ರಾಜ್ಯದಲ್ಲಿ ಮುಂದುವರಿದ ರೆಮ್‌ಡಿಸಿವಿರ್‌ ಕೊರತೆ, ವಾರ್‌ರೂಂಗೆ ಬರ್ತಿವೆ ನಾನಾ ರೀತಿಯ ಕರೆಗಳು!

ಬೆಂಗಳೂರು: ರಾಜ್ಯದಲ್ಲಿ ರೆಮ್‌ಡಿಸಿವಿರ್‌ ಔಷಧ ಕೊರತೆ ಮುಂದುವರಿದಿದೆ. ಬೆಂಗಳೂರಿನಲ್ಲಿರುವ ಮೈಲಾನ್‌ ಮತ್ತು ಬಯಾಕಾನ್‌ ಕಂಪನಿಗಳಿಂದ ಗುರುವಾರ ರೆಮ್‌ಡಿಸಿವಿರ್‌ ಔಷಧ ಪೂರೈಕೆಯಾಗಿಲ್ಲ. ಹೊರ ರಾಜ್ಯಗಳಲ್ಲಿನ ಹೆಟೆರೋ ಮತ್ತು ಸಿಪ್ಲಾಫಾರ್ಮಸಿ ಕಂಪನಿಗಳಿಂದ ಗುರುವಾರ 6400 ರೆಮ್‌ಡಿಸಿವಿರ್‌ ಔಷಧ ಪಡೆಯಲಾಗಿದೆ.

ಬೆಂಗಳೂರು ನಗರದ 134 ಆಸ್ಪತ್ರೆಗಳಿಗೆ ಗುರುವಾರ ಸರಿಸುಮಾರು 4500 ಹಾಗೂ ಇತರೆ ಜಿಲ್ಲೆಗಳಿಗೆ 1900 ರೆಮ್‌ಡಿಸಿವಿರ್‌ ಔಷಧವನ್ನು ಪೂರೈಸಲಾಗಿದೆ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.

ಆಕ್ಸಿಜನ್‌
ರಾಜ್ಯದಲ್ಲಿ ಗುರುವಾರ 400 ಟನ್‌ ಆಕ್ಸಿಜನ್‌ ಬಳಕೆ ಆಗಿದೆ. ಬಳ್ಳಾರಿಯ ಜಿಂದಾಲ್‌, ಕುಣಿಗಲ್‌ ತಾಲೂಕಿನ ಯುನಿವರ್ಸಲ್‌ ಕಂಪನಿಗಳಿಂದ 280 ಟನ್‌ ರವಾನೆ ಆಗಿದೆ. ಇನ್ನುಳಿದಂತೆ ಇತರೆ ಉತ್ಪಾದಕರೂ ಪೂರೈಸಿದ್ದಾರೆ.

ವಾರ್‌ ರೂಂಗೆ ಕರೆಗಳು
ಆಕ್ಸಿಜನ್‌ ಮತ್ತು ರೆಮ್‌ಡಿಸಿವಿರ್‌ ಕೊರತೆ ನೀಗಿಸುವ ನಿಟ್ಟಿನಲ್ಲಿ ಆರೋಗ್ಯ ಇಲಾಖೆ ಆರಂಭಿಸಿರುವ ವಾರ್‌ ರೂಂಗೆ ಹೆಚ್ಚಾಗಿ ಇತರೆ ಕರೆಗಳು ಬರುತ್ತಿವೆ. ಮಾತ್ರೆ ಪೂರೈಸುವಂತೆ, ಮನೆಗಳಲ್ಲಿ ಐಸೋಲೇಟ್‌ ಆಗಲು, ಅಂಬ್ಯುಲೆನ್ಸ್‌ ರವಾನಿಸಲು, ವೈದ್ಯಕೀಯ ಸಿಬ್ಬಂದಿ ಸ್ಪಂದಿಸದ ಕುರಿತು, ಕೊರೊನಾದಿಂದ ಮೃತಪಟ್ಟ ವ್ಯಕ್ತಿಯ ಶವ ಹಸ್ತಾಂತರಿಸಲು, ಚಿತಾಗಾರದ ಸಮಸ್ಯೆ, ಆಸ್ಪತ್ರೆಗಳಲ್ಲಿ ಬೆಡ್‌ ಸಿಗದೇ ಅಲೆದಾಡುತ್ತಿರುವುದು, ಹೆಚ್ಚಿನ ಹಣ ವಸೂಲಿ ಸಮಸ್ಯೆಗಳನ್ನೇ ಹೇಳುವ ಕರೆಗಳು ಬರುತ್ತಿವೆ.

ಪ್ರತಿ ನಿಮಿಷಕ್ಕೆ ಅಂದಾಜು 17ರಿಂದ 20 ಕರೆಗಳು ಬರುತ್ತಿವೆ. ಅದರಲ್ಲಿ 12ರಿಂದ 14 ಕರೆಗಳು ಭಾಗಶಃ ಸಂಬಂಧ ಪಡದ ವಿಷಯಗಳೇ ಆಗಿವೆ ಎಂದು ವಾರ್‌ ರೂಂ ಸಿಬ್ಬಂದಿ ತಿಳಿಸಿದ್ದಾರೆ.

ವಾರ್‌ ರೂಂ ಸಹಾಯವಾಣಿ ಸಂಪರ್ಕಿಸದ ಎಲ್ಲಆಸ್ಪತ್ರೆಗಳಿಗೆ ಆಕ್ಸಿಜನ್‌/ ರೆಮ್‌ಡಿಸಿವಿರ್‌ ಔಷಧವನ್ನು ಪೂರೈಸಲಾಗಿದೆ.
ತ್ರಿಲೋಕಚಂದ್ರ, ಆರೋಗ್ಯ ಇಲಾಖೆ