ಕಾಂಗ್ರೆಸ್‌ ನಾಯಕರ 'ಗುಂಪು ಕಾಳಗ', ಎಐಸಿಸಿ ಹೈಕಮಾಂಡ್‌ ಭೇಟಿಗೆ ನಿರ್ಧಾರ

ಬೆಂಗಳೂರು: ರಾಜ್ಯ ಕಾಂಗ್ರೆಸ್‌ ನಾಯಕರ 'ಗುಂಪು ಕಾಳಗ' ವಾರಾಂತ್ಯದಲ್ಲಿ ಎಐಸಿಸಿ ಹೈಕಮಾಂಡ್‌ ಅಂಗಳಕ್ಕೆ ಶಿಫ್ಟ್‌ ಆಗಲಿದ್ದು, ನಾಯಕತ್ವ ನಿರ್ಧಾರಕ್ಕಾಗಿ ವರಿಷ್ಠರ ಓಲೈಕೆ, ಒತ್ತಡ ತಂತ್ರಕ್ಕಾಗಿ ಒಂದೆರಡು ದಿನಗಳಲ್ಲಿ ಮುಂಚೂಣಿ ನಾಯಕರು ದಿಲ್ಲಿಗೆ ವಿಮಾನ ಏರಲಿದ್ದಾರೆ.

ಸಿದ್ದರಾಮಯ್ಯ ಮತ್ತು ಬೆಂಬಲಿಗ ನಾಯಕರು ಒಂದು ತಂಡವಾಗಿ, ಹಿರಿಯ ಮತ್ತು ಮೂಲ ಕಾಂಗ್ರೆಸ್ಸಿಗರು ಮತ್ತೊಂದು ಗುಂಪಾಗಿ ದಿಲ್ಲಿಗೆ ತೆರಳುತ್ತಿದ್ದಾರೆ. ಗುಂಪುಗಾರಿಕೆಯಿಂದ ಸೊರಗಿರುವ ರಾಜ್ಯ ಕಾಂಗ್ರೆಸ್‌ನಲ್ಲಿನ ಬಿಕ್ಕಟ್ಟಿನ ಪರಿಹಾರೋಪಾಯ ಕುರಿತಂತೆ ಹೈಕಮಾಂಡ್‌ಗೆ ವಸ್ತುಸ್ತಿತಿ ಮನದಟ್ಟು ಮಾಡಿಕೊಡಲು ತಮ್ಮದೇ ವಾದದೊಂದಿಗೆ ತಯಾರಿ ಮಾಡಿಕೊಂಡಿದ್ದಾರೆ.

ಉಪಚುನಾವಣೆ ಸೋಲಿನ ಬಳಿಕ ಶಾಸಕಾಂಗ ಪಕ್ಷದ ನಾಯಕ ಸಿದ್ದರಾಮಯ್ಯ, ಕೆಪಿಸಿಸಿ ಅಧ್ಯಕ್ಷ ದಿನೇಶ್‌ ಗುಂಡೂರಾವ್‌ ನೀಡಿದ ರಾಜೀನಾಮೆ ಪತ್ರಗಳು ಇನ್ನೂ ಸ್ವೀಕೃತವೂ ಆಗಿಲ್ಲ. ಕೆಪಿಸಿಸಿ ನೂತನ ಅಧ್ಯಕ್ಷರ ನೇಮಕ, ಶಾಸಕಾಂಗ ಪಕ್ಷ ನಾಯಕ ಹಾಗೂ ಪ್ರತಿಪಕ್ಷ ನಾಯಕ ಸ್ಥಾನ ಪ್ರತ್ಯೇಕಿಸುವುದು, ಸಿಡಬ್ಲ್ಯೂಸಿಯಲ್ಲಿ ಕೆಲವು ಹಿರಿತಲೆಗಳಿಗೆ ಅವಕಾಶ ಮತ್ತು ಜವಾಬ್ದಾರಿ ನಿಗದಿ ಸಂಬಂಧ ಹೈಕಮಾಂಡ್‌ ಬಳಿ ಕರಡು ಸಿದ್ಧವಿದೆ. ತೀರ್ಮಾನ ಪ್ರಕಟಿಸುವ ಮುನ್ನ ಮತ್ತೊಮ್ಮೆ ಆಯ್ದ ಹಿರಿಯ ನಾಯಕರೊಂದಿಗೆ ಸಮಾಲೋಚನೆಗೆ ವರಿಷ್ಠರು ಬಯಸಿದ್ದಾರೆ.