ಕಾಲಹರಣ ಮಾಡೋದು ಸರಿಯಲ್ಲ : ರಮೇಶ್‌ ಕುಮಾರ್‌

ಬೆಂಗಳೂರು: ಕಾಲ ಹರಣ ಮಾಡೋದು ಸರಿಯಲ್ಲ. ಇದು ಬಜೆಟ್‌ ಸೆಷನ್‌ ಅಲ್ಲ ಎಂದು ಸ್ಪೀಕರ್ ರಮೇಶ್‌ ಕುಮಾರ್‌ ಹೇಳಿದ್ದಾರೆ.

ವಿಶ್ವಾಸಮತ ಯಾಚನೆ ಚರ್ಚೆಯ ವೇಳೆ ಸೋಮವಾರ ಕಲಾಪ ಆರಂಭವಾದಂತೆಯೇ ಮಾತನಾಡಿದ ರಮೇಶ್‌ ಕುಮಾರ್‌, ಸಿಎಲ್‌ಪಿ ನಾಯಕ ಸಿದ್ದರಾಮಯ್ಯ ಅವರ ಕ್ರಿಯಾಲೋಪದ ಮೇಲೆ ರೂಲಿಂಗ್‌ ನೀಡಿದರು. ಅತೃಪ್ತಶಾಸಕರಿಗೂ ವಿಪ್‌ ಜಾರಿಗೊಳಿಸಲು ಅವಕಾಶವಿದೆ ಎಂದು ಉತ್ತರಿಸಿದರು.

Karnataka Crisis: ತಾಜಾ ಮಾಹಿತಿಗೆ ಇಲ್ಲಿ ಕ್ಲಿಕ್‌ ಮಾಡಿ

ಸಚಿವ ಕೃಷ್ಣಭೈರೇಗೌಡ ಚರ್ಚೆಯಲ್ಲಿ ಪಾಲ್ಗೊಂಡಿದ್ದು, ಬಿಜೆಪಿ ನಾಯಕರೋರ್ವರು ಅತೃಪ್ತ ಶಾಸಕರೊಂದಿಗೆ ಮಾತನಾಡಿದ ಆಡಿಯೋ ವಿಚಾರಗಳನ್ನು ಪ್ರಸ್ತಾಪಿಸಿದರು. ಇದು ಆಪರೇಷನ್‌ ಕಮಲ ಅಲ್ಲವೇ ಎಂದು ಪ್ರಶ್ನಿಸಿದರು. ಇದೇ ವೇಳೆ ಸದನದಲ್ಲಿ ಹಾಜರಿಲ್ಲ ಶಾಸಕರ ಬಗ್ಗೆ ಆರೋಪ ಮಾಡುವುದು ಸರಿಯಲ್ಲ ಎಂದು ವಿಪಕ್ಷ ನಾಯಕ ಜಗದೀಶ್‌ ಶೆಟ್ಟರ್‌, ಭೈರೇಗೌಡ ಮಾತುಗಳಿಗೆ ಆಕ್ಷೇಪ ವ್ಯಕ್ತಪಡಿಸಿದರು.

ಈ ವೇಳೆ ಮಧ್ಯಪ್ರವೇಶಿಸಿದ ಸ್ಪೀಕರ್‌ ರಮೇಶ್‌ ಕುಮಾರ್, ಸದನಕ್ಕೆ ಗೌರವ ಕೊಡುವುದು ನಮ್ಮ ಕರ್ತವ್ಯ. ಅಪವಾದ ಹೊತ್ತಿಕೊಳ್ಳಲು ನಾನು ಸಿದ್ಧನಿಲ್ಲ. ಕಾನೂನಿನಂತೆ ನಡೆಯುತ್ತೇನೆ. ಇದು ಬಜೆಟ್‌ ಅಧಿವೇಶನ ಅಲ್ಲ. ಇದೊಂದು ವಿಚಿತ್ರ ಸನ್ನಿವೇಶ. ವಿಶ್ವಾಸಮತ ಒಂದೇ ವಿಚಾರ ಇಲ್ಲಿರೋದು. ಕಾಲಹರಣ ಮಾಡಬಾರದು ಎಂದರು.

ಸ್ವಾತಂತ್ರ್ಯ ಬಂದ ಬಳಿಕ ಬಹುಶಃ ಯಾವ ಸಭಾಧ್ಯಕ್ಷರಿಗೂ ನನಗೆ ಬಂದ ದಯನೀಯ ಸ್ಥಿತಿ ಬಂದಿಲ್ಲ. ಜನ ಆರಿಸಿ ಕಳಿಸಿದ್ದಾರೆ, ಅವರು ಸದನಕ್ಕೆ ಬರಬೇಕಲ್ಲವೇ? ಬಾರದೇ ಇರುವುದಕ್ಕೆ ನನ್ನಿಂದ ಅನುಮತಿಯನ್ನೂ ಪಡೆದಿಲ್ಲ. ಸಂವಿಧಾನಬದ್ಧವಾಗಿ ಅವರೆಲ್ಲರೂ ಶಾಸಕರಾಗಿ ಆಯ್ಕೆಯಾಗಿ ಬಂದವರು. ಈ ರೀತಿಯ ಪರಿಸ್ಥಿತಿ ನಿರ್ಮಾಣವಾದರೆ ಸದನದ ಗೌರವ ಏನಾಗಬೇಕು ಎಂದು ರಮೇಶ್‌ ಕುಮಾರ್‌ ಕಳವಳ ವ್ಯಕ್ತಪಡಿಸಿದರು.