ವಿಮೆ ಪರಿಹಾರ ನೆರವಿಗೆ ವಿಶೇಷ ತಂಡ

ಬೆಂಗಳೂರು: ಬೆಂಕಿಗೆ ಆಹುತಿಯಾದ ಕಾರುಗಳ ವಿಮೆ ಪರಿಹಾರಕ್ಕೆ ಸಂಬಂಧಿಸಿದ ಪ್ರಕ್ರಿಯೆ ನಡೆಸಲು ರಾಜ್ಯ ಸರಕಾರ ಅಧಿಕಾರಿಗಳ ವಿಶೇಷ ತಂಡ ರಚಿಸಿದೆ. ಜತೆಗೆ ಅಗ್ನಿ ದುರಂತಕ್ಕೆ ಕಾರಣ ತಿಳಿಯಲು ತನಿಖೆ ನಡೆಸಲಾಗುವುದು ಎಂದು ರಾಜ್ಯ ಸರಕಾರದ ಮುಖ್ಯ ಕಾರ್ಯದರ್ಶಿ ಟಿ.ಎಂ.ವಿಜಯಭಾಸ್ಕರ್‌ ತಿಳಿಸಿದ್ದಾರೆ.

ವಿಮೆ ಪರಿಹಾರ ಪಡೆಯುವ ಪ್ರಕ್ರಿಯೆಗಳಿಗೆ ಮಾಲೀಕರಿಗೆ ನೆರವಾಗಲು ಈ ತಂಡ ಸಹಕರಿಸಲಿದೆ. ಸುಟ್ಟ ಕಾರುಗಳ ದಾಖಲೆಗಳ ಪ್ರತಿಯನ್ನು ಮಾಲೀಕರಿಗೆ ನೀಡಲು ಸಾರಿಗೆ ಇಲಾಖೆಗೆ ಸೂಚನೆ ನೀಡಲಾಗಿದೆ. ಮಾಲೀಕರಿಗೆ ವಿಮೆ ಪರಿಹಾರ ಸಿಗುವಾಗ ಆಗುವ ಸಮಸ್ಯೆಗಳನ್ನು ಸಹಾನುಭೂತಿಯ ದೃಷ್ಟಿಕೋನದಿಂದ ಪರಿಹರಿಸಿಕೊಡಬೇಕು ಎಂದು ಕೇಂದ್ರ ಸರಕಾರಕ್ಕೂ ಮನವಿ ಮಾಡಲಾಗಿದೆ ಎಂದು ಅವರು ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಭಾನುವಾರದ ಕೊನೆ ದಿನದ ಪ್ರದರ್ಶನಕ್ಕೆ ಬರುವವರಿಗೆ ಪಾರ್ಕಿಂಗ್‌ಗೆ ಪರ್ಯಾಯ ವ್ಯವಸ್ಥೆ ಮಾಡಲಾಗಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.