ಆರ್‌ಟಿಇ ಶಾಲೆ ಆಯ್ಕೆಗೆ ಕೈ ಕೊಟ್ಟ ಸರ್ವರ್

ಬೆಂಗಳೂರು: ಶಿಕ್ಷಣ ಹಕ್ಕು ಕಾಯಿದೆಯಡಿಯಲ್ಲಿ (ಆರ್‌ಟಿಇ) ಅರ್ಜಿ ಸಲ್ಲಿಸಿರುವವರು ಶಾಲೆಯನ್ನು ಆಯ್ಕೆ ಮಾಡಿಕೊಳ್ಳುವ ದಿನಾಂಕವನ್ನು ಮೇ 16ರ ವರೆಗೆ ವಿಸ್ತರಿಸಿ ಸಾರ್ವಜನಿಕ ಶಿಕ್ಷಣ ಇಲಾಖೆ ಆದೇಶ ಹೊರಡಿಸಿದೆ.

ಆರ್‌ಟಿಇ ಸೀಟುಗಳಿಗೆ ಮೊದಲನೇ ಸುತ್ತಿನ ಲಾಟರಿಯಲ್ಲಿ ಆಯ್ಕೆಯಾಗದ ಸುಮಾರು 1.22 ಲಕ್ಷ ಅರ್ಜಿದಾರರಿಗೆ 2ನೇ ಸುತ್ತಿನ ಲಾಟರಿ ಪ್ರಕ್ರಿಯೆ ಪ್ರಾರಂಭವಾಗುವ ಮೊದಲು ತಮ್ಮ ಶಾಲಾ ಆಯ್ಕೆಯನ್ನು (ಶಾಲೆಯಲ್ಲಿ ಲಭ್ಯವಿರುವ ಸೀಟುಗಳಿಗೆ) ಬದಲಾಯಿಸಿಕೊಳ್ಳಲು ಮೇ 14ರ ಸೋಮವಾರ ಮಧ್ಯಾಹ್ನ 1 ಗಂಟೆಯ ವರೆಗೆ ಕಾಲಾವಕಾಶ ನೀಡಲಾಗಿತ್ತು. ಅರ್ಜಿ ಸಲ್ಲಿಸಿದ ಪೋಷಕರ ಮೊಬೈಲ್‌ಗೆ 'ಒನ್‌ ಟೈಮ್‌ ಪಾಸ್‌ವರ್ಡ್‌' (ಒಟಿಪಿ) ಕಳುಹಿಸಲಾಗುತ್ತಿತ್ತು. ಈ ಒಟಿಪಿಯನ್ನು ಬಳಸಿಕೊಂಡು, ಶಾಲೆಯನ್ನು ಆಯ್ಕೆ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಲಾಗಿತ್ತು.

ಆದರೆ ಇಲಾಖೆಯ ಕಂಪ್ಯೂಟರ್‌ ಸರ್ವರ್‌ನಲ್ಲಿ ಉಂಟಾದ ಸಮಸ್ಯೆಯಿಂದಾಗಿ ಪೋಷಕರು ಶಾಲೆ ಆಯ್ಕೆಯನ್ನು ಮಾಡಿಕೊಳ್ಳಲು ಸಾಧ್ಯವಾಗಲಿಲ್ಲ. ಈ ಸಂಬಂಧ ರಾಜ್ಯದ ನಾನಾ ಕಡೆ ಪೋಷಕರು ಪ್ರತಿಭಟನೆ ನಡೆಸಿದರು. ಹಾಗಾಗಿ ಇಲಾಖೆಯು ಶಾಲೆ ಆಯ್ಕೆಯ ದಿನಾಂಕವನ್ನು ಮೇ 16ರ ವರೆಗೆ ವಿಸ್ತರಿಸಿದ್ದು, ಅಂದು ಬೆಳಗ್ಗೆ 10 ಗಂಟೆ ಒಳಗೆ ಶಾಲೆಗಳನ್ನು ಆಯ್ಕೆ ಮಾಡಿಕೊಳ್ಳುವಂತೆ ಗಡುವು ವಿಧಿಸಿದೆ.