ಶ್ರೀಕಾಂತ ಹುಣಸವಾಡಿ
ಕೊಲ್ಲಂ (ಕೇರಳ): ತೆಂಗಿನ ಮರ ಏರಿ ತೆಂಗಿನಕಾಯಿ ಕೀಳಲು ಕೂಲಿಯಾಳುಗಳು ಸಿಗುತ್ತಿಲ್ಲ ಎಂದು ರೈತರು ಇನ್ನು ಚಿಂತಿಸಬೇಕಿಲ್ಲ. ಅತ್ಯಾಧುನಿಕ 'ರೋಬೊ' ಸರಸರನೆ ಮರ ಏರಿ ತೆಂಗಿನಕಾಯಿ ಕೀಳಲಿದೆ!
ಕೇರಳದ ಅಮೃತ ವಿವಿ ವಿದ್ಯಾರ್ಥಿಗಳು ಈ ರೋಬೋವನ್ನು ಸಿದ್ಧಪಡಿಸಿದ್ದಾರೆ. ಇದು ಕೆಲವೇ ಕ್ಷಣಗಳಲ್ಲಿ ಚಕಚಕನೆ ತೆಂಗಿನ ಮರವನ್ನೇರಿ ಕಾಯಿ ಕೀಳುವ ಜೊತೆಗೆ ಒಣಗಿದ ಗರಿಗಳನ್ನೂ ಕತ್ತರಿಸುತ್ತದೆ. ಎಳನೀರನ್ನೂ ಕೀಳುತ್ತದೆ.
ತೆಂಗಿನ ತೋಟಗಳಲ್ಲಿ ರೋಬೊ ಪ್ರಯೋಗ ಯಶಸ್ವಿಯಾಗಿದೆ. ಈಗ ಈ ರೋಬೋಗೆ ಭಾರಿ ಬೇಡಿಕೆ ಬರುತ್ತಿದ್ದು, ಇದಕ್ಕೆ ಅಂತಿಮ ರೂಪ ನೀಡುವ ಪ್ರಕ್ರಿಯೆ ನಡೆದಿದೆ. ಅಮೃತ ವಿವಿಯಿಂದಲೇ ಇನ್ನು ಆರು ತಿಂಗಳಲ್ಲಿ ಇದನ್ನು ಮಾರುಕಟ್ಟೆಗೆ ಬಿಡಲು ಭರದಿಂದ ತಯಾರಿ ಸಾಗಿದೆ.
ಮೂರು ವರ್ಷಗಳ ಸಂಶೋಧನೆ
ಈ ರೋಬೊ ಅಭಿವೃದ್ಧಿಗೆ ಮಾತಾ ಅಮೃತಾನಂದಮಯಿ ಅವರೇ ಮೂಲ ಕಾರಣಕರ್ತರು. 2013ರಲ್ಲಿ ಒಮ್ಮೆ ಕೇರಳದ ಬಡ ವಿಧವೆ ಭೇಟಿ ಮಾಡಿದಾಗ ''ನಮಗೆ ಹತ್ತು ತೆಂಗಿನ ಮರಗಳಿವೆ. ಅವುಗಳಿಂದ ಹೇಗೂ ಜೀವನ ಸಾಗಿಸುತ್ತಿದ್ದೇವು. ಆದರೆ ಮರಗಳನ್ನು ಹತ್ತಿ ಕಾಯಿ ಕೀಳುವವರೇ ಸಿಗದಿರುವುದರಿಂದ ಜೀವನೋಪಾಯವೇ ಕಷ್ಟವಾಗುತ್ತಿದೆ,'' ಎಂದು ತಮ್ಮ ಕಷ್ಟವನ್ನು ಹೇಳಿಕೊಂಡಿದ್ದರಂತೆ. ಆಗ ಅಮೃತಾನಂದಮಯಿ ತಮ್ಮ ಎಂಜಿನಿಯರಿಂಗ್‌ ಕಾಲೇಜಿನ ರೋಬೋಟೆಕ್‌ ವಿಭಾಗದ ಸಿಬ್ಬಂದಿ ಹಾಗೂ ವಿದ್ಯಾರ್ಥಿಗಳನ್ನುದ್ದೇಶಿಸಿ, ತೆಂಗಿನ ಮರ ಹತ್ತುವವರ ಸಮಸ್ಯೆಗೆ ಪರಿಹಾರ ಕಂಡು ಹಿಡಿಯುವಂತೆ ಸೂಚಿಸಿದರು. ಆನಂತರ ವಿವಿ ಪ್ರಯೋಗಾಲಯದ ನಿರ್ದೇಶಕ ರಾಜೇಶ್‌ ಕಣ್ಣನ್‌ ಮೇಗಲಿಂಗಂ ನೇತೃತ್ವದಲ್ಲಿ ಎಂಟೆಕ್‌ ರೋಬೋಟೆಕ್‌ ವಿಭಾಗದ ವಿದ್ಯಾರ್ಥಿಗಳ ಗುಂಪು ರೋಬೊ ಅಭಿವೃದ್ಧಿಪಡಿಸುವ ಕಾಯಕ್ಕೆ ಇಳಿದು ಯಶಸ್ವಿಯಾಯಿತು.
