ಕಸಾಯಿಖಾನೆಗೆ ಮೀಸಲಿಟ್ಟಿದ್ದ ಐದು ಎತ್ತುಗಳ ಖರೀದಿಸಿದ ರಕ್ಷಿಸಿದ ರಾಮಚಂದ್ರಾಪುರ ಮಠ

ಬೆಂಗಳೂರು: ಬಕ್ರೀದ್‌ ಹಬ್ಬದ ಹಿನ್ನೆಲೆಯಲ್ಲಿ ಕಾಸರಗೋಡಿನಲ್ಲಿ ಕಸಾಯಿಖಾನೆಗೆ ಮಾರಾಟವಾಗಲಿದ್ದ ಓಂಗೋಲ್‌ ತಳಿಯ ಐದು ಎತ್ತುಗಳನ್ನು ರಾಮಚಂದ್ರಾಪುರ ಮಠದ ಗೋ ಸಂಜೀವಿನಿ ಯೋಜನೆಯಡಿ ಖರೀದಿಸಿ ಜೀವದಾನ ಮಾಡಲಾಗಿದೆ.

ಬಕ್ರೀದ್‌ ಹಬ್ಬಕ್ಕಾಗಿ ಮಧ್ಯವರ್ತಿಯೊಬ್ಬರು ಆಂಧ್ರ ಪ್ರದೇಶದಿಂದ ಐದು ಎತ್ತುಗಳನ್ನು ಖರೀದಿಸಿ ತಂದು ರಸ್ತೆ ಬದಿಯಲ್ಲಿ ಕಟ್ಟಿದ್ದರು. ರಾಘವೇಶ್ವರಭಾರತೀ ಶ್ರೀಗಳ ಸಲಹೆಯಂತೆ ಕಾಮದುಘಾ ವಿಭಾಗದ ಕಾರ್ಯಕರ್ತರು ಸ್ಥಳಕ್ಕೆ ಧಾವಿಸಿ ಮಧ್ಯವರ್ತಿ ಜತೆ ಮಾತುಕತೆ ನಡೆಸಿದರು. ನಂತರ 3.2 ಲಕ್ಷ ರೂ. ಪಾವತಿಸಿ ಎತ್ತುಗಳನ್ನು ಖರೀದಿಸಿ ಪೂಚಕ್ಕಾಡು ಗೋ ಶಾಲೆಗೆ ಕಳುಹಿಸಲಾಯಿತು ಎಂದು ಮಠದ ಪ್ರಕಟಣೆ ತಿಳಿಸಿದೆ. ಈ ಹಿಂದೆ ಮಲೆ ಮಹದೇಶ್ವರ ಬೆಟ್ಟದ ಬಳಿ ತಮಿಳುನಾಡಿನ ಆಡಿ ಜಾತ್ರೆಯಲ್ಲಿ ಮಾರಾಟವಾಗಲಿದ್ದ 1,500 ಕ್ಕೂ ಹೆಚ್ಚು ಗೋವುಗಳನ್ನು ಒಂದೂವರೆ ಕೋಟಿ ರೂ. ಪಾವತಿಸಿ ಖರೀದಿಸಿ ರಕ್ಷಿಸಲಾಗಿತ್ತು.