ಮಂಡ್ಯ ಲೇಡಿಸ್‌ಗೆ ವಿಶೇಷ ಬೋಗಿ

ಹೊಸದಿಲ್ಲಿ: ಮಂಡ್ಯದಿಂದ ಉದ್ಯೋಗಕ್ಕಾಗಿ ನಿತ್ಯವೂ ರೈಲಿನಲ್ಲಿ ಬೆಂಗಳೂರಿಗೆ ಪ್ರಯಾಣಿಸುವ ಮಹಿಳೆಯರಿಗಾಗಿ ವಿಶೇಷ ಬೋಗಿಗಳನ್ನು ಕಲ್ಪಿಸುವಂತೆ ಮಂಡ್ಯ ಸಂಸದೆ ಸುಮಲತಾ ಕೇಂದ್ರ ಸರಕಾರಕ್ಕೆ ಮನವಿ ಸಲ್ಲಿಸಿದ್ದಾರೆ.

ದಿಲ್ಲಿಯಲ್ಲಿ ಗುರುವಾರ ರೈಲ್ವೆ ಸಚಿವರಾದ ಪಿಯೂಷ್‌ ಗೋಯಲ್‌ ಹಾಗೂ ಸುರೇಶ್‌ ಅಂಗಡಿ ಅವರನ್ನು ಭೇಟಿ ಮಾಡಿದ ಅವರು, ಈ ಕುರಿತು ವಿಜಯ ಕರ್ನಾಟಕದಲ್ಲಿ ಪ್ರಸ್ತಾಪವಾಗಿರುವ ಅಂಕಣ ಬರಹದ ಕಾಳಜಿಯನ್ನೂ ಪ್ರಸ್ತಾಪಿಸಿದರು.

ವಿಕ ಅಂಕಣಗಾರ್ತಿ ಪಿ. ಕುಸುಮಾ ಆಯರಹಳ್ಳಿ ಅವರು 'ಲೇಡಿಸ್‌ ಬೋಗಿಯ ಹೆಣ್ಮಕ್ಕಳ ಬವಣೆ ಅರಿಯಿರಿ ಸುಮಕ್ಕ' ಶೀರ್ಷಿಕೆಯಡಿ ಮಂಡ್ಯದ ಹೆಣ್ಣು ಮಕ್ಕಳ ಸಂಕಟವನ್ನು ತೆರೆದಿಟ್ಟಿದ್ದರು. ಪಾಂಡವಪುರದಿಂದ ಚನ್ನಪಟ್ಟಣದವರಗೆ ವಿವಿಧ ಊರುಗಳಲ್ಲಿ ರೈಲು ಹತ್ತುವ ಸಾವಿರಾರು ಹೆಣ್ಣು ಮಕ್ಕಳಿಗೆ ರೈಲಿನಲ್ಲಿ ಭದ್ರತೆ ಹಾಗೂ ಉದ್ಯೋಗ ಭದ್ರತೆ ಬೇಕಿದೆ ಎಂಬುದರ ಬಗ್ಗೆ ಗಮನಸೆಳೆದಿದ್ದರು. ಈ ಬರಹ ಸಾಮಾಜಿಕ ಜಾಲತಾಣದಲ್ಲೂ ವೈರಲ್‌ ಆಗಿತ್ತು.

''ದಿಲ್ಲಿಯಲ್ಲಿ ರೈಲ್ವೆ ಸಚಿವರನ್ನು ಭೇಟಿ ಮಾಡಿ, ಮೈಸೂರು-ಬೆಂಗಳೂರು ನಡುವಿನ ರೈಲುಗಳಿಗೆ ಹೆಚ್ಚುವರಿ ವಿಶೇಷ ಬೋಗಿಗಳ ಸೌಕರ್ಯ ಕಲ್ಪಿಸುವುದರ ಜತೆಗೆ, ಪೊಲೀಸ್‌ ಭದ್ರತೆ ನೀಡಬೇಕು. ಮುಂಬಯಿ ಮಾದರಿಯಲ್ಲಿ ವಿಶೇಷ ಮಹಿಳಾ ರೈಲನ್ನು ನೀಡಬೇಕು ಎಂದು ಕೇಳಿಕೊಂಡಿರುವೆ. ತಮ್ಮ ಬೇಡಿಕೆಗೆ ಸೂಕ್ತ ಭರವಸೆ ಸಿಕ್ಕಿದೆ,'' ಎಂದು ಸುಮಲತಾ ತಿಳಿಸಿದ್ದಾರೆ. ಸಚಿವರನ್ನು ಭೇಟಿ ಮಾಡಿದ ಸಂಗತಿಯನ್ನು ಫೋಟೊ ಸಹಿತ ಟ್ವಿಟರ್‌ನಲ್ಲಿ ಪ್ರಕಟಿಸಿದ್ದಾರೆ.