ರಸ್ತೆ ಅಪಘಾತದಲ್ಲಿ ಮೃತಪಟ್ಟ ಟೆಕ್ಕಿ ಕುಟುಂಬಕ್ಕೆ 3.2 ಕೋಟಿ ಪರಿಹಾರ

ಬೆಂಗಳೂರು: ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದ ಶಿವಮೊಗ್ಗ ಮೂಲದ ಸಾಫ್ಟ್‌ವೇರ್‌ ಎಂಜಿನಿಯರೊಬ್ಬರ ಕುಟುಂಬಕ್ಕೆ ಹೈಕೋರ್ಟ್‌ ದಾಖಲೆಯ 3.2 ಕೋಟಿ ಪರಿಹಾರಕ್ಕೆ ಆದೇಶ ನೀಡಿದೆ.

ಮೋಟಾರು ವಾಹನ ಅಪಘಾತ ಪರಿಹಾರ ನ್ಯಾಯಾಧೀಕರಣ(ಎಂಎಸಿಟಿ) 1.70 ಕೋಟಿ ರೂ. ಪರಿಹಾರ ಘೋಷಿಸಿದ್ದನ್ನು ಪ್ರಶ್ನಿಸಿ ಮೃತ ಯತೀಂದ್ರನಾಥ್‌ ಪತ್ನಿ ಹಾಗೂ ಕುಟುಂಬ ಸದಸ್ಯರು ಸಲ್ಲಿಸಿದ್ದ ಮೇಲ್ಮನವಿ ವಿಚಾರಣೆ ನಡೆಸಿದ್ದ ನ್ಯಾಯಮೂರ್ತಿ ಬಿ.ವಿ. ನಾಗರತ್ನ ಮತ್ತು ನ್ಯಾಯಮೂರ್ತಿ ಕೆ.ನಟರಾಜನ್‌ ಅವರಿದ್ದ ವಿಭಾಗೀಯಪೀಠ ಇತ್ತೀಚೆಗೆ ಈ ಆದೇಶ ನೀಡಿದೆ.

ಮೋಟಾರು ಅಪಘಾತ ಪ್ರಕರಣವೊಂದಲ್ಲಿ ಸಂತ್ರಸ್ತರ ಕುಟುಂಬ ಸದಸ್ಯರಿಗೆ ಇತ್ತೀಚಿನ ವರ್ಷದಲ್ಲಿ ನೀಡಿರುವ ದೊಡ್ಡ ಮೊತ್ತದ ಪರಿಹಾರ ಇದಾಗಿದೆ.

ಈ ಪರಿಹಾರದಲ್ಲಿ ಯತೀಂದ್ರನಾಥ್‌ ಪತ್ನಿ ಮತ್ತು ಅಪ್ರಾಪ್ತ ಮಗನಿಗೆ ತಲಾ ಶೇ.30ರಷ್ಟು, ತಂದೆ-ತಾಯಿಗೆ ತಲಾ ಶೇ.15, ಮದುವೆಯಾಗದ ಸಹೋದರಿಗೆ ಶೇ.10ರಷ್ಟು ವಿತರಿಸಬೇಕು ಹೈಕೋರ್ಟ್‌ ಆದೇಶಿಸಿದೆ.

ನ್ಯಾಯಪೀಠ ಎಂಎಸಿಟ ಯತೀಂದ್ರನಾಥ್‌ ಗಳಿಕೆಯ ಸಾಮರ್ಥ್ಯ‌ ಪರಿಗಣಿಸದೆ,ಅಪಘಾತ ನಡೆದ ದಿನದಂದು ಆತ ಯಾವುದೇ ಉದ್ಯೋಗದಲ್ಲಿ ಇರಲಿಲ್ಲ ಎಂಬ ಅಂಶವನ್ನು ಮಾತ್ರ ಗಮನದಲ್ಲಿ ಇರಿಸಿಕೊಂಡು 1.70 ಕೋಟಿ ರೂ.ಪರಿಹಾರ ನೀಡಿದೆ. ಈ ಆದೇಶ ಸೂಕ್ತವಾಗಿಲ್ಲ ಎಂದು ತಿಳಿಸಿದ ಹೈಕೋಟ್‌, ಪರಿಹಾರ ಮೊತ್ತವನ್ನು 3.2 ಕೋಟಿ ರೂ.ಗೆ ಹೆಚ್ಚಿಸಿ ಆದೇಶಿಸಿದೆ.

ಪ್ರಕರಣದ ಹಿನ್ನೆಲೆ: ಎನ್‌.ಬಿ.ಯತೀಂದ್ರನಾಥ್‌ ಕಾರಿನಲ್ಲಿ 2015ರ ಫೆ10ರಂದು ಬೆಂಗಳೂರು-ಹೈದರಾಬಾದ್‌ ರಾಷ್ಟ್ರೀಯ ಹೆದ್ದಾರಿ-7ರಲ್ಲಿ ಮೂಲಕ ಬಾಗೇಪಲ್ಲಿ ಬಳಿಯ ಸುಂಕ್ಕಲಮ್ಮ ದೇವಸ್ಥಾನಕ್ಕೆ ಪ್ರಯಾಣಿಸುತ್ತಿದ್ದರು. ಕಾರು ನಿಯಂತ್ರಣ ಕಳೆದುಕೊಂಡು ಪರಗೋಡು ಗ್ರಾಮದ ಬಳಿ ಪಲ್ಟಿ ಹೊಡೆದು ಅಪಘಾತ ಸಂಭವಿಸಿ,ಯತೀಂದ್ರನಾಥ್‌ ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದರು. ವಿಚಾರಣೆ ನಡೆಸಿದ್ದ ಬೆಂಗಳೂರಿನ 8ನೇ ಎಂಎಸಿಟಿ ನ್ಯಾಯಾಲಯ ಮೃತನ ಕುಟುಂಬ ಸದಸ್ಯರಿಗೆ ವಾರ್ಷಿಕ ಶೇ.9ರಷ್ಟು ಬಡ್ಡಿದರಲ್ಲಿ 1.70 ಕೋಟಿ ಪರಿಹಾರ ನೀಡಲು ವಿಮಾ ಕಂಪನಿಗೆ 2017ರಲ್ಲಿ ಆದೇಶಿಸಿತ್ತು.

ಈ ಪರಿಹಾರ ಮೊತ್ತವನ್ನು 50 ಕೋಟಿ ರೂ.ಗೆ ಹೆಚ್ಚಿಸಬೇಕೆಂದು ಕೋರಿ ಯತೀಂದ್ರನಾಥ್‌ ಪತ್ನಿ ಎಸ್‌.ಎಲ್‌.ವರ್ಷ ಹಾಗೂ ಕುಟುಂಬ ಸದಸ್ಯರು ಹೈಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಿದ್ದರು.