ಮರಕ್ಕೆ ಜೋಡಿಸಬೇಕು
ಇದನ್ನು ತೆಂಗಿನ ಮರಕ್ಕೆ ಅಳವಡಿಸಿದರೆ ಸಾಕು. ಮರಗಳಿಗೆ ಇದನ್ನು ಅಳವಡಿಸಲು 15ರಿಂದ 20 ನಿಮಿಷ ಬೇಕಾಗುತ್ತದೆ. ಬಳಿಕ ಇದು ಮರದ ಎತ್ತರವನ್ನು ಆಧರಿಸಿ ಮೂರರಿಂದ ಐದು ನಿಮಿಷಗಳಲ್ಲಿ ಮರವನ್ನೇರುತ್ತದೆ. ರಿಮೋಟ್‌ ಅಥವಾ ಮೊಬೈಲ್‌ನಿಂದ ಅದನ್ನು ಕೆಳಗಿನಿಂದಲೇ ನಿಯಂತ್ರಿಸಬಹುದು.
ಒಂದು ಲಕ್ಷದೊಳಗೆ ಸಿಗಲಿದೆ
ಈಗ ಸಿದ್ಧವಾಗಿರುವ ರೋಬೋಗೆ ಸುಮಾರು 1.80 ಲಕ್ಷ ರೂ. ವೆಚ್ಚವಾಗಿದೆ. ಆದರೆ ಹೆಚ್ಚು ಹೆಚ್ಚು ಉತ್ಪಾದಿಸಿದಷ್ಟೂ ಅದರ ವೆಚ್ಚ ತಗ್ಗಲಿದೆ. ಒಂದು ಲಕ್ಷಕ್ಕಿಂತ ಕಡಿಮೆ ಬೆಲೆಯಲ್ಲೇ ಸಿದ್ಧಪಡಿಸಬಹುದು. ಇದೀಗ ಗ್ರಾಮಗಳಲ್ಲಿ ಟ್ರ್ಯಾಕ್ಟರ್‌ ಅಥವಾ ಟಿಲ್ಲರ್‌ಗಳಿರುವಂತೆ, ಒಂದು ಗ್ರಾಮಕ್ಕೆ ಒಂದು ರೋಬೊ ಇದ್ದರೆ ಸಾಕು. ಅದನ್ನು ಬಾಡಿಗೆಗೆ ಪಡೆದು ತೆಂಗಿನಮರಗಳನ್ನೇರಿ ಕಾಯಿಗಳನ್ನು ಇಳಿಸುವ ಎಲ್ಲಾ ಕೆಲಸಗಳನ್ನೂ ಮಾಡಿಸಬಹುದು.
ತೆಂಗಿನ ಮರ ಹತ್ತುವ ರೋಬೊ ರೈತರಿಗೆ ವರದಾನವಾಗಲಿದೆ. ಪೇಟೆಂಟ್‌ ಸಿಕ್ಕಿದ ನಂತರ ದೊಡ್ಡ ಪ್ರಮಾಣದಲ್ಲಿ ಅವುಗಳನ್ನು ತಯಾರಿಸಿ ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುವುದು.
-ರಾಜೇಶ್‌ ಕಣ್ಣನ್‌ ಮೇಗಲಿಂಗಂ, ನಿರ್ದೇಶಕರು, ಎಚ್‌ಯುಟಿ ಲ್ಯಾಬ್ಸ್‌, ಅಮೃತ ವಿಶ್ವವಿದ್ಯಾಪೀಠಂ