ಸೀಟಿಗೆ ಅನುಗುಣವಾಗಿ ಟಿಕೆಟ್‌: ಪಿಐಎಲ್‌ ಇತ್ಯರ್ಥ

ಬೆಂಗಳೂರು : ರೈಲುಗಳಲ್ಲಿನ ಸಾಮಾನ್ಯ ಬೋಗಿಗಳಲ್ಲಿ ಸೀಟು ಇರುವಷ್ಟೇ ಜನರಿಗೆ ಟಿಕೆಟ್‌ ನೀಡುವಂತೆ ರೈಲ್ವೆ ಇಲಾಖೆಗೆ ಆದೇಶಿಸಬೇಕೆಂದು ಕೋರಿ ಸಲ್ಲಿಸಿದ್ದ ಅರ್ಜಿಯನ್ನು ಹೈಕೋರ್ಟ್‌ ಮಂಗಳವಾರ ಇತ್ಯರ್ಥಪಡಿಸಿತು.

ಹುಬ್ಬಳ್ಳಿಯ ಪಿ.ರವೀಂದ್ರ ನಾಯ್ಡು ಸಲ್ಲಿಸಿದ್ದ ಪಿಐಎಲ್‌ ಮುಖ್ಯ ನ್ಯಾ. ಎ.ಎಸ್‌.ಓಕ್‌ ಮತ್ತು ನ್ಯಾ.ಪಿ.ಎಸ್‌.ದಿನೇಶ್‌ ಕುಮಾರ್‌ ಅವರಿದ್ದ ವಿಭಾಗೀಯ ಪೀಠದ ಮುಂದೆ ಮಂಗಳವಾರ ವಿಚಾರಣೆಗೆ ಬಂದಿತು.

ಅರ್ಜಿದಾರರ ವಾದ ಆಲಿಸಿದ ಬಳಿಕ ನ್ಯಾಯಪೀಠ, ನಿಮ್ಮ ಕೋರಿಕೆ ಮಾನ್ಯ ಮಾಡಲು ಸಾಧ್ಯವಿಲ್ಲ. ಹಾಗಿದ್ದರೆ ರೈಲುಗಳಲ್ಲಿ ಜನರು ಪ್ರಯಾಣಿಸುವುದಾದರೂ ಹೇಗೆ? ಸೀಟು ಇದ್ದಷ್ಟೆ ಟಿಕೆಟ್‌ ನೀಡಿದರೆ ಉಳಿದ ಪ್ರಯಾಣಿಕರ ಪಾಡೇನು? ಇದು ಸಾಧ್ಯವಾಗದ ವಿಷಯ, ಮೊದಲು ನೀವು ರೈಲ್ವೆ ಇಲಾಖೆಗೆ ಮನವಿ ಸಲ್ಲಿಸಿ, ಅವರು ಅದನ್ನು ಪರಿಗಣಿಸಿ ತೀರ್ಮಾನ ಕೈಗೊಳ್ಳಲಿ ಎಂದು ಮೌಖಿಕವಾಗಿ ಹೇಳಿತು.

ಅರ್ಜಿದಾರರು, ಸಾಮಾನ್ಯ ಬೋಗಿಗಳಲ್ಲಿ ಇರುವ ಸೀಟುಗಳಿಗಿಂತ ಹೆಚ್ಚಿನ ಟಿಕೆಟ್‌ಗಳನ್ನು ನೀಡುವುದರಿಂದ ಆ ದಟ್ಟಣೆಯಲ್ಲಿ ಎಷ್ಟೋ ಮಂದಿ ಪ್ರಯಾಣಿಸಲು ಸಾಧ್ಯವಾಗುವುದಿಲ್ಲ ಎಂದು ನ್ಯಾಯಪೀಠಕ್ಕೆ ತಿಳಿಸಿದರು.