ಪೆಡ್ಲರ್‌ಗಳ ವಾಟ್ಸಾಪ್‌‌ ಗ್ರೂಪ್‌ನಲ್ಲಿ ರಾಗಿಣಿ, ಸಂಜನಾ

ಬೆಂಗಳೂರು: ನಟಿ ಸಂಜನಾ ಗರ್ಲಾನಿ, ರಾಗಿಣಿ ದ್ವಿವೇದಿ ಮತ್ತು ರಾಹುಲ್‌ ತೊನ್ಸೆ ದೇಶ-ವಿದೇಶಗಳ ಡ್ರಗ್ಸ್‌ ಪೆಡ್ಲರ್‌ಗಳ ನಂಟು ಹೊಂದಿದ್ದು, ಡ್ರಗ್ಸ್‌ ಪೆಡ್ಲರ್‌ಗಳ ವಾಟ್ಸಾಪ್‌ ಗ್ರೂಪ್‌ನಲ್ಲಿದ್ದರು.

ಪ್ರಮುಖ ಡ್ರಗ್ಸ್‌ ಪೆಡ್ಲರ್‌ಗಳ ಬಂಧನ ಆಗುತ್ತಿದ್ದಂತೆಯೇ ವಾಟ್ಸಾಪ್‌‌ ಗ್ರೂಪ್‌ ಡಿಲೀಟ್‌ ಮಾಡಿದ್ದರು ಎಂದು ಸಿಸಿಬಿ, ಎನ್‌ಡಿಪಿಎಸ್‌ ನ್ಯಾಯಾಲಯಕ್ಕೆ ತಿಳಿಸಿದೆ. ಸಂಜನಾ, ರಾಗಿಣಿ ಮತ್ತು ರಾಹುಲ್‌ ಸಲ್ಲಿಸಿದ್ದ ಜಾಮೀನು ಅರ್ಜಿ ವೇಳೆ ಈ ಮಾಹಿತಿಯನ್ನು ಸಿಸಿಬಿ ನೀಡಿದೆ.

ಪ್ರಕರಣದಲ್ಲಿ 14ನೇ ಆರೋಪಿಯಾಗಿರುವ ಸಂಜನಾ, ರಾಗಿಣಿ, ರಾಹುಲ್‌ ವಿರುದ್ಧ ದಾಖಲಿಸಿರುವ ಕೇಸ್‌ನಲ್ಲಿ ಕನಿಷ್ಠ 10 ವರ್ಷದಿಂದ ಗರಿಷ್ಠ 20 ವರ್ಷ ಜೈಲು ಶಿಕ್ಷೆ ಜತೆಗೆ 2 ಲಕ್ಷ ರೂ. ದಂಡ ವಿಧಿಸಬಹುದು. ತನಿಖೆಗೆ ಸಹಕರಿಸದ ಆರೋಪಿಗಳಿಗೆ ಜಾಮೀನು ನೀಡಿದರೆ ಸಾಕ್ಷ್ಯ ನಾಶ ಮಾಡುತ್ತಾರೆಂದು ಸಿಸಿಬಿ ಪರ ಸರಕಾರಿ ಅಭಿಯೋ­ಜಕರು ವಾದಿಸಿದ್ದಾರೆ.

ಸಿಸಿಬಿ ಆಕ್ಷೇಪಣೆಗಳನ್ನು ಪರಿಗಣಿಸಿದ ನ್ಯಾಯಾಲಯ, ಜಾಮೀನು ನಿರಾಕರಿಸಿದೆ. ಜಾಮೀನು ಆದೇಶ ಸಂಬಂಧಿಸಿದ ಪ್ರತಿ 'ವಿಜಯ ಕರ್ನಾಟಕ' ಕ್ಕೆ ಲಭ್ಯವಾಗಿದೆ. ಆರೋಪಿಗಳು ಡ್ರಗ್ಸ್‌ ಜಾಲದ ಕುರಿತು ಸಾಕಷ್ಟು ವಿವರಗಳನ್ನು ನ್ಯಾಯಾಲಯಕ್ಕೆ ಒದಗಿಸಿದೆ.