ನವಶಾಸಕರಿಗೆ ತರಬೇತಿ

ಬೆಂಗಳೂರು: ರಾಜ್ಯ ವಿಧಾನಸಭೆಗೆ ಆಯ್ಕೆಯಾದ 68 ನೂತನ ಶಾಸಕರಿಗೆ ಸಂಸದೀಯ ವ್ಯವಹಾರ ಹಾಗೂ ಶಾಸನ ಸಭೆಯ ಕರ್ತವ್ಯಗಳ ಬಗ್ಗೆ ತರಬೇತಿ ನೀಡಲು ಮೂರು ದಿನಗಳ ಕಾರ್ಯಾಗಾರ ನಡೆಸಲು ವಿಧಾನಸಭೆ ಸಚಿವಾಲಯ ನಿರ್ಧರಿಸಿದೆ.

ಸ್ಪೀಕರ್‌ ರಮೇಶ್‌ ಕುಮಾರ್‌ ಅವರ ಸೂಚನೆ ಹಿನ್ನೆಲೆಯಲ್ಲಿ ಮೈಸೂರಿನ ಆಡಳಿತ ತರಬೇತಿ ಸಂಸ್ಥೆಯಲ್ಲಿ ಆಗಸ್ಟ್‌ನಲ್ಲಿ ಈ ಕಾರ್ಯಾಗಾರ ನಡೆಸಲು ತೀರ್ಮಾನಿಸಲಾಗಿದೆ.

ಶಾಸನ ಸಭೆಯ ಕಾರ್ಯ ವಿಧಾನ, ಶಾಸನ ರಚನೆ, ಭಾರತದ ಸಂವಿಧಾನದ ಪ್ರಕಾರ ಶಾಸಕರ ಕರ್ತವ್ಯ ನಿರ್ವಹಣೆ, ನಿಯಮಾವಳಿಗಳು, ಕಲಾಪ ವಿಧಾನಗಳ ಬಗ್ಗೆ ಸಂಸದೀಯ ಪಟುಗಳಿಂದ ತರಬೇತಿ ಕೊಡಿಸಲು ತೀರ್ಮಾನಿಸಲಾಗಿದೆ. ಬಿ.ಎಲ್‌.ಶಂಕರ್‌, ಎಂ.ಸಿ.ನಾಣಯ್ಯ ಸೇರಿದಂತೆ ಶಾಸನ ಸಭೆಯ ವಿಚಾರದಲ್ಲಿ ಜ್ಞಾನ ಹೊಂದಿದ ಗಣ್ಯರನ್ನು ತರಬೇತುದಾರರಾಗಿ ಆಹ್ವಾನಿಸಲು ನಿರ್ಧರಿಸಲಾಗಿದೆ.