 ಬ್ಯಾಚ್‌ಗಳ ಪೈಕಿ 6,776 (ಶೇ.48) ಬ್ಯಾಚ್‌ಗಳನ್ನು ಮಾತ್ರ ಲ್ಯಾಬ್‌ಗೆ ಕಳುಹಿಸಲಾಗಿದೆ. ಉಳಿದ 7,433 ಬ್ಯಾಚ್‌ ಔಷಧಗಳನ್ನು ಗುಣಮಟ್ಟ ಪರೀಕ್ಷೆಗೆ ಒಳಪಡಿಸಲಿಲ್ಲ.

104 ಬ್ಯಾಚ್‌ ಸ್ಯಾಂಪಲ್‌ ಗುಣಮಟ್ಟ ಹೊಂದಿಲ್ಲ

ಸೊಸೈಟಿ ಪರೀಕ್ಷೆಗೆ ಒಳಪಡಿಸಿದ 27 ಬ್ಯಾಚ್‌ಗಳ ಸ್ಯಾಂಪಲ್‌ಗಳು ಹಾಗೂ ಔಷಧ ನಿಯಂತ್ರಕರಿಂದ ಪರೀಕ್ಷೆಗೆ ಒಳಪಟ್ಟಿರುವ 77 ಬ್ಯಾಚ್‌ಗಳ ಸ್ಯಾಪಲ್‌ಗಳು ನಿಗದಿತ ಗುಣಮಟ್ಟ ಹೊಂದಿಲ್ಲ ಎಂದು ತಿಳಿಸಲಾಗಿದೆ. ಈ ಮೂಲಕ ಸೊಸೈಟಿಯಿಂದ ಪರೀಕ್ಷೆಗೆ ಒಳಗಾದ 1.23 ಕೋಟಿ ರೂ. ಮೌಲ್ಯದ ಔಷಧಗಳು ಮತ್ತು ಔಷಧ ನಿಯಂತ್ರಕರಿಂದ ಪರೀಕ್ಷೆಗೆ ಒಳಪಟ್ಟ 4.08 ಕೋಟಿ ರೂ. ಮೌಲ್ಯದ ಔಷಧಿಗಳು ಗುಣಮಟ್ಟ ಹೊಂದಿಲ್ಲ.

ಔಷಧ ಬದಲಿಸಿಕೊಟ್ಟಿಲ್ಲ

ಔಷಧ ಗುಣಮಟ್ಟ ಹೊಂದಿಲ್ಲವೆಂದರೆ 30 ದಿನಗಳ ಒಳಗಾಗಿ ಗುತ್ತಿಗೆದಾರ/ಸಪ್ಲೈಯರ್‌ ಬದಲಿಸಿಕೊಡಬೇಕು. ಇಲ್ಲದಿದ್ದರೆ ಟೆಂಡರ್‌ನಲ್ಲಿ ನೀಡಿರುವ ಭದ್ರತಾ ಠೇವಣಿ ಜಪ್ತಿ ಮಾಡಿಕೊಳ್ಳಬೇಕು. ಅಲ್ಲದೇ, ಅವುಗಳನ್ನು ನಾಶಪಡಿಸುವ ಶುಲ್ಕವನ್ನು ಕೂಡ ಸಪ್ಲೈಯರ್‌ನಿಂದಲೇ ಪಡೆಯಬೇಕು. ಆದರೆ, ಗುಣಮಟ್ಟ ಕಾಪಾಡಲಾಗಿಲ್ಲ ಎಂದು ಹೇಳಲಾದ 104 ಬ್ಯಾಚ್‌ ಔಷಧಗಳ ಪೈಕಿ ಕೇವಲ 12 ಬ್ಯಾಚ್‌ಗಳನ್ನು ಮಾತ್ರ ಬದಲಿಸಿಕೊಡಲಾಗಿದೆ. ಉಳಿದ ಔಷಧಗಳಿಂದ 4.86 ಕೋಟಿ ರೂ. ನಷ್ಟವಾಗಿದೆ. ಅಲ್ಲದೇ ಆ ಕಂಪನಿಗಳಿಂದ ಠೇವಣಿ ಮೊತ್ತವನ್ನು ಕೂಡ ಜಪ್ತಿ ಮಾಡಿಲ್ಲ. ಗುಣಮಟ್ಟ ಔಷಧ ಪೂರೈಸದ ಕೇವಲ ಎರಡು ಸಪ್ಲೈಯರ್‌ಗಳನ್ನು ಮಾತ್ರ ಕಪ್ಪು ಪಟ್ಟಿಗೆ ಸೇರಿಸಲಾಗಿದೆ ಎಂದು ಸಿಎಜಿ ವರದಿಯಲ್ಲಿ ತಿಳಿಸಲಾಗಿದೆ.

ತಪಾಸಣೆ ವರದಿಯಲ್ಲಿ ವ್ಯತ್ಯಾಸ

ಸೊಸೈಟಿಯಿಂದ ಪರಿಶೀಲನೆಗೊಳಪಟ್ಟು ಗುಣಮಟ್ಟ ಕಾಪಾಡಲಾಗಿದೆ ಎಂದಿರುವ 55 ಲಕ್ಷ ರೂ. ಮೌಲ್ಯದ 19 ಬ್ಯಾಚ್‌ ಔಷಧಗಳನ್ನು, ಔಷಧ ನಿಯಂತ್ರಕರಿಂದ ಪರೀಕ್ಷೆಗೆ ನಡೆಸಿದಾಗ ಗುಣಮಟ್ಟ ಹೊಂದಿಲ್ಲ ಎಂದು ತಿಳಿಸಲಾಗಿದೆ. ಈ ಎರಡು ಪ್ರತ್ಯೇಕ ಪರೀಕ್ಷೆ ವರದಿಗಳಲ್ಲಿ ವ್ಯತ್ಯಾಸ ಕಂಡು ಬಂದಿದೆ.

ಪೂರೈಸುವುದಕ್ಕೆ ನಿರ್ಬಂಧಿಸಬೇಕಿತ್ತು

ಗುಣಮಟ್ಟವಿಲ್ಲದ ಔಷಧಗಳನ್ನು ನಿರ್ಬಂಧಿಸುವಂತೆ ಆಸ್ಪತ್ರೆಗಳು ಮತ್ತು ವೇರ್‌ಹೌಸ್‌ಗಳಿಗೆ ತಿಳಿಸಬೇಕು. ಆದರೆ, ಸೊಸೈಟಿಯು 8ರಿಂದ 100 ದಿನಗಳವರೆಗೆ ಸಂಬಂಧಪಟ್ಟವರಿಗೆ ಯಾವುದೇ ಮಾಹಿತಿಯನ್ನು ನೀಡದೆ ಲೋಪ ಎಸಗಿದೆ ಎಂದು ಸಿಎಜಿ ಹೇಳಿದೆ.