ಆ್ಯಪ್ನಗರ

ಮತ್ತೆ ಶುರುವಾಯ್ತಾ ಸಿದ್ದು ಆಟ?

ರಾಜಕೀಯ ವಿದ್ಯಮಾನಗಳ ನಡುವೆಯೇ ಮಾಜಿ ಸಿಎಂ ಸಿದ್ದರಾಮಯ್ಯ 'ಮಗು ಚಿವುಟಿ ತೊಟ್ಟಿಲು ತೂಗುವ ' ಆಟ ಮುಂದುವರಿಸಿದ್ದಾರೆ ಎಂಬ ಮಾತು ರಾಜಕೀಯ ಪಡಸಾಲೆಯಲ್ಲಿ ಕೇಳಿ ಬರುತ್ತಿದೆ. ರೆಸಾರ್ಟ್‌ಗೆ ತೆರಳಿದ್ದ ಸುಧಾಕರ್‌, ನಾಗರಾಜ್‌ ಹಾಗೂ ನಾಗೇಶ್‌ಗೆ ಕರೆ ಮಾಡಿ ತರಾಟೆಗೆ ತೆಗೆದುಕೊಂಡಿದ್ದಾರೆ.

Vijaya Karnataka 23 Sep 2018, 8:23 am
ಬೆಂಗಳೂರು: ರಾಜಕೀಯ ವಿದ್ಯಮಾನಗಳ ನಡುವೆಯೇ ಮಾಜಿ ಸಿಎಂ ಸಿದ್ದರಾಮಯ್ಯ 'ಮಗು ಚಿವುಟಿ ತೊಟ್ಟಿಲು ತೂಗುವ ' ಆಟ ಮುಂದುವರಿಸಿದ್ದಾರೆ ಎಂಬ ಮಾತು ರಾಜಕೀಯ ಪಡಸಾಲೆಯಲ್ಲಿ ಕೇಳಿ ಬರುತ್ತಿದೆ. ರೆಸಾರ್ಟ್‌ಗೆ ತೆರಳಿದ್ದ ಸುಧಾಕರ್‌, ನಾಗರಾಜ್‌ ಹಾಗೂ ನಾಗೇಶ್‌ಗೆ ಕರೆ ಮಾಡಿ ತರಾಟೆಗೆ ತೆಗೆದುಕೊಂಡಿದ್ದಾರೆ. ನಾವು ದೇವಸ್ಥಾನ ದರ್ಶನಕ್ಕಾಗಿ ತಮಿಳುನಾಡಿಗೆ ಬಂದಿದ್ದೇವೆ. ಭಾನುವಾರ ಬೆಳಗ್ಗೆ ಬಂದು ನಿಮ್ಮನ್ನು ಭೇಟಿ ಮಾಡುತ್ತೇವೆ ಎಂದು ಮೂವರು ಭರವಸೆ ನೀಡಿದ್ದಾಗಿ ತಿಳಿದು ಬಂದಿದೆ. ಅದೇ ರೀತಿ ತುಕಾರಾಂ, ನಾಗೇಂದ್ರ ಹಾಗೂ ಗಣೇಶ್‌ ಸಿದ್ದರಾಮಯ್ಯ ಜತೆ ದೂರವಾಣಿ ಮೂಲಕ ಚರ್ಚೆ ನಡೆಸಿದ್ದಾರೆ.
Vijaya Karnataka Web Siddaramaiah


ಇದನ್ನೂ ಓದಿ: ಸರಕಾರದ ಅಸ್ಥಿರತೆಯಲ್ಲಿ ನನ್ನ ಪಾತ್ರವಿಲ್ಲ

ಸಿದ್ದರಾಮಯ್ಯ ಲೆಕ್ಕಾಚಾರ ಏನು?

