ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ 2ನೇ ರನ್‌ವೇ ಟೇಕಾಫ್‌

ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ನೂತನ ಎರಡನೇ ರನ್‌ವೇ ಕಾರ್ಯಾರಂಭವಾಯಿತು. ಈ ಮೂಲಕ ಸಮಾನಾಂತರವಾಗಿ ಎರಡು ರನ್‌ವೇಗಳನ್ನು ಹೊಂದಿರುವ ದೇಶದ ಮೊದಲ ವಿಮಾನ ನಿಲ್ದಾಣ ಎಂಬ ಹೆಗ್ಗಳಿಕೆಗೆ ಕೆಐಎ ಪಾತ್ರವಾಗಿದೆ.

ಶುಕ್ರವಾರ ಸಂಜೆ 4.37ಕ್ಕೆ ಹೈದರಾಬಾದ್‌-ಬೆಂಗಳೂರು ಇಂಡಿಗೋ ಏರ್‌ಲೈನ್ಸ್‌ ವಿಮಾನ ನೂತನ ದಕ್ಷಿಣ ರನ್‌ ವೇನಿಂದ ಟೇಕಾಫ್‌ ಆಯಿತು. ನಂತರ ಅಂತಾರಾಷ್ಟ್ರೀಯ ಮಾರ್ಗದಲ್ಲಿ ದುಬೈಗೆ ಎಮಿರೇಟ್ಸ್‌ ಏರ್‌ಲೈನ್ಸ್‌ ವಿಮಾನ ಹಾರಾಟ ನಡೆಸಿತು.

4 ಸಾವಿರ ಮೀಟರ್‌ ಉದ್ದ ಮತ್ತು 45 ಮೀಟರ್‌ ಅಗಲದ ಹೊಸ ರನ್‌ವೇ ಹಾಗೂ ಹಾಲಿ ರನ್‌ವೇಗಳಲ್ಲಿಏಕಕಾಲದಲ್ಲಿವಿಮಾನಗಳ ಟೇಕಾಫ್‌ ಮತ್ತು ಲ್ಯಾಂಡಿಂಗ್‌ ಸಾಧ್ಯವಾಗಲಿದೆ. ಇದರಿಂದ ದಟ್ಟಣೆ ಅವಧಿಯಲ್ಲಿ ಹೆಚ್ಚು ವಿಮಾನಗಳ ನಿರ್ವಹಣೆ ಸುಲಭವಾಗುತ್ತದೆ. ನೂತನ ರನ್‌ವೇ ಕಾರ್ಯಾಚರಣೆ ಆರಂಭವಾಗಿರುವುದು ಬೆಂಗಳೂರು ವಿಮಾನ ನಿಲ್ದಾಣದ ಪಾಲಿಗೆ ಐತಿಹಾಸಿಕ ದಿನ ಎಂದು ಕೆಐಎ ಸಿಇಒ ಹರಿ ಮರಾರ್‌ ಹೇಳಿದ್ದಾರೆ.

ಭಾರತದ ಹೊಸ ಗೇಟ್‌ವೇ ಕೆಐಎ

''ಕೆಐಎನಲ್ಲಿಎರಡು ರನ್‌ವೇಗಳು ಇರುವುದರಿಂದ ರಾಜ್ಯ ಮತ್ತು ದೇಶದ ಬೆಳವಣಿಗೆ ಇನ್ನಷ್ಟು ಉತ್ತೇಜನ ಸಿಗಲಿದೆ. ನಿಲ್ದಾಣದ ಮೂಲಸೌಕರ್ಯ ಅಭಿವೃದ್ಧಿ ಮತ್ತು ಬೆಳವಣಿಗೆಯಲ್ಲಿಪಾಲುದಾರರು ಮತ್ತು ಪ್ರಯಾಣಿಕರ ಮಹತ್ವದ ಪಾತ್ರ ವಹಿಸಿದ್ದಾರೆ. ಬರುವ ದಿನಗಳಲ್ಲಿಕೆಐಎ ಭಾರತದ ನೂತನ ಗೇಟ್‌ವೇ ಆಗಲಿದೆ'' ಎಂದು ಹರಿ ಮರಾರ್‌ ಹೇಳಿದರು.

ಮೊದಲ ಹಂತದಲ್ಲಿಸೀಮಿತ ಕಾರ್ಯಾಚರಣೆ

ಆರಂಭದಲ್ಲಿ ಹೊಸ ರನ್‌ವೇ ಸೀಮಿತ ಲ್ಯಾಂಡಿಂಗ್‌ ಮತ್ತು ಟೇಕಾಫ್‌ ನಿರ್ವಹಿಸಲಿದ್ದು, ಹಂತ ಹಂತವಾಗಿ ಪೂರ್ಣ ಪ್ರಮಾಣದಲ್ಲಿವಿಮಾನಗಳ ಹಾರಾಟಕ್ಕೆ ಮುಕ್ತವಾಗಲಿದೆ. ಆರಂಭದಲ್ಲಿಇನ್‌ಸ್ಟು್ರಮೆಂಟ್‌ ಲ್ಯಾಂಡಿಂಗ್‌ ಸಿಸ್ಟಮ್‌ ಕೆಟಗೆರಿ-1 ಇರಲಿದ್ದು, ಕಾರ್ಯಾಚರಣೆ ಸ್ಥಿರಗೊಂಡ ಬಳಿಕ ಕೆಟಗೆರಿ-3ರ ಹಂತಕ್ಕೆ ಏರಿಸಲಾಗುತ್ತದೆ. ಇದರಿಂದ ಅತ್ಯಂತ ಕಡಿಮೆ ಗೋಚರತೆ ಸಂದರ್ಭದಲ್ಲೂವಿಮಾನ ಹಾರಾಟ ಸಾಧ್ಯವಾಗಲಿದೆ. ನೂತನ ರನ್‌ವೇಗೆ 'ಆರ್‌ಡಬ್ಲ್ಯುವೈ 09ಆರ್‌/27ಎಲ್‌' ಕೋಡ್‌ ನೀಡಲಾಗಿದೆ. ಹಾಲಿ ರನ್‌ವೇ ಕೋಡ್‌ ಅನ್ನು 'ಆರ್‌ಡಬ್ಲ್ಯುವೈ 09ಎತ್‌/27ಆರ್‌' ಎಂದು ಮರುನಾಮಕರಣ ಮಾಡಲಾಗಿದೆ.

ಸುರಕ್ಷತೆಗೆ ಅತಿ ಹೆಚ್ಚಿನ ಆದ್ಯತೆ ನೀಡಲಾಗಿದ್ದು, ನಿಲ್ದಾಣದಲ್ಲಿ ವಿಮಾನ ರಕ್ಷಣೆ ಮತ್ತು ಅಗ್ನಿಶಾಮಕ (ಎಆರ್‌ಎಫ್‌ಎಫ್‌) ಸ್ಥಾಪಿಸಲಾಗಿದೆ. ಅತ್ಯಾಧುನಿಕ ಅಗ್ನಿಶಾಮಕ ವಾಹನಗಳನ್ನು ನಿಯೋಜಿಸಲಾಗಿದೆ. 100ಕ್ಕೂ ಅಧಿಕ ಅಗ್ನಿಶಾಮಕ ಸಿಬ್ಬಂದಿಯನ್ನು ನೇಮಿಸಿಕೊಳ್ಳಲಾಗಿದೆ ಎಂದು ಕೆಐಎ ಪ್ರಕಟಣೆಯಲ್ಲಿ ತಿಳಿಸಿದೆ.