ಸ್ಪೀಕರ್‌ ಸಮಯ ನಿಗದಿ ಮಾಡಿದ್ದರೂ ವಿಚಾರಣೆಗೆ ಆಗಮಿಸದ ರಾಜೀನಾಮೆ ನೀಡಿದ ಶಾಸಕರು

ಬೆಂಗಳೂರು: ಮೈತ್ರಿ ಸರಕಾರದ ಅತೃಪ್ತ ಶಾಸಕರು ರಾಜೀನಾಮೆ ನೀಡಿದ್ದು ಈಗ ಹಳೆಯ ಸುದ್ದಿಯಾಗಿದೆ. ಈಗ ಎಲ್ಲರ ಕಣ್ಣು ವಿಧಾನಸಭಾ ಸ್ಪೀಕರ್‌ ಕಚೇರಿ ಮೇಲಿದೆ.

ಏಕೆಂದರೆ ರಾಜೀನಾಮೆ ನೀಡಿದ ಹಾಗೂ ಕ್ರಮಬದ್ಧವಾಗಿ ಪತ್ರ ನೀಡಿದ್ದ ಮೂವರು ಶಾಸಕರ ವಿಚಾರಣೆಗೆ ವಿಧಾನಸಭಾ ಸ್ಪೀಕರ್‌ ರಮೇಶ್‌ ಕುಮಾರ್ ಶುಕ್ರವಾರ ಸಮಯ ನಿಗದಿ ಮಾಡಿದ್ದರು.

ವಿಜಯನಗರ ಶಾಸಕ ಆನಂದ್‌ ಸಿಂಗ್‌, ಮಸ್ಕಿ ಶಾಸಕ ಪ್ರತಾಪ್‌ ಗೌಡ ಪಾಟೀಲ್‌ ಹಾಗೂ ಕೆ.ಆರ್.‌ ಪೇಟೆ ಶಾಸಕ ನಾರಾಯಣಗೌಡ ಅವರ ವಿಚಾರಣೆಗೆ ಶುಕ್ರವಾರ ಮಧ್ಯಾಹ್ನ 2 ಗಂಟೆಯಿಂದ ನಾಲ್ಕು ಗಂಟೆಯವರೆಗೆ ಸಮನ ನಿಗದಿ ಮಾಡಲಾಗಿತ್ತು.

2 ಗಂಟೆಗೆ ಆನಂದ್‌ ಸಿಂಗ್‌ಗೆ, 3 ಗಂಟೆಗೆ ಪ್ರತಾಪ್‌ ಗೌಡ ಪಾಟೀಲ್‌ ಹಾಗೂ 4 ಗಂಟೆಗೆ ನಾರಾಯಣಗೌಡ ವಿಚಾರಣೆಗೆ ಸಮಯ ನಿಗದಿಪಡಿಸಲಾಗಿತ್ತು.

ಆದರೆ ಇದುವರೆಗೂ ಮೂವರು ಶಾಸಕರು ಸ್ಪೀಕರ್‌ ಕಚೇರಿಯತ್ತ ಸುಳಿಯಲೇ ಇಲ್ಲ.

ಕಳೆದ ಶನಿವಾರ ರಾಜೀನಾಮೆ ನೀಡಿದ್ದ ನಾರಾಯಣಗೌಡ, ಪ್ರತಾಪ್‌ ಗೌಡ ಪಾಟೀಲ್‌ ರಾಜೀನಾಮೆ ಕ್ರಮಬದ್ಧವಾಗಿದೆ ಎಂದು ಕಳೆದ ಮಂಗಳವಾರ ವಿಧಾನಸಭಾ ಸ್ಪೀಕರ್‌ ಕೆ.ಆರ್‌. ರಮೇಶ್‌ ಕುಮಾರ್‌ ಸ್ಪಷ್ಟಪಡಿಸಿ, ಖುದ್ದು ಹಾಜರಾಗಿ ವಿಚಾರಣೆಗೆ ಹಾಜರಾಗುವಂತೆ ಸಮಯ ನಿಗದಿ ಮಾಡಿದ್ದರು.