ಮಂಡ್ಯ ಲೋಕಸಭೆ ಮತ್ತಷ್ಟು ಗೊಂದಲ ಮತ್ತೆ ಸ್ಪರ್ಧೆಗೆ ಶಿವರಾಮೇಗೌಡ ಒಲವು

ಬೆಂಗಳೂರು : ದೇವೇಗೌಡರ ಕುಟುಂಬದ 3ನೇ ತಲೆಮಾರಿನ ನಿಖಿಲ್‌ ಕುಮಾರಸ್ವಾಮಿ ರಾಜಕಾರಣ ಪ್ರವೇಶಕ್ಕೆ ತೊಡಕುಗಳು ಹೆಚ್ಚುತ್ತಿದ್ದು, ಮಂಡ್ಯ ಲೋಕಸಭೆ ಕ್ಷೇತ್ರದಿಂದ ಮರುಸ್ಪರ್ಧೆಗೆ ಹಾಲಿ ಸಂಸದ ಎಲ್‌.ಆರ್‌.ಶಿವರಾಮೇಗೌಡ ಹಕ್ಕು ಪ್ರತಿಪಾದಿಸಿದ್ದಾರೆ.

''ಮುಂದಿನ ಸಾರ್ವತ್ರಿಕ ಚುನಾವಣೆಗೆ ಮಂಡ್ಯದಿಂದ ನಾನೇ ಜೆಡಿಎಸ್‌ ಅಭ್ಯರ್ಥಿ. ಕೇವಲ ಆರು ತಿಂಗಳ ಅಧಿಕಾರ ನನಗೆ ಸಾಕಾ? ಮತ್ತೆ ಟಿಕೆಟ್‌ ಕೊಡಿ ಎಂದು ಕೇಳುತ್ತೇನೆ'' ಎಂದು ಅವರು ಮಂಡ್ಯದಲ್ಲಿ ಶನಿವಾರ ಹೇಳಿದ್ದಾರೆ.

ಸುಮಲತಾ ಅಂಬರೀಶ್‌ ಅವರನ್ನು ಅಭ್ಯರ್ಥಿಯಾಗಿಸಲು 'ಕೈ' ಪಕ್ಷದ ನಾಯಕರು ತಂತ್ರಗಾರಿಕೆ ಪ್ರಯೋಗಿಸುತ್ತಿರುವ ಮಧ್ಯೆಯೇ, ಜೆಡಿಎಸ್‌ ಹಾಲಿ ಸಂಸದರ ಈ ಹಕ್ಕು ಪ್ರತಿಪಾದನೆ ಜೆಡಿಎಸ್‌ ವರಿಷ್ಠರ ಪಾಲಿಗೆ ತಲೆನೋವು ಸೃಷ್ಟಿಸುವ ಸಾಧ್ಯತೆಯಿದೆ.


ನಿಖಿಲ್‌ ಸ್ಪರ್ಧಿಸಿದರೆ ಸ್ವಾಗತಿಸುವೆ ಮತ್ತು ಸೀಟು ಬಿಡಲು ಸಿದ್ಧ. ಆದರೆ, ಆರು ತಿಂಗಳ ಅಧಿಕಾರ ನನಗೆ ಸಾಕಾ? ಸುಮಲತಾ ಸ್ಪರ್ಧೆ ಬಗ್ಗೆ ನಾನೇನೂ ಮಾತನಾಡಲ್ಲ.

-ಎಲ್‌.ಆರ್‌.ಶಿವರಾಮೇಗೌಡ, ಸಂಸದ.