ರೆಬೆಲ್‌ಗಳು ಇಂದು ವಾಪಸ್‌

ಬೆಂಗಳೂರು : ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿದ ಬಳಿಕ ಕಳೆದ 18 ದಿನಗಳಿಂದ ಮುಂಬಯಿ ಸೇರಿಕೊಂಡಿದ್ದ ಜೆಡಿಎಸ್‌ ಹಾಗೂ ಕಾಂಗ್ರೆಸ್‌ನ 12 ಮಂದಿ ಶಾಸಕರು ಬಹುತೇಕ ಬುಧವಾರ ವಾಪಸ್‌ ಆಗುವ ಸಾಧ್ಯತೆಗಳಿವೆ.

ಜುಲೈ 6 ರಂದು ರಾಜೀನಾಮೆ ನೀಡಿದ ದಿನವೇ ಮುಂಬಯಿ ಸೇರಿಕೊಂಡಿದ್ದ ಅತೃಪ್ತ ಶಾಸಕರು ಎಚ್‌.ಡಿ.ಕುಮಾರಸ್ವಾಮಿ ಸರಕಾರ ಪತನಗೊಂಡು ಅವರು ರಾಜೀನಾಮೆ ಸಲ್ಲಿಸುವ ತನಕ ವಾಪಸ್‌ ಬರುವುದಿಲ್ಲವೆಂದು ಪಟ್ಟು ಹಿಡಿದಿದ್ದರು. ಅದರಂತೆ ಇಷ್ಟು ದಿನಗಳ ಕಾಲ ಮುಂಬಯಿ, ಪುಣೆ ಮತ್ತಿತರ ಕಡೆ ವಾಸ್ತವ್ಯ ಹೂಡಿದ್ದ ಅವರು ಬುಧವಾರ ವಾಪಸ್‌ ಬರಲಿದ್ದಾರೆ. ಸ್ವತಃ ಎಚ್‌.ವಿಶ್ವನಾಥ್‌ ಅವರು ಬೆಂಗಳೂರಿಗೆ ವಾಪಸಾಗುವುದನ್ನು ದೃಢಪಡಿಸಿದ್ದಾರೆ. ಈ ಮಧ್ಯೆ ಮತ್ತೊಂದು ಮೂಲದ ಪ್ರಕಾರ ಬಿ.ಎಸ್‌.ಯಡಿಯೂರಪ್ಪ ಅವರು ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸುವ ತನಕ ವಾಪಸ್‌ ಬರುವುದಿಲ್ಲವೆನ್ನಲಾಗಿದೆ.