ದಳಪತಿಗಳಿಗೂ ಸಿದ್ದರಾಮಯ್ಯ ಅವರಿಗೂ ಮೊದಲಿನಿಂದಲೂ ಅಷ್ಟಕ್ಕಷ್ಟೆ. ಎಚ್‌ಡಿಕೆ ಸರಕಾರಕ್ಕೆ ಬೆಂಬಲ ನೀಡಿದ್ದೂ ಕೂಡ ಹೈಕಮಾಂಡ್‌ ಒತ್ತಾಸೆಗಾಗಿ ಮಾತ್ರ. ಅಧಿಕಾರಕ್ಕೆ ಬಂದ ಬೆನ್ನಲ್ಲೇ ವಿಧಾನಸೌಧವೇ ಭ್ರಷ್ಟಾಚಾರದ ಕೂಪ ಎಂದದ್ದು, ದುಂದುವೆಚ್ಚಕ್ಕೆ ಕಡಿವಾಣ ಹಾಕುವೆ ಎಂದು ಅಬ್ಬರಿಸಿದ್ದು, ಕಾರ್ಯಸಾಧುವಲ್ಲ ಎಂಬ ಕಿವಿಮಾತು ಹೇಳಿದರೂ ಸಾಲಮನ್ನಾ ಘೋಷಿಸಿದ್ದು, ರಾಜ್ಯ ನಾಯಕರನ್ನೆಲ್ಲ ಮೀರಿ ನೇರವಾಗಿ ಕಾಂಗ್ರೆಸ್‌ ಹೈಕಮಾಂಡ್‌ ಸಖ್ಯ ಬೆಳೆಸಲು ಮುಂದಾದದ್ದು ಸಿದ್ದರಾಮಯ್ಯ ಅವರನ್ನು ಮತ್ತಷ್ಟು ಕೆರಳಿಸಿದೆ. ಅದೇ ಕಾರಣಕ್ಕೆ ಈಗ ಅವರು ತಮ್ಮ ಬೆಂಬಲಿಗರೇ ಹೆಚ್ಚು ಸಂಪುಟದಲ್ಲಿ ಇರುವಂತೆ ನೋಡಿಕೊಳ್ಳುವ ತಂತ್ರದ ಭಾಗವಾಗಿ ಮತ್ತು ಕುಮಾರಸ್ವಾಮಿ ನಿರಾಳವಾಗಿ ಆಡಳಿತ ನಡೆಸಿ ಬೀಗಲು ಅವಕಾಶ ಕೊಡಬಾರದು ಎಂಬ ತಂತ್ರಗಾರಿಕೆ ಭಾಗವಾಗಿ ಸಿದ್ದರಾಮಯ್ಯ ಬೆಂಬಲಿಗರೆಲ್ಲರೂ ರಾಜ್ಯದಿಂದ ಹೊರ ಹೋಗಿ ಒತ್ತಡ ತಂತ್ರ ಅನುಸರಿಸಲು ಮುಂದಾಗಿದ್ದಾರೆ ಎಂಬ ಮಾತು ಸಿದ್ದರಾಮಯ್ಯ ಆಪ್ತ ವಲಯದಿಂದಲೇ ಕೇಳಿ ಬರುತ್ತಿದೆ.

ಕಮಲದ ಹೆಳೆಯಲ್ಲಿ ಯಾರದ್ದೋ ಬೆಳೆ

ಸರಕಾರ ಅಸ್ಥಿರಗೊಳಿಸುವ ಚಟುವಟಿಕೆ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ ನಾಯಕರು ಮತ್ತು ಜೆಡಿಎಸ್‌ ಮುಖಂಡರು ಬಿಜೆಪಿ ಕಡೆ ಬೊಟ್ಟು ಮಾಡಿ ಆಪರೇಶನ್‌ ಕಮಲದ ಆರೋಪವನ್ನೇನೋ ಮಾಡುತ್ತಿದ್ದಾರೆ. ಆದರೆ ಅತೃಪ್ತ ಶಾಸಕರ ರಾಜಕೀಯ ಚಟುವಟಿಕೆ ಮೂಲ ಸರಕಾರದ ಉಡಿಯಲ್ಲೇ ಇದೆ. ಬಿಜೆಪಿ ಹೆಗಲ ಮೇಲೆ ಬಂದೂಕು ಇಟ್ಟು ಎಚ್‌ಡಿಕೆ ಕುರ್ಚಿ ಕಡೆ ಗುರಿ ನೆಡಲಾಗಿದೆ ಎಂಬುದು ರಾಜಕೀಯ ಪಡಸಾಲೆಯಲ್ಲಿ ಕೇಳಿ ಬರುತ್ತಿರುವ ಮಾತು.

ಸಿದ್ದರಾಮಯ್ಯ ನಿವಾಸದಲ್ಲಿ ಬಿಸಿಬಿಸಿ ಚರ್ಚೆ

ಉಪ ಮುಖ್ಯಮಂತ್ರಿ ಡಾ.ಜಿ.ಪರಮೇಶ್ವರ್‌, ಕೆಪಿಸಿಸಿ ಅಧ್ಯಕ್ಷ ದಿನೇಶ್‌ ಗುಂಡೂರಾವ್‌, ಸಚಿವ ಕೃಷ್ಣಬೈರೇಗೌಡ, ಮಾಜಿ ಸಚಿವ ಎಚ್‌.ಎಂ.ರೇವಣ್ಣ, ಶಾಸಕರಾದ ಬೈರತಿ ಸುರೇಶ್‌, ಅಖಂಡ ಶ್ರೀನಿವಾಸಮೂರ್ತಿ, ಹ್ಯಾರೀಸ್‌ ಭೀಮಾನಾಯಕ್‌, ಗಣೇಶ್‌ ಸೇರಿದಂತೆ ಅನೇಕರು ಸಿದ್ದರಾಮಯ್ಯ ನಿವಾಸಕ್ಕೆ ತೆರಳಿ ಸುದೀರ್ಘ ಸಮಾಲೋಚನೆ ನಡೆಸುವುದರೊಂದಿಗೆ ಮಾಜಿ ಸಿಎಂ ನಿವಾಸ ರಾಜಕೀಯ ಚಟುವಟಿಕೆಗಳ ಕೇಂದ್ರವಾಗಿತ್ತು.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