ರೋಷನ್‌ಬೇಗ್‌ ಪ್ರಕರಣಕ್ಕೆ ತಡೆ

ಬೆಂಗಳೂರು: ಮಾಜಿ ಸಚಿವ ಹಾಗೂ ಶಾಸಕ ರೋಷನ್‌ ಬೇಗ್‌ ವಿರುದ್ಧದ ಆದಾಯಕ್ಕೂ ಮೀರಿದ ಅಕ್ರಮ ಆಸ್ತಿ ಗಳಿಕೆ ಪ್ರಕರಣಕ್ಕೆ ಹೈಕೋರ್ಟ್‌ ಮಧ್ಯಾಂತರ ತಡೆಯಾಜ್ಞೆ ನೀಡಿದೆ.

ರೋಷನ್‌ ಬೇಗ್‌, ಅವರ ಪತ್ನಿ ಸಬೀನಾ ರೋಷನ್‌, ಪುತ್ರ ರುಮಾನ್‌ ಬೇಗ್‌ ರೆಹಮಾನ್‌ ಸಲ್ಲಿಸಿದ್ದ ಅರ್ಜಿಯನ್ನು ಆಲಿಸಿದ ನ್ಯಾ.ಕೆ.ಎನ್‌.ಫಣೀಂದ್ರ ಅವರಿದ್ದ ನ್ಯಾಯಪೀಠ, ಸಿಸಿಎಚ್‌ 82ರಲ್ಲಿ ನಡೆಯುತ್ತಿರುವ ಪ್ರಕರಣದ ವಿಚಾರಣೆಗೆ ತಡೆ ನೀಡಿದೆ.

ಅಲ್ಲದೆ, ಲೋಕಾಯುಕ್ತ ಪರ ವಕೀಲರು ಮತ್ತು ಮೂಲ ದೂರುದಾರ ಅಬ್ದುಲ್‌ ಹಖ್‌ ಸುರತಿಗೆ ನೋಟಿಸ್‌ ಜಾರಿಗೊಳಿಸಿದೆ.

ಅರ್ಜಿದಾರರ ಪರ ವಕೀಲರು ''ಪ್ರಕರಣದಲ್ಲಿ ಯಾವುದೇ ಹುರುಳಿಲ್ಲ,ಈಗಾಗಲೇ ಲೋಕಾಯುಕ್ತ ಪೊಲೀಸರು ಆದಾಯಕ್ಕೂ ಮೀರಿದ ಅಕ್ರಮ ಆಸ್ತಿ ಗಳಿಸಿದ್ದಾರೆಂಬ ಆರೋಪಗಳ ಬಗ್ಗೆ ತನಿಖೆ ನಡೆಸಿ 2014ರಲ್ಲಿಯೇ ಬಿ ರಿಪೋರ್ಟ್‌ ಸಲ್ಲಿಸಿದ್ದಾರೆ. ಪೊಲೀಸರು ಅರ್ಜಿದಾರರ ಆಸ್ತಿ ಆದಾಯಕ್ಕೂ ಮೀರಿ ಹೆಚ್ಚಾಗಿಲ್ಲ,ಆದಾಯ ಹೆಚ್ಚಳ ಪ್ರಮಾಣ ಶೇ.4ರೊಳಗೆ ಇದೆ ಎಂದು ವರದಿ ಸಲ್ಲಿಸಿತ್ತು''ಎಂದು ವಿವರಿಸಿದರು.